फ्वना नयेगु गलत प्रबृत्ति

कृष्ण प्रजापति
देश विकासया नामं विदेशीयाके फ्वनेगु प्रबृत्ति गलत खः । तर एमसीसीया विपक्षय् घोर भाषण याना लिपा दिमाग वास याना हयेधुंक एमसीसीया पक्षय् वंम्ह नेपाली कांग्रेसया महामन्त्री गगन थापां झीत हाकनं सछिदँ तक फ्वना नयेगु प्रबृत्ति स्यानादीगु दु । वय्कलं अमेरिकां बिउगु ५० करोड डलर ला कायेगु हे जुल । आः चीनयाके ४० करोड डलर व भारतयाके नं ३० करोड डलर फ्वनेगु सुरु यायेनु धयादीगु दु । नेपालय् विदेशीयाके फ्वना नयेगु प्रबृत्ति न्हापानिसें दु । तर विदेशीया भरं झी तःमि जुये, विकास जुये वा आत्मनिर्भर जुया वने धइगु म्हगस गलत खः । विदेशीया भरं देय् विकास यायेत स्वया च्वंतलय् गब्लें नं झीसं थःगु देय् मेपिनि तुलनाय् विकास याये फइमखु । झीगु देय् प्राकृतिक श्रोत साधनं तःमि देय् खः । खाली थन गलत राजनीतिक सोच विचारं थाय् कया जक झी लिउने लानाच्वंगु खः । स्वनिगःया बैभवशाली कला, संस्कृति व सम्पदा विकास जुयाच्वंगु इलय् झी पश्चिमा देय् बेलायत, जर्मनी स्वयां छुं नं लिउने मलाःपिं खः । थनया आर्थिक श्रोत नं उकथं हे विकास जुयाच्वंगु खः । तर गतल राजनीतिक लँपू काये धुंक झी झन भन लिउने लाःवन ।
    खास यानाः १०४ दँ तक बेलायती शासकतय्सं धाःथें थनया राणात चले जूगु कारणं झी लिउने लात । वयां न्ह्यः स्वयेगु खःसा आयश्रोत नं झी बल्लापिं खः । एमसीसी अनुमोदन याना झीसं गल्ती याये धुनागु दु । गल्तीपाखें पाठ सयेकेमाः । तर गगन थापां छगू गल्तीयात त्वपुइत हाकनं झिगू गल्ती याइ धयाथें चीनपाखें पीगू करोड अमेरिकी डलर फ्वनेगु नापं भारतयाके नं स्वीगू करोड अमेरिकी डलर बराबरया ग्वाहालि फ्वनेगु खँ ल्हानाः झी विश्वय् एक नम्बर फ्ना नयेगु देय् यायेत आह्वान यानादिल । झीसं गल्तीपाखें पाठ सयेके मसल धाःसा लिउने जक लानाच्वनी । छगू इलय् स्वनिगःया नेवाःत प्राविधिक रुपं नं च्वन्ह्यापिं खः । आर्थिक रुपं नं उलि हे सबल व सक्षमपिं खः । अथे जुया नं अमेरिका पत्ता लगे मजूबलय् ८८ मिटर १०५ फिट तःजाःगु न्यातँपौ देगः भब्य रुपं दयेके क्वचायेकल । विश्वया न्हय्गू अजू चायेमाःगु चीज मध्येया छगू न्यातँ पौ देगः थौंतक नं धस्वाना हे च्वंगु दनि । अथेहे स्वनिगःया कला कौशल धइगु विश्वस्तरया खः । तर थौं राजनीतिक रुपं नेवाःत न्ह्यःने वने मफुगु कारणं नेवाःतय् बुं जग्गा जमीन ६५ निसें ७० प्रतिशत पिनेया मनूतय्के लाये धुंकूगु दु ।
    पृथ्वीनारायण शाह थेंज्याःम्ह कनि तकं मसइगु जग्गा जमीनय् हुर्के बढे जुयाः स्वनिगःया ताः ई तक राजधानी जुयाच्वंगु ख्वप देय्या जितामित्र मल्लया काय् बीरनरसिंह मल्ल नापं त्वाँय् चिनाः थनया सकलें राजनीतिक वातावरण ध्वाथुइक मालामाल जुयाच्वंगु देय्यात कंगाल यायेत उपाय नं थुइकल । राजनीतिक, कुटनीतिक व रणकौशलय् प्रखर गोर्खाया जुजुयाके अब्ले तक न आयश्रोत दु, न बैभवशाली सम्पदा हे दु । छम्ह छम्ह मनूयाके छम्वः छम्वः पाय्म्वह मुंक गोरखाबासी सकसिकें दां मुंक जक वं युद्धया तयारी याःगु खः । उकिं