ख्वपय ४५ म्ह हे उम्मेरयात अत्याधीक बहुमत

नेपाल मजदुर किसान पार्टीया गढ धयातःगु ख्वप नगरय् निक्वःखुसि नेमकिपां क्लिनस्वीप याःगु दु । ४५ म्ह उम्मेदवार थंगु नेमकिपां फुक्कं ४५ म्ह हे उम्मेरयात अत्याधीक बहुमतं त्याकाः ख्वप नगरपालिकाया फुक्कं वोर्ड कब्जाय् कयाः क्लिनस्वीप याःगु खः । थ्वयां न्ह्यः २०७४ सालया निर्वाचनय् नं नीद्धः फरक मतं नेमकिपां ख्वप नगरय् क्लिनस्वीप याःगु खः । थुगुसी मेयरं नीखुद्धः फरक मत व उपमेयरं नीन्हय्द्धः फरक मतं ख्वपय् क्लिनस्वीप याःगु दु । नेमकिपाया मेयर उम्मेदवार सुनिल प्रजापति २९ हजार २५२ मत हयाः निर्वाचित जूगु इलय् वय्कःया निकटतम प्रतिश्पर्धी नेपाली कांग्रेसया राम कासुलां ३ हजार ३ सय ५२ मत काःगु खः । उपमेयर पदय् नेमकिपाया उम्मेदवार रजनी जोशी २९ हजार ७५९ मत हयाः बिजयी जूगु इलय् वय्कःया निकटतम प्रतिश्पर्धी नेकपा एमालेया रञ्जना खर्बुजां मुक्कं २ हजार ७८४ मत कयादीगु दु ।
वडा अध्यक्षत मध्ये दक्कलय् अप्वः प्यद्धः फरक मतं नेमकिपाया केन्द्रीय सदस्य व ९ वडाया पुलांम्ह वडा अध्यक्ष रविन्द्र ज्याख्वः निर्वाचित जुयादीगु दु । वय्कलं ४ हजार २ सय ७७ मत काःगु दु । नापं वय्कःया निकटतम प्रतिश्पर्धी नेकपा एमालेया अक्षयसुन्दर प्रजापति २६७ मत प्राप्त यानादीगु दु । फुक्कं वडाय् भारी मतं त्यायेवं नेमकिपां स्पष्ट बहुमत प्राप्त याःगु दु । अथेहे पीन्याम्हं नगरपालिका वोर्डय् न्हापाथें एकछत्र कायम याःगु दु । २०७४ सालय् नं देय् न्यंकं गनं मदुथें नेमकिपां ख्वप नगरपालिका छगू जक फुक्कं जनप्रतिनिधित थःपिं जक च्वनाः चले याःगु नगरपालिका जूगु खः । थुगुसी नं ख्वप नगर हाकनं छक्वः नेमकिपां एकछत्र कायम याःगु दु । निर्वाचित जनप्रतिनिधितय्त मंगलवाः ख्वप नगरय् चाःहिका तःजिक विजय र्याली याःगु दु ।