नेमकिपां क्लिन स्वीप याःगुया रहस्य

कृष्ण प्रजापति
नेपाल मजदुर किसान पार्टीं थुगुसी ख्वपय् हाकनं छक्वः स्थानीय निकायया निर्वाचनय् थःगु लागाय् सुयातं हे छगू तकं सीट तकं मत्वतुसें क्लीन स्वीप याःगु दु । नेपालय् गुगुं नं स्थानीय निकायय् मजू कथं मेगु विपक्षी दलया सुयातं छगू सीट तकं मत्वतुसें शुद्ध याना मेपिंत पुयेगु वा थःपिसं त्याके फुगुया रहश्य छु खः ? थ्व चर्चाया विषय जुयाच्वंगु दु । गथे पाकिस्तानया राष्टपतिं निर्वाचयन् थःगु शतप्रतिशत मत हयाः संसारयात हे आश्चर्य चकित याना बिउगु खः । अथेहे २०७४ सालया स्थानीय निकायया चुनावय् थें थुगुसी नं महत्वपूर्ण पक्ष कथं ख्वप नगरपालिकाय् शतप्रतिशत त्याकाः मेमेगु राजनीतिक दलतय्त वोर्डय् दुत हे मकायेगु ज्या नेमकिपां यात । थ्व नेमकिपाया इतिहासय् गौरबशाली घटना खः । न्यादँ न्ह्यव नीदँ तक चुनाव हे मजूगु कारणं थःपिनि हैसियत प्रति नेमकिपायात नं आपालं आशंका ला जुया हे च्वंगु खः । अथे खःसां नेमकिपां थःपिनि बहादुरी क्यना हे त्वतल । थ्व ज्या सम्भव जूगुया रहश्य छु खः ? थ्व छक्वः दुवालेमाःगु विषय खनेदु । संसारया छगू सांस्कृतिक ल्याखं नमूना शहर जुयाच्वंगु ख्वप नगरय् थथे नेमकिपां जक त्याकेफुगुया गुह्य रहश्य धाःसा आः तकं आपालं मनूतय्सं मसिउगु नं जुइफु ।
    नेमकिपा २०३१ सालय् जक नीस्वंगु पार्टी खः । उब्ले थुगु पार्टीयात नेपाल मजदुर किसान संगठन धाइ । पार्टी कथं नीस्वंगु लिपा जक खःसां थुकिं किसान संघर्ष यायेगु, बाली काट्ने आन्दोलन यायेगु, भर्पाई आन्दोलन यानाः मोहीयानी हकया रक्षा यायेगु नापनापं साँधे धपाउने आन्दोलन धकाः बाली स्यंका नइपिं सा व दोंसातय्त नगरकोट पारी देउपुरय् थ्यंक लिना छ्वयेगु ज्या थुगु पार्टीया हे न्ह्यलुवातय्सं याना क्यंगु खः । बहुमत किसान जनता दुगु थुगु नगरय् किसानतय् पक्षय् यानाच्वंगु थज्याःगु ज्यां नेमकिपा जनताया मिखाया नानिचा थें हे तसकं प्रिय । अले जमीन्दार व बुंथुपिसं धाःसा अज्याःगु ज्या गब्लें हे मयेकू । अथे जुयाः साँधे धपाउने आन्दोलनया झ्वलय् ख्वपया छगू त्वाःया किसानयात गुण्डात हे छ्यलाः सितपात वंक दाःगु इतिहास दु । उकिया प्रतिकार स्वरुप त्वाः त्वाःया किसान जनता दना वयाः जमीन्दार बिरोधी आन्दोलन न्ह्याका यंकल ।
    २०२१ सालय् सरकारं भूमि सुधार लागू यात । थःपिंत कम्युनिष्ट धाइपिं गुलिं शक्तिं अब्ले उगु भूमिसुधारया बिरोध यात । उमिसं तर्कपूर्ण बिरोध याःगु मखुसें जुजुं लागु याःगु वा पंचायती ब्यवस्थां लागू याःगु भूमि सुधार योजना जूगुलिं जक बिरोध याःगु खः । तर अब्ले नेमकिपाया अग्रज ब्यक्तितय्सं धाःसा थुकियात किसान जनताया हीतया लागिं खःकथं उपयोग यायेगु नीति काल । थ्वहे नीतिया कारणं ख्वप छगु हे जक ८५ प्रतिशत मोहीयानी हक कायम जूगु जिल्ला जूवंगु दु । देय् न्यंकंया ८५ प्रतिशत किसान जनता भूमिहीन जुयाच्वंगु इलय् नं ख्वपय् थःपिनि जग्गा बच्छि जूसां थःपिंत तुं दइगु नियम लागू जुल । पिने अथे मजू । थ्व ख्वपय् किसान आन्दोलन जूगुया लिच्वः खः । थ्व अभियान बारा, पर्सा व रौटहत जिल्लाय् नं प्रयोग कथं नेमकिपां याःगु खः । तर सफल धाःसा मजू ।
