श्रावण २ या भ्रष्टाचार बिराधी दिवस

कृष्ण प्रजापति
दँय् दसं ख्वपय् असार १९ व श्रावण २ गते भ्रष्टाचार बिरोधी दिवस हनेगु याः । थ्व ख्वपया किसान कार्यकर्तातय्सं किसान बिद्रोह यानाः थःपिनि जग्गा जमीन थःगु यायेत संघर्षया सुरुवात याःगु दिं खः । अथेहे ५० ति दँ न्ह्यः जूगु ख्वपया थ्व किसान बिद्रोह आः तक नं थनया किसानतय्सं अतिकं बांलाक लुमंकाच्वंगु दनि । खँ २०२५ सालया खः । अब्ले किसानतय्त सहुलियत दरं साः हया बियेगु, कृषि सामग्री अःपुक उपलब्ध याकेगु व किटनाशक वास, न्हू न्हूगु वा पुसा नापं थीथी कथंया कृषि सामग्रीया लागिं ल्हापं म्हूगु खः । अब्ले ध्यबा कायेगु स्वया नं किसानतय्के वा कायेगु उचित तायेकाः छपुचः किसान नेतातय्सं वा मुंकाः अज्याःगु सामग्री न्यायेत संस्था छगू नीस्वन । नवदुर्गा बहुमुखी सहकारी संस्थाया नामं नीस्वंगु उगु संस्थाया ज्याकू हाल ख्वप नगरपालिका ३ वडाय् लाःगु बंशगोपाल लागाय् तयातःगु खः । उगु संस्थां किसान जनतायाके छगू रोपनी जग्गाया स्वमना, खुमना व गुमनाया ल्याखं वा उठे याःगु खः । अथे धइगु बुँ थुवायाके खुमना, बुँ यानाच्वंम्ह ज्यापु जुल धाःसा वयाके स्वमना व बुँथुवा नं थः बुँ यानाच्वंम्ह कृषक नं थः जुल धाःसा उम्ह किसानयाके रोपनीं गुमना वा उठे याःगु खः ।
    पंचायती ब्यवस्था लागू जुयाः भूमि सुधार लागू यायेवं किसानतय्सं बछि जग्गा थःम्हेसियां थःगु नामय् हयेदइगु ब्यवस्था अब्ले कायम जूगु खः । उकियात ख्वपय् अखिल नेपाल किसान संघं सकारात्मक रुपं स्वीकार यानाः किसानतय् खँल्हय् खँल्हय् वनाः वा लयाहयेगु, वा दुकायेगु नापनापं वा गुम्हेसिनं पिउगु खः, वयागु छेँय् तक वा थ्यंकाः बियेगु अभियान ख्वपय् न्हापांखुसि सुरु जूगु खः । थज्याःगु क्रान्तिकारी किसान आन्दोलन लिपा लिपा बारा, पर्सा व रोटहतय् नं सुरु जूगु खःसां अनया जमीन्दारतय् कारणं थ्व अभियान पूवंके मबिल । तर ख्वपय् धाःसा किसान बिद्रोहया अग्रजतय्सं मदिकं उकियात चांन्हिं फलोअप यायां वनेवं आः बछि जग्गा किसानतय्सं नामसारी यानाः थःपिनि याये दयाच्वंगु दु । थ्व अब्ले जूगु किसान संघर्षया लिच्वः खः । देय्न्यंकं ८५ प्रतिशत किसानतय्सं थःम्हेसियां यानाच्वंगु जग्गा जमीनय् थःगु अधिकार चूलाके फयाच्वंगु मदुनि । तर ख्वप छगू जक अज्याःगु जिल्ला खः, गन ८५ प्रतिशत किसानतय्गु मोहियानी हक कायम जूगु दु । ख्वपया थ्व नमूना मेमेगु जिल्लाय् नं कायम जूगु खःसा आः हरुवा, चरुवा, कमैया थेंज्याःगु जमिन्दारी प्रथा अन्त्य जुइधुंकल जुइ ।
    २०२५ सालं जब नवदुर्गा बहुमुखी सहकारी संस्था नीस्वनाः थुकथं स्वमना, खुमना व गुमना वा मुंकाः तःधंगु धनराशी छथाय् हल । अब्ले गुलिं संस्थाया संस्थापकतय्सं मनय् लोभी भावना तयाहल । उकिं उगु वा मियाः दां यानालिं सञ्चालकतय्सं उकियात चितवन वनाः तू ब्यापार यानाः लब नयेगु ज्या याना हल । माः बलय् साः हयेत दां चूलाके मफुत । अथेनं जनतायात बिया तःगु बचन धाःसा उमिसं पूवंकेत बाध्य जुल । इलय् साः हयाः किसानतय्गु समस्या समाधान याये धकाः थुकथं किसान अग्रजत जानाः