सांस्कृतिक स्तर थकायेगु खँ
2021-08-24 05:21:27
चां न्हिं धइथें सापारुथें चले जुयाच्वनीगु झीगु राजनीतिक दबू थौं हानं छक्वः सापारुया च्यान्हुया लागिं ब्यंग्य यायेत छुट जूगु दु । राणाकाल व पंचायती शासन ब्यवस्थाय् तकं सापारु च्यान्हुया लागिं राजनीतिक जक मखु समसामयिक विषयय् हाँश्यब्यंग्य यायेया लागिं ई फ्यानातःगु तायेकी । थौं देसय् न्ह्यानाच्वंगु राजनीतिक परिवेश न्ह्याब्लें धइथें सापारुया ख्यालि न्हिलि थें जुयाच्वंगु कारणं उगु ब्यंग्यं सुयागुं नुगः पम्हुइकेफुगु स्थिति धाःसा मदु । म्हिगः न्वलं दायां मस्या साँगुलं दायां स्या धयाथें सुनानं छुं धाल कि सकसितं ग्याचिकु ब्वलनाच्वंगु इलय् जूसा सुनानं सुयातं छुं धालकि उकिया तुरुन्त प्रतिक्रिया वा सुधारमुखी ज्याझ्वःत जूगु रेकर्ड दु । तर थौं फुक्कं लज्या तकं मचाःपिं जूगु कारणं हाँश्य ब्यंग्य व तप्यंक म्हुतु वात धाःसां छ्यनय् पिया छ्वइगु स्थिति खनेदु ।
मनूतय्गु राजनीतिक व सांस्कृतिक स्तर थकायेगु ज्याखँ दक्कलय् थाकुगु ज्याखं मध्ये छगू खः । नयेत कमे यायेगु, कमे यानागु दांया सही सदुपयोग यायेगु व भविष्यया लागिं छुं भचा जूसां जोह यायेगु ज्या मानव समाजय् न्हापानिसें याना वयाच्वंगु चीज खः । तर थौं जग्गा जमीन मिया जूसां मोटरसाइकल व गाडी गयेगु प्रबृत्ति, ल्यासे ज्वना देसान्तर चाःहिलेगु स्वभाव व विदेश भ्रमण यानाः मोज मस्ती याना जुयेगु काइदाया कारणं आर्थिक नोक्सान जक मखुसें भविष्ययात अन्धकारय् लाकाः युवा पुस्तां थःगु कथं जीवन हनेगु परिपातिया विकास यानाच्वंगु दु । म्हिगः गां गामय् वनाः दुःख सिया कमे याना जोह यानातःगु जग्गा जमीन, नयेगु त्वनेगु तकं क्वपाला कमे यानातःगु दां व छेँ बुँयात थौंया पुस्तां मिया मिया पिनेयापिंत स्वनिगः व स्वनिगः जःखःया नेवाः बस्तीइ दुकयाः थःगु जमीन परिवेशय् थःम्हेसियां कं पियाच्वंगु स्थिति दु । उकिया दूरगामी लिच्वः धाःसा बांलाःगु लाइगु ला जुइ फइमखु । आनन्द छुकियात धायेगु ? सुख भोग व सम्भ्रान्त छुकियात तायेकेगु ? सांस्कृतिक स्तर थकाये मफुगु कारणं थ्व खँ नं झी न्हूगु पुस्तां स्पष्ट रुपं थुइके फयाच्वंगु मदुनि । न्हूगु पुस्तायाके यदि राजनीतिक व सांस्कृतिक स्तर थकायेगु भावना ह्रास जुल धाःसा देय् कन्हय् दइ वा मदइगु धाये मफइगु स्थितिइ लाःवनेफु ।
म्हिगः सोभियत रुसय् मिखायल गोर्भाचोभं हःगु ग्लास्टोनोभ व पेसीसटोइका नीतिया कारणं अन युवा पुस्तायाके क्रान्तिकारी भावना व ज्या याना नयेगु स्वभावय् ह्रास वयाः खाली मोज मस्ती व पश्चिमी सभ्यतायात नाला सुख भोगय् जीवनया ताः ई फुकेगु संस्कृतिया विकास जूवना देय् पतन जूवंगु इतिहास दु । झीथाय् नं थौं मौलिक शैलीया सांस्कृतिक चहपह स्वयां भट्टि वना अय्ला थ्वँ त्वनेगु, चांन्हिं तास म्हिता जुयेगु, गल्र्स फ्रेन्ड धाधां लिभिंग टुगेडरया संस्कृतिं थाय् कयाच्वंगु दु । उलि जक मखु, थःगु दैनिक आम्दानी स्वयां खर्च अप्वः यायेगु स्वभावि झी न्हूगु पुस्तायाके सुरु जुयाच्वंगु दु । थुकिं यानाः पूर्खौली सम्पत्ति जग्गा जमीन बाध्यतां पर घरानायात मिये मालिगु स्थिति वइगु जक मखुसें झी म्हिगःनिसें गुगु सांस्कृतिक परिवेशय् म्वानाच्वनापिं खः उकि कुथाराघात जुइगु आपालं सम्भावना दु । उकिं नं राजनीतिक व सांस्कृतिक स्तर थकायेगु ज्या युवा पुस्ताया लागिं हथाय् जुइधुंकूगु दु ।
