सूचनाया हकबारे अन्तक्र्रिया

ख्वप । सूचनाया हक व सकारात्मक सोच विषय पत्रकारतय् दथुइ अन्तक्र्रिया ज्याझ्वः जुल । राष्टिय सञ्चार केन्द्र नेपालया ग्वसालय् राधेराधेय् च्वंगु थाइ भवनय् बान्हिया उगु अन्तक्र्रिया ज्याझ्वः जूगु खः । ख्वपया थीथी पत्रिकाया पत्रकारतय् सहभागीताय् जूगु अन्तक्र्रिया ज्याझ्वलय् सूचना आयोगया पुलांम्ह आयुक्त किरण पोखलेरं पंचायती कालय् स्वीदँ दुने जुइ मफुगु जनमुखी ज्याझ्वःत गणतन्त्र वयालिं जूगु खँ कनादिसें जनतां महसुस याये फइकथं परिवर्तन यायेमाःगु खँ कनादिल ।
मेम्ह प्रशिक्षक रमन भट्टराईनं कुर्सिइ च्वने मसःगु कारणं जक विश्व न्यंकं निगू अर्व मनूत न्हिया न्हिथं बिरामी जुयाच्वंगु खँ कुलादिसें सकारात्मक सोच मनूतय् बोलीपाखे पिज्वइगु खँ कनादिल । सूर्यविनायक नगरपालिकाया ग्वाहालिं याःगु उगु ज्याझ्वलय् सूर्यविनायक नगरपालिकाया मेयर बासुदेव थापां सकारात्मक सोचयात ब्यवहारय् लागू यायेमाःगु खँ कनादिसें छुं कायेगु व छुं बियेगु धइगु मानवीय धर्म हे जूगु खँ कनादिल । राष्टिय सञ्चार केन्द्र नेपालया अध्यक्ष पेसर आचार्यया सभापतित्वय् जूगु उगु ज्याझ्वलय् सार्वभौमिकताय् खलल वइगु, थीथी अदालतय् छानविनय् लानाच्वंगु व मेपिनि निजी जीवनया विषय बाहेक सूचना प्राप्त यायेगु हक सकल नागरिकयाके दइगु खँया जानकारी बिउगु खः । पुष्कर बुढाथोकीं लसकुस याना न्ह्याकूगु ज्याझ्वः हेमराज ढकालं न्ह्याकादीगु खः ।