लान्चा फल्चा एकता समाजपाखें मेयर खत्रीयात हन

ख्वपया चाँगुनारायण नगरपालिकाय् आः नकतिनि त्याकुम्ह मेयर जीवन खत्रीयात लान्चा फल्चा एकता समाजपाखें हनेज्या यात । थनया तःपाः दम्फ्वय् च्वंगु नखात्या नेवाः किचेनय् वंगु आइतवाः वय्कःयात खादां क्वखायेक हना पौ लःल्हासें हनेज्या याःगु खः । नेपाली कांग्रेसपाखें अत्यधीक बहुमतं त्याकुम्ह मेयर खत्री स्वघौ लिपा जक ज्याझ्वः जुइथाय् थ्यंकूगु खःसा वयां न्ह्यः समाजका अध्यक्ष रामकृष्ण छुस्याबागःयात सभापति ल्ययाः अन थीथी कथंया म्ये हालेगु, विचाः प्वंकेगु नाप नापं ख्यालिन्हिलि ज्याझ्वः नं जूगु खः ।
ज्याझ्वलय् मेयर जीवन खत्रीं थः सम्मानीत जुयागु अर्थ त्वनेगु लः, महादेव खोला बहुउद्देश्यीय परियोजना याकनं कार्यान्वयन याकेगु लागिं खः धयादिसें वर्षाद्या मुनीगु लखं नं आपालं समस्याया समाधान यायेफइगु खँ कनादिल । उगु ज्याझ्वलय् न्हुछेँभक्त कवां, दिनेश खत्री, ओमप्रसाद कार्की (क्याप्टेन बा), शान्तिराम दवाडी, कृष्ण प्रजापति लगायतं थः थःगु नुगः खँ तयादीगु खः । गायिका अमृता ढकालं म्ये न्यंकादीगु ज्याझ्वलय् पत्रकार कृष्ण प्रजापतिं लांचा फल्चाया नां व उकिया उपाद्ययता बारे ध्वाथुइकेगु ज्या नं जूगु खः । प्रजापति समुदायं हाकुचा क्वबिया हइगु थासय् दयेकूगु उगु फल्चाय् च्वनाः लांचा ल्ययेगु व वांछवइगुलिं उगु फल्चाया नां लांचा फल्चा कथं नामं नांजाःगु खःसा लिपा भत्क्यापाटी धकाः अप्रभंश याःगु खः ।