संस्कृतिया छगू बेजोड नमूना ख्वपय् न्यायेकीगु सापारु पर्व खः । अन सापारुकुन्हुनिसें कृष्ण अष्टमिकुन्हु तक च्याचा गुन्हु गुंपुन्हि कथं हनी । थ्वहे झ्वलय् दच्छि तक राज्यसत्ताय् च्वना मोज मस्ती याःपिं विरुद्धया विरोध यायेगु अवसर कथं थीथी कथं ब्यंग्य याना वइ । हाँश्यं जाःगु अभिनय पित बिल धाःसा नं उकियात कलात्मक रुपं सांस्कृतिक स्तर च्वन्ह्याकेगु कथं अति स्लिल तरिकां न्ह्यब्वइ । म्हिगः अज्याःगु छगू निगू क्रू खनेवं पंचायती शासक व राणातय्सं जनताया असन्तोष थ्व खँय् जुयाच्वन धइगु थुइका सीकाः उकि शासन पद्धतिइ गन छु सुधार यायेमाःगु खः सिइकाः सुधार याना ब्यवस्थायात ग्लूकोज सरह ज्या यानाच्वनी । तर थौं सदन दु । संसद दु । प्रतिनिधिसभा व राष्टिय सभा नं दु । अझ संघीय व प्रदेश सभात दु । अन चां न्हिं धइथें राजनीतिक नेतातय्सं गब्लें थःथः ल्वाना गब्लें तुरुन्त मिले जुया न्ह्याः वनेगु खँ ल्हाना जनतायात गुंलाया सापारु मखु कि दँय् झिनिलां खनेदइगु कथं सापारु क्यनाच्वंगु स्थिति दु । उकिं नं च्यान्हु तक जुइगु सापारु नखः स्वयां सदनय् खनेदइगु व राजनीतिक दलतय् दथुइ खिचातानी जुयाच्वनीगु इलय् खनेदइगु सापारु म्हो रोमान्चक मजू ।
पूँजीवादया रमझमयात अन्त्य यानाः समाजवादी संस्कृतिया विकास याना वनेगु थौंया आवश्यकता खः । उकिं नं विश्वय् युवा जगत प्रबृधि व सञ्चारया लागाय् तसकं न्ह्यःने लानाच्वंगु थ्व इलय् जीवन शैली नापं झीगु सांस्कृतिक स्तरयात नं च्वन्ह्याकेगु खँय् धाःसा सदां विचाः याना च्वनेमाःगु खनेदु । सांस्कृतिक खँ ल्हाना च्वनेगु इलय् सभ्य व सुसंस्कृत जाति मामां वनेगु खःसा विश्वय् चीन धुंकाः नेपाःया नेवाः जातियात कायेमाः । छाय्धाःसा नयेगु नसा ज्वरे यायेगु सवालय् चीन तिब्यत धुंकाः झी नेपाःमि दथुइ नेवाःत दक्कलय् च्वन्ह्याःपिं खः । मेय् छम्ह स्यात धाःसा सछि व च्याता लाया घासा दयेका भपिये सःपिं नेवाःत जक खः । थुलि अप्व परिकार मेपिं सुना नं ज्वरे याना नये मसः । ला ला ला हे जुल । तर क्वँय् गुगु वांछ्वइगु चीज खः । उकियात नं थ्वँ कःगु प्वकः ति ल्यं दनिगुलि थुनाः ध्वगिक कचाघासा दयेकाः नयेसःपिं खः झी नेवाःत । गुकिं यौनवद्र्धक वा यौन शक्ति अप्वयेकीगु विश्वास याना तसकं साक नये वा त्वने सः ।
थुकथं सभ्यता व संस्कृतिया खँ ल्हायेगु इलय् नेपाःया संस्कृति धइगु नेवाःतय् संस्कृति खः धाःसां छुं पइमखु । यदि नेपाःया संस्कृतिं नेवाः संस्कृति छगू जक चीका छ्वयेगु जुल धाःसा थ्व देसय् संस्कृति धइगु हे मदु धाःसां छुं पाइमखु । उकिं नेवाः संस्कृतिया थीथी पक्षयात म्वाका तयेगु व नयेगु, त्वनेगु, जीवन हनेगु थःगु मौलिक पहयात म्वाका तयेगु संस्कृति हे झीगु मौलिक संस्कृति जुइमाः । नांगां च्वनेगु, अश्लिलतायात नालेगु व शारिरीक सुख भोगयात प्राथमिकता बियेगु पश्चिमी संस्कृतियात बहिस्कार याये । सापारुया झ्वलय् मौलिक सांस्कृतिक पर्वयात थकोगु प्रण याये ।
प्रतिक्रिया
