वर्ग संघर्षया आवश्यकता

कृष्ण प्रजापति
स्थानीय निर्वाचन न्ह्यःने थ्यंक वये धुंकूगु दु । थीथी राजनीतिक पार्टीतय्सं थःपिनि मेयर, उपमेयर व वडाया अध्यक्ष थुम्ह मनू जुइ धइकथं प्रस्ताव नं याये धुंकूगु दु । झीथाय् राजनीतिक सोच बांलाक विकास जुइ मफुगु कारणं खाली चुनाव त्याकेगु व न्यादँ थः यत्थें शासक जुयाः नेपाली जनतायात शासन यायेगु लागिं जक चुनाबय् ब्वति कायेगु वा वर्ग संघर्षया खँपाखें तसकं तापाक च्वनेगु परिपातिया विकास जूवनाच्वंगु दु । वास्तवबय् जनतायात सचेत, संगठित व एकतावद्ध यानाः आमूल परिवर्तन यायेगु ताः तयाः निर्वाचनया इलय् जनताया दथुइ राजनीतिक पार्टीत वनेमाःगु खः । नेपाल कम्युनिष्ट पार्टी स्थापना जूगु इलय् व २०४८ सालय् एकीकृत माक्र्सवादी लेनिनवादी पार्टी एमाले स्थापना जूगु इलय् नं वर्ग संघर्षयात दीर्घकालीन कार्यक्रम कथं कायम यानातःगु दु । तर उखेपाखे राजनीतिक पार्टीतय्सं उलि ध्यान तःगु खनेमदु । जनयुद्ध यानाः शासन सत्ता कब्जा यायेत ताःलाःगु राजनीतिक पार्टी माओवादीं तकं वर्ग संघर्ष व जनतायात सचेत यायेगु दक्कलय् महत्वपूर्ण ज्यायात प्राथमिकता बिउगु मदु । उकिं नं वर्ग संघर्षया खँ झीथाय् अन ला थन ला मदयाच्वंगु खः ।
    राजनीतिक दल छगू सिद्धान्त, छगू दर्शन वा विचारधारायात क्वातुक ज्वनाः स्थापना याइगु खः । तर थन सत्ता प्राप्तिया लागिं छुं छगू खाका तयार मजूनिगु राजनीतिक पार्टीतय्सं नं निर्वाचनय् थःपिनि दलया प्रचार यायेगु, न्हूगु राजनीतिक दल स्थापना यायेगु व उकिया उद्देश्य व विचार छु धकाः न्यंसा स्पष्ट लिसः तकं बिइ मफुपिसं पार्टी दर्ता यानाः लिपा उगु पार्टी मेगु छुं तःधंगु पार्टीलिसें बिलय यायेगु ज्या यानाच्वंगु दु । छगू इलय् ७५ गू राजनीतिक दल दुगु व सदनय् तकं स्वीगु दल थ्यंगु झीगु देसय् आः निगू दर्जन तकं राजनीतिक पार्टीया नां न्यने मदुगु कारण नं थथे वर्खां वा वयेवं खने दइगु व निभाः त्वयेवं तना वनीगु म्हुकंचा थें जुयाच्वंगुलिं खः ।
    २०६२।६३ या जनआन्दोलन सफल जुइवं जाति, भाषा, धर्म व क्षेत्रया आधारय् राजनीतिक दल दर्ता याये मदइगु यानाबिउगु दु । थथे छगू जाति, छगू धर्म व क्षेत्रया आधारय् राजनीतिक पार्टीत दर्ता याना जुल धाःसा द्धन्द्ध अप्वयेफुगु सम्भावनायात ध्यानय् तयाः अज्याःगु प्रतिवन्ध तयाबिउगु खः । अथे खःसां निश्चित थासय् जक ज्या यायेगु कथं झीथाय् तराईवादी दल वा मधेशवादी दलतय्गु नां पिहां वयाच्वंगु दु । नेवाःवादी जुयाः ज्या याना वनेगु ताः तयाः नेपाः राष्टिय पार्टी गठन जूगु दु । जाति, भाषा व क्षेत्रया आधारय् राजनीतिक दल स्थापना यात धाःसा द्धन्द्ध अप्वइगु सम्भावना नं दयाच्वनी । राज्यपाखें फुक्कं भाषा, जाति व धर्मयात उत्थें खनाः उमिगु थःगु कला व संस्कृतियात समान ब्यवहार यात धाःसा झीगु राष्टिय गौरव च्वन्ह्यानाच्वनी । अले द्धन्द्ध नं सिर्जना जुइमखु । जातीय नारा स्वयां वर्गीय संघर्षयात बः बियाः उपिं छु वर्गपाखें थःपिं राजनीतिक नेता जुइगु धइगु खँ स्यनेगु अवसर चूलाकल धाःसा देसयात च्वन्ह्याकेत ग्वाहालि जुइ ।