एकता व राजनीतिक भावना गुलि महत्वपूर्ण धइगु क्यं । थवंथः मिले मजूगु कारणं हे गोर्खाया जुजुं झीत नयाबिल । आः नं नेपालय् दुगु राजनीतिक पार्टीतय् थःगु हे कथं छगु भावना छगू धारणा तयाः न्ह्याःवनेगु बानी मदुगु कारणं झी कन्हय् हाकनं दुर्घटनाय् लायेफुगु सम्भावना दनी । २५० दँ स्वनिगः दुने गोर्खाया शासन सुरु जूगु इलय् नं थनया बैभवशाली कला कौशल, संस्कृति व सम्पदायात तहस नहस याःगु दु । थ्व थौं तकं पुनः प्रतिष्ठापित याये फयाच्वंगु अवस्था मदुनि ।
    थःगु अधिकारया लागिं संघर्ष याये मफुगुलिं झी पिनेयापिसं धाःथें च्वने मालाच्वंगु खः । अमेरिकां दँ धाःसा दन । अमेरिकां फ्यतु धाःसा फ्यतुत । कन्हय् भारतयाके स्वीगू करोड डलर दां फ्वनेगु इलय् नं वं चलो धाइबलय् वनेगु, वं बेठो धाइबलय् फ्यतुगु व वं उठो धाइबलय् झी दना वाताहाँ च्वनेमालीगु अवस्था ब्वलनेफु । थज्याःगु बुद्धि स्यनीम्ह गुकथं नेपाली कांग्रेसया दुई नम्बरया ब्यक्ति महामन्त्री जुल ग्व ? अधिकारया लागिं ल्वायेगु स्यनेमाःगु इलय्, जनताया लागिं बलिदान बियेगु पाठ झीत स्यनेमाःगु इलय् थन ठगे याना नयेगु, फ्वना नयेगु, ह्ययेका नयेगु पाठ स्यनीपिं नेतात झीत म्वाः । उपिं भारतय् वना गुलामी जूवंसां जिउ । तर थ्व देसय् शासक जुयाः लज्यामचाःसें थन च्वनेगु उमित अधिकार मदु । जनताया साथ व ग्वाहालिं विकास यायेमाः । विदेशीया ध्वबां मखु । थन ताः ई तक विदेशीं धाःथें च्वनीपिं नेतातय्सं देसय् शासन यायेधुंकल । उकिं नं बेलायत स्वयां च्वन्ह्याःगु झीगु देय्, तिब्यतय् तकं मुद्रा छ्वयाः छ्ययेका देय् विकास यानाच्वंगु झीगु देय् थौं गरिबीया रेखां क्वँय् लानाच्वंगु खः ।
    थज्याःगु भयानक स्थिति वःगुया दथुइ २०४६ साल लिपा वःपिं नेतात जुजु स्वया नं जुजुवादी जूवनाच्वंगुलिं खः । थः जक भिंकेगु जनतायात छुं नं कथंया राहत तकं मबियेगु उमिगु चाल दु । गन विकासया खँ वइ अन अन भ्रष्टाचारया गन्ध वयाच्वंगु दु । कालीगण्डकी, अपर कर्णाली लगायत थीथी कथंया राष्टिय गौरवया योजना धयातःगु थासय् कमिशन मिले मजू धाधां ज्या रोके जुयाच्वंगु दु । विदेशीं हे चले यायेगु कथं एमसीसी पारित याके बिया अपराध याये धुंकूपिं नेतातय्सं थःपिनि छगू गल्तीयात त्वपुइत हाकनं मेगु गल्ती यायेत भारतयाते स्वीगु करोड व चीनयाके पीगु करोड फ्वनेगु प्रस्ताव तयाच्वंगु दु । उकिं नं सीदु देय् गन यंकेत्यंगु दु । नेपाल नेपाल हे जुया च्वने दइगु खः कि मखु । जनतायत प्रशिक्षित यानाः देय् च्वन्ह्याकेगु थेंज्याःगु महत्वपूर्ण ज्या स्यनेमाःगु इलय् गतल लँ क्यनेगु नं राष्टघाती ज्या खः । नेपाली कांग्रेस लगायत नेकपा एमालें तःगु मछिं हे राष्टघाती ज्यात यानाच्वंगु दु । उकिं नं स्थानीय निर्वाचन न्ह्यःने वयाच्वंगु थ्व इलय् उमित जनतां दुरुइ वंम्ह भुजिंयात थें ल्यःतु ल्ययेमाःगु अवस्था वयाच्वंगु दु । कम्युनिष्ट धायेगु तर कम्युनिष्ट सिद्धान्त व विचार कथं ज्या मयायेगु प्रबृत्ति दुपिं थनया नेतातय्त भाइकांग्रेस सिवें मेगु छु धायेगु ?