ख्वप नगरपालिकाय निरन्तर मेयर पदय उम्मेदवार

कृष्ण प्रजापति
ख्वप । ख्वपया पुलांम्ह कम्युनिष्ट नेता लखनदास बनेपालीया किजा परे जूम्ह भाषासेवी गोपालदास बनेपालीं आः तकं निरन्तर रुपं ख्वप नगरया मेयर जुयेगु म्हगसः मतंकनी । वय्कलं पंचायती कालय् सुरु यानादीगु उगु मेयरया मोह प्रजातान्त्रिक शासन पद्धति नापं थौं गणतन्त्र वयालिं तकं त्वतादीगु मदुनि । वय्कलं ७३ दँया बैसय् तकं मेयर उम्मेदवार जुयाः थः छक्वः ख्वप नगरपालिकाया मेयर जुया त्वतेगु म्हगसः खंकादीगु दु । वय्कलं २०३९ सालय् ज्ञानबहादुर न्याइच्याई मेयर त्याकूगु इलय् न्हापांखुसि मेयर पदय् तरवार चिं कयाः स्वतन्त्र रुपं दनादिल ।
देसय् बहुदलीय कार्यकाल वयेधुंक नं वय्कलं मेयरया लागिं दावी यानादिल । २०७४ सालय् सुनिल प्रजापति मेयर त्याकूगु इलय् नं वय्कः गोपालदास बनेपालीं बाकस चिं कयाः मेयर पदय् स्वतन्त्र उम्मेदवार कथं चुनावी मैदानय् खने दयेकाझाःगु खः । उगु हे सालय् जूगु संसदीय चुनावं ग्यास सिलिण्डर चिं कयाः वय्कः हाकनं स्वतन्त्र उम्मेदवार जुयादिल । थथे बारम्बार मेयर व सांसद पदय् स्वतन्त्र उम्मेदवार जुयादीम्ह गोपालदासं थुगुसीया बैशाख ३० गते जुइगु स्थानीय तहया निर्वाचनय् नेपाः राष्टिय पार्टीया चिं खड्ग चिं कयाः ख्वप नगरपालिकाया मेयर पदय् दनादीगु दु ।