    गणतान्त्रिक धाःसां झीथाय् गणतान्त्रिक परिपातिया विकास जुइफुगु मदुनि । म्हिगः श्रीपेच दुम्ह जुजुया थासय् आः श्रीपेच मदुपिं प्यम्ह न्याम्ह जुजुपिसं राज्य सञ्चालन यानाच्वंगु अवस्था दु । खाली उपिं मौका मदया जक थःपिं गणतान्त्रिक शासकत खः धकाः लिकुनाच्वंपिं खः । मौका दत धाःसा केपी शर्मा ओली जक मखु कि प्रचण्ड, बाबुराम, माधव, झलनाथ व बामदेव गौतम तकं श्रीपेच पुयाः शासन यायेत लिचिलि थें मच्वं । थन गणतान्त्रिक परिपातिया विकास मजूगु कारणं जुजुया सरकारं शासन याइथें निर्वाचन नं छुं छगू पक्षं याये धाःसा याइगु, मयाकेगु स्वया मजुइगु स्थितिइ दु । उकिं नं झीथाय् बिभेद कायम जुयाच्वंगु दु । विभेदया अन्त्य यानाः वर्ग संघर्षयात ताःलाकेगु खःसा राजनीतिक पार्टीतय्सं सिद्धान्त व ब्यवहार निगुलिं क्रान्तिकारीपन क्यने फयेकेमाः । थन नारा धाःसा तकसं च्वन्ह्याःगु तयेगु तर ब्यवहार धाःसा पूँजीवादी धार व सामन्ती चरित्र क्यनीगु परिपातिं जनता सदां निराश चायेमाःगु अवस्था ब्वलंगु दु । थ्व नेपाः देसय् म्हिगःया जुजुपिसं यानाक्यंगु शासन पद्धति व हालया गणतान्त्रिक शासकत नापं तयाः स्वयेगु खःसा गणतान्त्रिक शासकतय् हैसियत च्वन्ह्यानाच्वंगु दु । थ्व धइगु विलाशीपन अप्वयाच्वंगु छगू ज्वलन्त नमूना खः ।
    बैज्ञानिक समाजवादया विकल्प थौं तकं सुनानं बिइफुगु मदुनि । उकिं नं संसारय् दक्कलय् उत्कृष्ट ब्यवस्था कथं समाजवादयात नालातःगु दु । विना वर्ग संघर्ष थ्व प्राप्त जुइ नं मखु । उकिं नं वर्ग संघर्षया लागिं नेपाली जनतायात तयार यायेगु राजनीतिक दलतय्गु मू ज्या जुइमाःगु खः । थ्व ल्याखं वर्गीय व राजनीतिक संघर्षया लागिं सुनं अप्वः ज्या यात उगु दल वा राजनीतिक पार्टी दक्कलय् सवल, सक्षम व नैतिकवान जुइमाःगु खः । तर थन धन अप्वः खर्च यायेफुम्ह मनू चुनावय् त्याइगु व वं धाःथें फुक्कं चले जुइगु परिपाति विकास जूवनाच्वंगु कारणं नेपाली जनतायात वर्गीय व राजनीतिक संघर्षया लागिं तयार यायेगु स्वयां ठेक्कापत्ताय् ज्या याना अप्वः ध्यबा कमे यानाः याकनं राजनीतिक नेतृत्वय् थ्यंकेफुम्ह मनुखं शासकया रुपय् शासन यायेगु परिपाति विकास जूगु दु । थ्व राजनीतिक विकृति हे खः । उकिं नं वर्गीय दृष्टिकोण तइपिं राजनीतिक दल न्ह्यःने वयेमफुगु खः ।
    अराजक ढंगं हतियारया भरय् संघर्ष यानागु धयाः छुं छुं गतिविधित न्ह्यःब्वयेगु अले राज्य कब्जा यानाः शासन यायेगु झीथाय् सुरु जूगु दु । थ्व काइदां गब्लें जनता सचेत व संगठित जुइमखु । न्ह्याक्वः हे थाकुसां सारा जनतायात राजनीतिक व वर्गीय दृष्टिकोणं स्पष्ट यानाः याइगु क्रान्ति दीगो जुइ । म्हिगः थीथी देसय् जूगु क्रान्ति व राजनीतिक परिवर्तनयात ध्वाथुइक स्वयेगु इलय् नं थज्याःगु हे रुप रंग खने दयावइ । नेपाली जनतायात आलोचनात्मक चेनताया विकास यायेगु निंतिं राजनीतिक कक्षा कायेगु, सभा व प्रशिक्षण बियेगु निंतिं निर्वाचन उपयोग यायेमाःगु खः । तर थन अथे जुयाच्वंगु मदु । खःसां मखुसां ज्या यासां मयासां ध्यबा दयेवं अमुक ब्यक्तियात नं उम्मेदवार यानाः त्याकेगु अले उगु ध्यबा थःगु कार्यकाल तकं निदुगं स्वदुगं कमे यानाः ब्यापारीतय्त पुलेगु थंैज्याःगु राजनीतिक भ्रष्टाचार खने दयाच्वंगु दु । थुकिं नं वर्गीय व राजनीतिक चेतना विकास याइमखु ।