भाषा आयोगया सिफारिस कार्यान्वयनबारे अन्तक्र्रिया

थिमि । भाषा आयोगया सिफारिस व कार्यान्वयन सवालय् नेवाः देय् दबू ख्वप जिल्ला लागाया ग्वसालय् सनिवाः अन्तक्र्रिया ज्याझ्वः जुल । जनप्रेमि क्याम्पसय् जूगु अन्तक्र्रिया ज्याझ्वलय् भाषा आयोगया सचिव जयराम अधिकारीं सरकारी ज्याखँया भाषाया रुपं नेपालभाषा नापं तामांग भाषायात स्वनिगः दुनेया फुक्कं निकायय् लागू जुइकथं थःपिसं सिफारिस याये धुंगु खँ कनादिल । वय्कलं प्रदेशयात मातृभाषापाखें शिक्षा बियेगु, भाषाया अध्ययन व प्रविधिया विकास यानाः भाषा संरक्षणया लागिं ज्या यायेगु आयोगं सिफारिस याःगु कनादिल ।
नेवाः देय् दबू बागमती प्रदेशया नायः श्रीकृष्ण महर्जनं स्वनिगः दुने तामांग व नेपालभाषायात सरकारी ज्याखंया भाषा कथं प्रयोग यायेफइगु धइकथं भाषा आगोगं सिफारिस याये धुंकूगु खँ कनादिल । वय्कलं आःया ई धइगु आयोगं सिफारिस याये धुंकूगु चीजयात जक ब्यवहारय् लागू याना वने फत धाःसा थ्व तःधंगु हे उपलब्धी जुइगु विश्वास प्वंकादिल । उगु ज्याझ्वलय् नेपाल तामांग घेदुंगया छ्याञ्जे हरिश्चन्द्र लामां समाज परिवर्तनया लागिं छुं नं कथंया भाषा लोप जुइके बिइ मजिउगु खँ कनादिल । ज्याझ्वलय् नेवाः देय् दबूया न्वकू उमेश स्थापित, नेवाः देय् दबू स्वनिगः विशेष प्रदेशया न्वकू सुमन श्रेष्ठ व प्रदेश सांसद प्रतिमा श्रेष्ठपिसं नं थः थःगु नुगः खँ कनादीगु खः ।