नवदुर्गा बहुमुखी सहकारी संस्था नीस्वंगु खः । तर थथे मजुल । इलय् साः हयेगु ज्या ध्यबा फुक्कं कनि, मुस्या, तू हयेगु ज्याय् फ्यानातःगु तत्काल ध्यबाय् परिणत मजुल । थज्याःगु इलय् संस्था दुनेया गुलिं नेतात सञ्चालकतय् बिरोधय् बिद्रोही जुयाः पिहांवल । थःपिनि एकलौटी यायेत स्वयाच्वंगु सिवं उमिसं झन त्वमतल । थ्वहे झ्वलय् २०२५ साल श्रावण २ गते नवदुर्गा बहुमुखी सहकारी संस्थाया चुनावया दिं क्वछित ।
    न्हूपिं सञ्चालकत ल्ययेगु लागिं उकुन्हु सुथय् ७ बजेनिसें हे ई बियाः स्वमना, खुमना व गुमना वा मुंकाः साधारण सदस्य जूपिंत लायकू लागाय् ब्वनातःगु खः । सलंसः किसानत थःपिनि बालीया सदुपयोग याइपिं न्हूपिं सञ्चालकत ल्ययेगु लागिं उपस्थित नं जुल । तर लाय्कू लागाय् छखे उद्घाटन मन्तब्य जुया च्वँच्वं उखे फसि देगःया लिउने सुलाः सुलाः पुलांपिं छपुचः सञ्चालकतय्सं धाःसा थौं नवदुर्गा बहुमुखी सहकारी संस्थाया तःजिक तःमुँज्या जुल । उकि थ्व थ्व मनूत साधारण सभां न्हूगु ज्यासना पुचः नीस्वन धकाः माइन्यूड च्वयाः किसानतय्त सही याका जूगु खनेदत । छखे मञ्च ग्वयाः तःजिक उलेज्या जुयाच्वंगु दु, अन भुलुभुलु वा वयेक नं मनूत थःपिसं मुंका तयागु फसलया उपलब्धी कायेत पियाच्वंगु दु । तर दुनं दुनं भ्रष्टाचारी सञ्चालकतय्सं सुनानं मसिइक देगः लिउने माइन्यूडय् सोझा सीधा किसानतय्त सही याकू याकूं थःपिं त्यागु घोषणा यायेत्यंगु दु ।
    खुल्ला रुपं चुनाव यानाः जुइमाःगु घोषणा उकथं छपुचः मनूत जानाः दुनं दुनं पूवंकेत्यंगु खँ सीवं उकिया न्ह्यलुवा कृष्णभक्त चौगुठी मंगलेचा जूगु सिइका वयात ज्वना हल । दरवार स्वाक्वयरय् दयेकातःगु उद्घाटन मञ्चय् थनेहल । माइन्यूड नं किसान कार्यकर्तातय्सं लुटे याना यंकल । संस्था दुनेया पदाधिकारीतय् दथुइ घमासान युद्धया वातावरण ब्वलन । माफी फ्वनेत इनाप यासें मञ्च तकं कब्जाय् कयाः बिद्रोही पाइनलं अन बचाधंगु सभा नं यात । तर थ्वहे दथुइ प्रहरी प्रशासनं उम्ह मंगलेचायात ज्वना यनेवं वयात सजायँ बिइगु आश्वासन दयेवं किसानत शान्त जूवन । थ्व न्यय्दँ पुलांगु किसान संघर्षयात लुमंकाः आः नं जनतायात ध्वँलाये त्यंगु दिं धकाः ख्वपय् श्रावण २ गतेयात भ्रष्टाचार बिरोधी दिवस कथं कयातःगु दु । अथेहे २०२६ सालं उगु सहकारी संस्थां साः हया बी धाधां साः हया मबिल । किसानतय् बुँइबुँइ लखं जायाच्वने धुंकल । अझं साः थ्यंके महल ।
    थौं वइला कन्हय् वइला जुजुं साः मवल । दुनं दुनं साः हया नं थःथः मनूतय्त जक साः बियाछ्ःगु खनेदत । मनूत आक्रोशित जूवन । असार १९ गते साः बियेगु धकाः संस्थां सुचं जारी यात । अब्ले तक किसानत फुक्कं थः थःगु छेँय् नं म्हेचा छपा छपा ज्वनाः लाइन च्वनेत वन । तर अन साः मदु धइगु सुचं तिकाः सञ्चालकत सुलाच्वन । तू ब्यापार यायेत ध्यबा दइगु अले किसानतय्त मदयेकं मजिउगु साः हयेत ध्यबा मदइगु धकाः मालेकुले यानाः किसान नेता धाःम्ह मंगलेचायात ज्वनाः अखतं त्वपुलीं पुइकाः हाकः पात ख्वप देय् चाःहिकल । थ्व दिंयात नं ख्वपय् भ्रष्टाचार बिरोधी दिवस कथं हनेगु याः ।