सके जितिन्छ नसके सिकिन्छ नारासाथ एभरेस्ट उपत्यकाव्यापी बास्केटबल सुरु

भक्तपुर । सके जितिन्छ, नभए सिकिन्छ भन्ने उदघोषका साथ विहीबारदेखि भक्तपुरमा नवौं एभरेस्ट उपत्यकाव्यापी बास्केटबल प्रतियोगिता सुरु भएको छ । एभरेस्ट इगलिश स्कुल मिवाछें व्यासी भक्तपुरको आयोजनामा भएको हो । प्रतियोगिता मंसिर २४ गतेसम्म सञ्चालन हुने जनाइएको छ ।
प्रतियोगिताको पहिलो दिन कुल १८ वटा खेलहरु भए । प्रतियोगिता सिनियर व्याइज, जुनियर व्याइज, सिनियर गल्र्स र जुनियर गल्र्स गरी चार विधामा छन् । प्रतियोगितामा काठमाडौं उपत्यकाका विभिन्न २७ वटा स्कुलहरुबाट ४४ वटा टिमहरु गरी कुल ५२८ जना विद्यार्थी सहभागी हुनेछन् । 
फ्रेण्डसिप फस्ट, कम्युटिशन सेकेण्ड (मित्रता पहिलो, प्रतिस्पर्धा दोश्रो) भन्ने मुल ध्येयका साथ प्रतियोगिता भएको हो । प्रतियोगिताको उदघाटन स्कुल रहेको भक्तपुर नगरपालिका वडा नं २ व्यासीका वडा अध्यक्ष हरिप्रसाद बासुकलाले एक समारोहवीच गरे । प्रतियोगिताका मुल प्रशिक्षकलाई प्रमुख अतिथिबाट बास्केटबल हस्तान्तरण गरी प्रतियोगिताको उदघाटन गरिएको थियो । 
प्रतियोगिताको उदघाटन समारोहमा आयोजक स्कुलका संस्थापक प्रिन्सिपल भक्त राजभण्डारीले मित्रता पहिलो, प्रतिस्पर्धा दोश्रो भन्ने मुल नाराका साथ २०७२ सालदेखि प्रत्येक वर्ष प्रतियोगिता गर्दै आएको जानकारी गराए । तर कोरोनाका कारण दुई वर्ष ग्याप भएको उनले जनाए । 
स्कुल व्यवस्थापन समितिका अध्यक्ष रामगोपाल कर्माचार्यले खेलकुद क्षेत्रलाई अगाडि वढाउन केही सहयोग होस् भन्ने उद्देश्यका साथ प्रतियोगिता गर्दै आएको जानकारी गराए ।