अस्पताल ३६५ दिन खुला हुनुपर्छ

कुमार लघु, भक्तपुर

अस्पताल वर्षका ३६५ दिन नै खुला हुनुपर्छ। त्यसले मात्र जनताले सहज रूपमा स्वास्थ्य सेवा पाउन सक्छन् र कतिपय बिरामीको ज्यान जोगिन सक्छ। अस्पताल भनेको बिरामीको सेवा गर्ने स्थान हो, विदा लिने वा दिने ठाउँ होइन।

रोग कुनै निश्चित दिन हेरेर लाग्दैन—शनिबार होस् वा अन्य दिन, रोग जुनसुकै बेला लाग्न सक्छ। त्यसैले हरेक डाक्टर, नर्स तथा स्वास्थ्यकर्मीहरू २४ सै घण्टा उपचारका लागि तयार रहनु मानव सेवाको साँचो धर्म हो। अस्पताल स्थापना हुनुको मुख्य उद्देश्य नै बिरामीको ज्यान बचाउनु हो।

जब बिरामीले अस्पतालमा डाक्टर र नर्सको साथ पाउँछन्, तब उनीहरूमा बाँच्ने आशा जाग्छ। त्यसैले सेवा निरन्तर हुन आवश्यक छ। यद्यपि, स्वास्थ्यकर्मीहरू पनि मानव हुन्—उनीहरूलाई आराम र विदा आवश्यक हुन्छ। त्यसका लागि सरकारले आलोपालो (शिफ्ट) प्रणाली लागू गरी सेवा निरन्तर चल्ने व्यवस्था मिलाउनु सकारात्मक कदम हो।

बिरामी कहिले अस्पतालमा ल्याइन्छ वा रोग कहिले गम्भीर बन्छ भन्ने कसैले पूर्वानुमान गर्न सक्दैन। त्यसैले स्वास्थ्य सेवामा कुनै पनि समय अवरोध हुनु हुँदैन। अस्पताल मात्र होइन, औषधि पसलहरू पनि सधैं खुला रहनुपर्ने आवश्यकता छ।

स्वास्थ्य क्षेत्रमा नीति निर्माण गर्दा गम्भीर अध्ययन, विज्ञहरूको सुझाव, र व्यापक छलफल आवश्यक हुन्छ। हतारमा गरिने निर्णयले दीर्घकालीन असर पार्न सक्छ। त्यसैले संसदमार्फत गहन छलफलपछि मात्र राष्ट्रिय हितका निर्णय गरिनु उपयुक्त हुन्छ।

प्रत्येक वडामा प्रभावकारी स्वास्थ्य सेवा पुर्‍याउने लक्ष्य सरकारको प्राथमिकतामा हुनुपर्छ। जनतालाई स्वास्थ्यबारे सचेत गराउनु पनि सरकारको महत्वपूर्ण कर्तव्य हो। साथै, गम्भीर अवस्थामा घरमै पुगेर सेवा दिन सक्ने पूर्वाधार विकास गर्नु आजको आवश्यकता हो।

स्वास्थ्य क्षेत्रको समुचित विकास र सुदृढीकरण नै सशक्त राष्ट्र निर्माणको आधार हो। त्यसैले सरकार यस क्षेत्रमा दीर्घकालीन, स्थायी र प्रभावकारी नीति निर्माणमा केन्द्रित हुन जरुरी छ।