साहित्यकार उपचार कोषको घोषणा

काठमाडौँ । कपन बानेश्वर (कबा) साहित्यिक साप्ताहिक पत्रिकाको बाह्रौं वार्षिकोत्सवको अवसर पारेर यहि साउन ४ गते कबा साहित्यकार उपचार कोषको घोषणा सङ्गै विभिन्न व्यक्तित्वहरुलाई पुरस्कृत गरिने भएको छ । नेपालको पहिलो र एक मात्र साहित्यिक साप्ताहिक पत्रिकाको रुपमा लोकप्रियता हाँसिल गरेको पत्रिका २०६९ सालदेखि निरन्तर प्रकाशित हुंदै आइरहेको छ । साहित्यकार गङ्गा पौडेल संयोजक र साहित्यकारहरु दुर्गा अधिकारी भमरकोटे, गङ्गा खड्का सदस्य रहेको प्रतिभा चयन समितिले असार २ गते आइतबार प्रतिभा चयन गरेको थियो । यो वर्ष साहित्यसेवीहरु वसन्त रिजाल, गणेश मिश्र र रुपान्जली चालिसे कबा विशिष्ट सम्मानबाट सम्मानित हुने भएका छन् । यसैगरी साहित्यिक पत्रकार जयराम बिडारी र महेन्द्र चालिसे कबा साहित्यिक पत्रकारिता पुरस्कार २०८० बाट पुरस्कृत हुने छन् ।  यसरी नै २०८० को रचनाहरु मध्ये नालाङ्ग कबा रचना पुरस्कार (पुरुष) डा. छायादत्त न्यौपाने र पुष्कर प्रसाद श्यामा खरेल स्मृति कबा रचना पुरस्कार (महिला) गङ्गा आचार्य सापकोटालाई प्रदान गरिने भएको छ । यता गङ्गा लिगल कबा रचना पुरस्कार (मोफसल) राम आचार्य पुष्पप्रेमी झापा, भमरकोटे कबा सुसेली पुरस्कार सुशील आचार्य र हेमगङ्गा कबा रचना पुरस्कार (बाल) बाल विकास बोर्डिङ हाइ स्कुल बुढानिलकण्ठ कक्षा १० कि अनिता तामाङलाई अर्पण गरिने भएको छ । सोही कार्यक्रममा कबा साहित्यकार उपचार कोषको घोषणा गरिने कोषका कोषाध्यक्ष साहित्यकार त्रिलोचन आचार्यले जानकारी दिएका छन् ।