विवेकशील साझां येँया प्रमुखय् समीक्षा बाँस्कोटा व उपप्रमुखय् कीर्ति तुलाधर उम्मेदवार

कृष्ण प्रजापति
विवेकशील साझा पार्टीं येँ महानगरपालिकाया प्रमुखय् समीक्षा बाँस्कोटायात उम्मेदवार याइगु जूगु दुसा उपप्रमुखय् कीर्ति तुलाधरयात उम्मेदवार यायेगु निर्णय जूगु विवेकशील साझा पार्टीं जानकारी ब्यूगु दु । केन्द्रीय कार्य सम्पादन समितिं शुक्रवाः च्वंगु मुँज्यां बागमती प्रदेशया पूर्व संयोजक लिसें केन्द्रीय कार्य सम्पादन समितिया दुजः समीक्षा बाँस्कोटायात नगर प्रमुखया उम्मेदवार यायेगु निर्णय याःगु खः । ३८ दँया बाँस्कोटा २०७४ सालया प्रदेशसभा निर्वाचनय् येँ क्षेत्र ल्याः १ क पाखें उम्मेदवार जूगु खः । उगु इलय् स्वंगूगु थासय् लाःम्ह समीक्षां ४,३४३ मत काःगु खः ।
‘काठमाडौं स्कूल अफ ल’पाखें कानून विषयस स्नातक याःम्ह समीक्षां अमेरिका वनाः कानूनय् हे मास्टर्स याःगु खः । अध्ययन क्वचायेकाः स्वदेश लिहाँ वःम्ह समीक्षा राजनीति नापनापं च्याया बजारीकरणया ज्या नं यानाः वयाच्वंम्ह खः । अथेहे, कीर्ति तुलाधर नेपाल जेसिजया मिसा राष्ट्रिय नायः नं खः । ६२ दँया तुलाधर थीथी संघसंस्थाया नेतृत्वदायी भूूमिकाय् दु । तुलाधर अन्तर्राष्ट्रिय जेसिजया नं दक्षिण एसियापाखें हे न्हापांम्ह मिसा उपाध्यक्ष खः । समीक्षा व ६२ दँया कीर्ति तुलाधरं मंकाः कथं घोषणा पौ याकनं हे सार्वजनिक याइगु विवेकशील साझा पार्टीं जानकारी ब्यूगु दु ।