"मिशन – मातृभूमि नेपाल" : विदेशमा रहेका नेपाली युवाका लागि एक महिनाको अनलाइन तालिम

देशप्रेमी, नैतिकवान, अनुशासित, राष्ट्रिय चेतना सम्पन्न र अन्तर्राष्ट्रिय स्तरमा सक्षम नेपाली युवा पुस्ता निर्माण गर्ने उद्देश्यका साथ साउथवेस्टर्न स्कुल अफ म्यानेजमेन्ट एन्ड टेक्नोलोजी, युनिभर्सिटी अफ थ्री जेनेरेसन्स र ईगल थिङ्क ट्याङ्कको संयुक्त आयोजनामा “मिशन – मातृभूमि नेपाल” नामक विशेष एक महिनाको अनलाइन तालिम सञ्चालन हुने भएको छ। आगामी २०८२ भदौ १५ गते (१ सेप्टेम्बर २०२५) देखि सुरु हुने यो कार्यक्रम विशेषगरी विदेशमा बसोबास गर्ने नेपाली विद्यार्थी तथा युवालाई लक्षित गरिएको हो। तालिमको उद्देश्य सहभागीहरूको मातृभूमिसँगको सम्बन्धलाई अझ गहिरो बनाउनुका साथै प्रभावकारी नेतृत्व र सार्थक राष्ट्रिय सेवाका लागि आवश्यक ज्ञान, सीप र मूल्यहरू प्रदान गर्नु रहेको आयोजकहरूले जनाएका छन्।
सुकिर्ती पदक प्राप्त पूर्व सैनिक कूटनीतिज्ञ तथा CADET CAPSULE पुस्तकका लेखक ब्रिगेडियर जनरल (अवकाश प्राप्त) रामचन्द्र खत्रीको योजनामा सञ्चालन हुने यस तालिमलाई उनले यसअघि नेपालमा सफलतापूर्वक सम्पन्न “कर्तव्यपथ” अभियानबाट प्रेरित भई विश्वभर रहेका नेपाली युवाका आवश्यकता अनुरूप अनलाइन माध्यममार्फत रूपान्तरण गरिएको बताए।
कार्यक्रम अन्तर्गत नेपालसम्बन्धी २५ फरक विषयमा २५ अन्तरक्रियात्मक सत्र हुने छन्। प्रत्येक सत्र ९० मिनेटको हुनेछ र हरेक बिहान सञ्चालन गरिनेछ। पाठ्यक्रम शासन र राष्ट्रिय सुरक्षा, कूटनीति र अन्तर्राष्ट्रिय सम्बन्ध, पर्यटन र राष्ट्रिय पहिचान प्रवर्द्धन, राष्ट्रिय हित र नीतिगत चेतना, संस्कृति र सम्पदा, नैतिकता र आचार नेतृत्व तथा नेतृत्व विकासजस्ता सात मुख्य स्तम्भमा आधारित रहनेछ।
सहभागिताका लागि न्यूनतम शैक्षिक योग्यता माध्यमिक शिक्षा परीक्षा (SEE) वा सो सरह तोकिएको छ। शुल्क स्वेच्छिक योगदान हुनेछ जसले आर्थिक कारणले कोही पनि वञ्चित नहोस् भन्ने सुनिश्चित गर्नेछ। कार्यक्रम २०८२ भदौ १५ देखि असोज २८ (१ सेप्टेम्बर–१४ अक्टोबर २०२५) सम्म Zoom मार्फत सञ्चालन हुनेछ। दर्ताका लागि WhatsApp नम्बर ‪+९७७ ९८४१२६२३४८‬ वा इमेल eaglethinktank@gmail.com / rckbina@gmail.com मार्फत सम्पर्क गर्न सकिनेछ।
तालिम सम्पन्न गरेपछि सहभागीहरूले नेपालको शासन, सुरक्षा र कूटनीतिक संरचनाबारे गहिरो ज्ञान हासिल गर्ने, नैतिक आधार र राष्ट्रिय कर्तव्यबोध सुदृढ गर्ने, नेतृत्व तथा सञ्चार सीपलाई नेपाली र अन्तर्राष्ट्रिय दुवै सन्दर्भमा प्रयोग गर्न सक्षम हुने र नेपालको पर्यटन, संस्कृति तथा राष्ट्रिय हित प्रवर्द्धनमा सक्रिय योगदान पुर्‍याउने अपेक्षा गरिएको छ। तालिमका सत्रहरू कूटनीतिज्ञ, वरिष्ठ सरकारी अधिकारी, शिक्षाविद्, विषयवस्तु विज्ञ, ख्यातिप्राप्त समाजसेवी तथा विद्वानहरूद्वारा सञ्चालन गरिनेछन्। प्रशिक्षकमध्ये धेरैजना संयुक्त राष्ट्रसंघीय शान्ति स्थापना मिसनका अनुभवी तथा राष्ट्रिय नीतिनिर्माण र अन्तर्राष्ट्रिय प्रतिनिधित्वमा संलग्न भइसकेका व्यक्तित्वहरू हुने आयोजकहरूले बताएका छन्।