ईश्वर, देश व जनताया नामय् धाःगु थासय् देश व जनताया नामय् जक धयाः शपथ कयादील

ख्वप नगरपालिकाया नवनिर्वाचित नगर प्रमुख, उप्रमुख नापं फुक्कं वडाया वडा अध्यक्ष व वडा सदस्यतय्गु शपथ ग्रहण ज्याझ्वः शुक्रवाः ख्वप नगरपालिकाया प्रागणय् तःजिक क्वचाल । उगु समारोहय् प्रमुख निर्वाचन अधिकृत गोपालप्रसाद बास्तोलां नवनिर्वाचित मेयर सुनिल प्रजापतियात शपथ ग्रहण याकादीगु खः । वय्कलं शपथ कायेगु झ्वलय् ईश्वर, देश व जनताया नामय् धाःगु थासय् देश व जनताया नामय् जक धयाः शपथ कयादीगु खः । शपथ ग्रहण न्ह्यः फुक्कं वडा सदस्य, वडा अध्यक्ष नापं मेयर व उपमेयर त्याकुपिंत दसि पौ लःल्हाःगु खः । ज्याझ्वःया मूपाहां नेपाल मजदुर किसान पार्टीया सचिव सांसद प्रेम सुवालं जननिर्वाचित प्रतिनिधित दमकल व एम्बुलेन्स थें जनताया सेवाय् सदां समर्पित जुइमाःगु खँय् बः बियादिल ।
    बागमती प्रदेशया सांसद सुरेन्द्रराज गोसाईनं जनताया मन मनय् सुनानं हुइ मफइगु छाप दइकथं ज्या यायेत नवनिर्वाचित प्रतिनिधितय्त इनाप यानादिल । मूख्य निर्वाचन अधिकृत गोपालप्रसाद बास्तोलां दर्तानिसें मतगणना तकया फुक्कं प्रक्रिया अब्यवहारिक जुइधुंकूगु न्ह्यथनादिसें स्थानीय वडा व पालिकापाखें गन मतदान जुइगु खः अन हे प्रतिनिधित तयाः मतगणना याये फयेकेमाःगु सुझाब बियादिल । उगु ज्याझ्वलय् नव निर्वाचित मेयर सुनिल प्रजापतिं थःपिसं न्हापाया न्यादँ दुने याये मफयागु सांस्कृतिक नगर घोषणा यायेगु ज्या, आर्थिक कारण पूमवंगु थीथी ज्या व ख्वपयात सांस्कृतिक व नाचगानया राजधानी दयेकेगु नापं ज्ञान विज्ञानया केन्द्र दयेकेगु थःपिनि अभियान निरन्तर याना वनेगु बचन बियादिल ।
    ख्वप नगरपालिकाया प्रमुख प्रशासकीय अधिकृत कृष्ण गिरीया सभापतित्वय् जूगु शपथ ग्रहण ज्याझ्वलय् न्हापां मेयर सुनिल प्रजापतिं मूख्य निर्वाचन अधिकृत गोपालप्रसाद बास्तोलापाखें शपथ कयादीगु खःसा वयां लिपा सुनिल प्रजापतिपाखें उपमेयर, वडा अध्यक्षत व फुक्कं वडा सदस्यतय्त थःम्हं शपथ ग्रहण याकादीगु खः । उकुन्हु हे मेयर, उपमेयर नापं फुक्कं वडाया वडा अध्यक्षतय्सं वडा वडाय् वनाः थःपिनि कार्यभार सुरु याःगु दु । ज्याझ्वलय् ख्वपया प्रमुख जिल्ला अधिकारी रुद्रादेवी शर्मां भिन्तुना न्वचु बियादीगु खः ।