सत्ता गठबन्धनं स्थानीय चुनावयात लिछ्यायेगु तयारी

कृष्ण प्रजापति
सत्ता गठबन्धनं स्थानीय चुनावयात लिछ्यायेगु तयारी न्ह्याकूगु दु । चुनावय् गठबन्धनं तालमेल यायेगु धाःसां नं समस्यात वयेगु क्रम मद्यूबलय् गठबन्धनं चुनाव लिछ्यायेगु तयारीइ पलाः न्ह्याकूगु खः ।
विश्वस्त स्रोतया कथं स्वंगुलिं तहया चुनाव छक्वलं काार्तिक या मंसीर महिनाय् यायेगु बारे बालुवाटारय् सहलह जूगु दु । चुनाव लिछ्यायेगु पक्षय् माओवादी केन्द्र नायः प्रचण्ड व नेकपा एसया नायः माधवकुमार नेपाल नं खनेदूगु दु । प्रचण्ड व माधव नेपालं विगतय् नं स्थानीय, प्रदेश व संघीय संसदया चुनाव छक्वलं यायेगु बारे सहलह याःगु खः । देउवा नं थुगु मामलाय् सकारात्मक खनेदूगु सीदूगु दु । गठबन्धन यानाः चुनावय् वनीबलय् कांग्रेस दुने टिकट कायेमखंपिन्सं बिद्रोह याइगु घटना विकास जुजुं वनेधुंकाः देउवा सतर्क जूगु खः । स्वतन्त्र या मेमेगु दलं उम्मेदवार जुइगु तयारीइ कांग्रेसया गुलिखे नेता कार्यकर्तां तयारी न्ह्याकूगु दु ।
कांग्रेस दुने उम्मेदवार जुइ मखंपिन्सं याइगु विद्रोहयात दकले अप्वः एमाले, राप्रपा व लोसपां फाइदाया रुपं स्वयाच्वंगु दु । एमाले नायः केपी शर्मा ओलीं स्थानीय तहलय् बल्लाःगु पकड दुपिं तर टिकट कायेमखंपिन्त पार्टीइ हयाः टिकट बिइगु रणनीति न्ह्याकाच्वंगु दु । राष्ट्रिय प्रजातन्त्र पार्टीया नायः राजेन्द्र लिंगदेनं नं कांग्रेसय् च्वनाः टिकट कायेमखंपिन्त पार्टीइ दुकयाः टिकट बिइगु कथं पूर्व तयारीइ दु । थुकिं कांग्रेसय् तच्वकं भुखाय् ब्वइगु रिपोर्टत बालुवाटार व सानेपाय् थ्यनाच्वंगु दु । थुकिया हुनिं नं स्थानीय चुनाव लिछ्यायेगु तयारी जुयाच्वंगु दु ।