सेनाया बख्तरबन्द गाडीं चक्रपथ चाःहिल

कृष्ण प्रजापति
नेपाली सेनां साउननिसें चैत्रतक देसया थीथी ब्यारेकं बख्तरबन्द गाडीया अभ्यास याइगु जूगु दु । नेपाली सेनां बुधवाः सुचं सार्वजनिक यासें येँया सितापाइलाय् तैनाथ गणं भाद्रनिसें चैत्रतक, सुनसरी ब्यारेक इटहरीइ तैनाथ गुल्मं साउनय् व बोराडाँडी ब्यारेक कैलालीइ तैनाथ गुल्मं साउन व भाद्र महिनाय् बख्तरबन्द गाडीया अभ्यास यायेगु जानकारी ब्यूगु दु ।
सीतापाइला गणं भाद्र १४, असोज ११, कार्तिक १५, मंसीर १३, पुस १२, माघ १०, फागुन २३ व चैत्र १४ गते येँया चक्रपथय् अभ्यास याइगु जूगु दु । अथेहे, साउन १४ गते सुनसरी ब्यारेकं इटहरी चोक, ट्याङ्ग्रा चोक, हवाई चोक, तालतलैया जुयाः अभ्यास याइगु जूगु दुसा साउन २५ व ३२ गते नं सुनसरी ब्यारेकं मेगु रुटय् अभ्यास याइगु जानकारी ब्यूगु दु । अथेहे, धनगढीया बोराडाँडी ब्यारेकं साउन १४, २१ व २८ गते लिसें भाद्र ३, १०। १७ व २४ गते बख्तरबन्द गाडीया अभ्यास यायेगु सेनां जानकारी ब्यूगु दु । नेपाली सेनां वंगु माघ १९ गते बहनी नं येँया चक्रपथय् बख्तरबन्द गाडीया अभ्यास याःगु खः ।