    २०२५ सालय् भ्रष्टाचार विरोधी अभियान ख्वपय् न्हापांखुसि जुल । छम्ह भ्रष्ट पंचयात अखतं त्वपुलिं पुइकाः देय् चाःहिकेगु ज्याय् अब्लेया किसान न्ह्यलुवात न्ह्यःने लाःगु खः । २०२६ सालय् नं थथे हे इलय् किसानतय्त साः, भिंगु पुसा व वासः हया बी धयाः ज्या मयागु कारणं नवदुर्गा बहुउद्देश्यीय सहकारी संस्थाया पदाधिकारीतय् विरुद्ध जनसंघर्ष जुल । किसान जनता सचेत व संगठित जूगु थाय् ख्वप हे न्हापांगु खः । अले थन हे २०३१ सालय् नेपाल मजदुर किसान संगठन नीस्वना दैलेख, जुम्ला, हुम्ला, मुगु, कालिकोट थेंज्याःगु दुर्गम जिल्लाय् नं संगठन यायेगु ज्या जुल । आः नं दैलेख व जुम्ला थेंज्याःगु थासय् एमालेय् वनेधुंकूपिसं थःपिं न्हापा ला नेमकिपाया हे कार्यकर्ता खः धायेगु याः । २०४५ सालय् भक्तपुर काण्ड जुइवं थ्व पार्टी संकटय् लाःवंगु खः । पार्टी अब्ले मेमेगु राजनीतिक दलया नं तारोया केन्द्र जूवन । ख्वपय् नेमकिसं नीस्वने धुंकाः २०३९ सालय् जूगु स्थानीय निकायया चुनावय् मेयर उपमेयर नापं अधिकांश वडाय् नेमकिपा त्याकल । उगु इलय् किसान नेता ज्ञानबहादुर न्याइच्याई हे प्रधानपंच जूगु खः । अब्ले ख्वपय् ४ कक्षा तक निःशुल्क शिक्षा लागू यानाबिल ।
    २०४४ सालय् आशाकाजी बासुकला प्रधानपंच त्याकूगु इलय् ला ७ कक्षा तक निःशुल्क यानाबिल । वनंलि १० कक्षा तकं निःशुल्क यात । लिपा २०५४ सालय् नीस्वंगु प्रेम सुवालया नगरपालिका बोर्डं ला प्लस टु थःपिसं हे चाले याना यंकल । थुगु पार्टीं सरसफाई लागाय् नं ज्यापुतय्त आह्वान यानाः चमत्कारपूर्ण हे ज्या याना क्यंगु दु । ज्ञानबहादुर न्याइच्याईया पालाय् सफाई आन्दोलन यानाः छगू जातिं जक यानाच्वंगु सफाई ज्यायात थ्व मर्यादित ज्या हे खः धइगु स्थापित यात । पंचायतया नामय् नगरपंचायतं पिथनीगु थःपिनि लुमन्ति पतिइ माक्र्स, ऐंगेल्स, लेनिन, स्टालिन व माओया रंगीन तस्वीर न्हापांगु कभर पेजय् हे छापे यानाः पंचायती ब्यवस्थायात हाँक बियेगु नं ज्या याना क्यन । थज्याःगु प्रबृत्तिं मयःपिनि दथुइ नेमकिपा तसकं मयः । तर नेमकिपां ज्या धाःसा जनताया लागिं हे यानाच्वन ।
    थज्याःगु थीथी कारणं ख्वपया जनताया दथुइ नेमकिपा तसकं लोकं ह्वाः । अथे खःसां छगू निगु वडा जनआन्दोलन न्ह्यः व लिपा नं कांग्रेस व राप्रपां त्याकाच्वंगु खः । कर्णप्रसाद ह्योजू व गोबिन्द दुवाल राष्टिय पंचायत सदस्य त्याकूगु इलय् नं नेमकिपाया उम्मेदवार कथं त्यात । निगूगु शक्ति कथं जक पंचायत कायम जुइफत । गणेशबहादुर खत्री, मदनकृष्ण हाडा, भरत जंगम, कैलाशभक्त प्रधानांग थेंज्याःपिं पंचायती ब्यवस्थाया लागिं ज्या यानाच्वंपिं न्ह्याम्ह हे ब्यक्ति न्ह्यब्वसां आम चुनावय् नेमकिपां थंम्ह ब्यक्ति हे त्यानाच्वंगु खः । ख्वपय् पीदँ न्ह्यःनिसें सांस्कृतिक सम्पदा रक्षा यायेगु, सरसफाई अभियान, बाली काट्ने आन्दोलनय् सहभागी जुयाः किसान जनताया हीत यायेगु नापं शैक्षिक लागाय् नं उलि हे च्वन्ह्याःगु ज्या यानाः आः ख्वप विश्वविद्यालय तकं चले यायेगु तयारी यानाच्वंगु थेज्याःगु कारणं नं थुगुसी ख्वपय् नेमकिपां हाकनं छक्वः क्लीन स्वीप यायेफुगु खः ।