सरकारलिसे फोहोर व्यवस्थापन यायेत समन्वय जुयाच्वंगु मेयर शाक्यका धापू

कृष्ण प्रजापति
येँ महानगरपालिका लिसें स्वनिगःया सतक व चोकय् छुं दिं न्ह्यःनिसें मुनाच्वंगु फोहोर याकनं हे व्यवस्थापन जुइगु येँ महानगरया मेयर विद्यासुन्दर शाक्यं धाःगु दु । मेयर शाक्यं छुं दिं लाक्वपाक्व फाहोर वांमछ्वयेत महानगरवासीपिन्त इनाप नं याःगु दु ।
बञ्चरेडाँडाय् निर्माणाधीन स्यानिटरी ल्याण्डफिल्ड साइट व सिसडोल ल्याण्डफिल साइटया स्थलगत रिपोर्टिङ यानाः लिहाँ वःम्ह मेयर शाक्यं संचारकःमिपिंलिसे खँ ल्हासें उगु खँया जानकारी ब्यूगु खः । मेयर शाक्यं छुं दिंनिसें वा वःगु हुनिं सिसडोल ल्याण्डफिल साइटतक वनेगु लँपु स्यंगु हुनिं नियमित रुपं फोहोर व्यवस्थापनय् पंगः ब्वलनाच्वंगु धाःगु दु । मेयर शाक्यं धाःगु दु, ‘सिसडोलतक वनेगु लँपु वा वःगु हुनिं स्यंगु दु । लँपुया हे हुनिं फोहोर ज्वनाः अन थ्यंगु गाडीयात नं डोजरं घ्वानाः च्वय् तक यंकेमाःगु अवस्था दु । वहे हुनिं छुं दिंनिसें पूर्ण रुपं फोहोर उठेयाये मफूगु खः ।’
मेयर शाक्यं याकनं हे फोहोर व्यवस्थापन यानाः यचुपिचु सफा येँ देय् यायेगु प्रतिवद्धता प्वंकूगु दु । सरकारलिसे समन्वय यानाः फोहोर व्यवस्थापनया नितिं फक्व कुतः यानाच्वनागु जानकारी मेयर शाक्यं ब्यूगु दु । वं धाःगु दु, ‘नियमित रुपं गुलि फोहोर व्यवस्थापन जुइमाःगु खः, व तत्कालया नितिं जुइफयाच्वंगु मदु । उकिया नितिं जिमिसं नेपाल सरकारलिसे समन्वय यानाच्वनागु दु ।’ मेयर शाक्यं धाःगु दु, ‘मू कथं सिसडोलतक वनेगु नितिं अस्थायी सतक निर्माणया नितिं जिमिसं सतक विभागयात आग्रह यानागु खः । जिपिं सतक निर्माणया नितिं खर्च यायेत तयारी अवस्थाय् दु । तर, अनया डिजाइन तयार यायेत जिमिसं सतक विभागयात इनाप यानागु खः । सहरी विकास मन्त्रालयलिसे जिमिसं न्हापांनिसें हे सहकार्य यानाः वयाच्वनागु खः ।’
आः बञ्चरेडाँडा ल्याण्डफिल्ड साइट सहरी विकास मन्त्रालयं दयेकाच्वंगु लुमंकूसें मेयर शाक्यं फोहोर व्यवस्थापनया जिम्मेवारी संघीय, प्रदेश व स्थानीय सरकार फुक्कसिगु जूगु धाःगु दु । मेयर शाक्यं धाःगु दु, ‘सुनां सुंयात दोष बियाः मुक्त जुइमज्यू । झी सकलसिन समन्वयस फोहोर व्यवस्थापन यायेमाः ।’ सहरी विकास मन्त्रालयं बञ्चरेडाँडाया ल्याण्डफिल्ड साइट गुलि फु उलि याकनं निर्माण क्वचायेकाः लःल्हाःसा स्थायी रुपं फोहोर व्यवस्थापन यायेफइगु मेयर शाक्यं धाःगु दु । बञ्चरेडाँडाय् स्यानिटरी ल्याण्डफिल्ड साइट निर्मा०ा यायेत २०७६ बैशाख २२ गते दच्छिया दुने ज्या क्वचायेकेगु कथं लुम्बिनी–कोशी एण्ड न्यौपाने जेभीलिसे ठेक्का सम्झौता याःगु खः ।