चाँगुया विकासय् पत्रकार विषयय् अन्तक्र्रिया

चाँगुनारायण नगरपालिकाया विकासय् पत्रकार जगतया भूमिकाय् विषयय् होटेल स्वीटहोमय् अन्तक्र्रिया ज्याझ्वः जुल । नेपाल पत्रकार महासंघ ख्वप जिल्लाया पुलांम्ह अध्यक्ष पुष्करराज बुढाथोकीया संयोजकत्वय् उगु अन्तक्र्रिया ज्याझ्वः जूगु खः ।
ज्याझ्वलय् चाँगुनारायण नगरपालिकाया मेयर जीवन खत्रीं महादेव खोला बहुआयोमिक परियोजनायात थःपिसं मू प्राथमिकताय् तयाः ज्या न्ह्याकाच्वनागु खँ स्पष्ट यानादिसें आः नागरिकतय् अपेक्षा कथंया ज्याझ्वः तयार यानाः थःपिं न्ह्याः वनाच्वनागु खँ कनादिल । प्रमुख प्रशासकीय अधिकृत हरिप्रसाद चापागाईनं पंचायती कालय् खुल्ला अर्थनीति मजूगु कारणं पारदर्शिताया सम्भावना हे मदुगु कनादिसें आः पत्रकारतय्त नगरपालिकाया फुक्कं गतिविधिया जनाकारी कायेत खुल्ला जूगु स्पष्ट यानादिल ।
चाँगुनारायण नगरपालिकाया प्रवक्ता व ८ वडा अध्यक्ष जनक खत्रीं लसकुस न्वचु न्यंका न्ह्याकूगु अन्तक्र्रिया ज्याझ्वलय् थीथी सञ्चारकर्मिं न्यंगु न््ह्यसःया लिसः बियेगु झ्वलय् प्रमुख प्रशासकीय अधिकृत हरिप्रसाद चापागाईंनं चाँगुनारायण देगः व थीथी कथंया भूक्षयपाखें प्रभावित क्षेत्रयात सुरक्षित यायेत अब्यवस्थित बस्ती विकासयात निषेध यायेगु तकया ज्याखं थःपिसं सुरु याये धुनागु कनादिल । ज्याझ्वलय् पत्रकारतय्सं प्रवक्तापाखें व प्रमुख प्रशासकीय अधिकृतपाखें पत्रकारतय्गु फोन हे रिसिभ मजूगु गुनासो तयादीगु खः । उकियात कयाः मेयर, प्रवक्ता व प्रमुख प्रशासकीय अधिकृतं तकं सार्वजनिक रुपं माफी फ्वनाः आवलें अथे मयायेगु बचं बियादिल ।