नेवाः देय् दबूया नायः पदय् पवित्र बज्राचार्यं उम्मेदवारी बिइगु

कृष्ण प्रजापति
नेवाः न्ह्यलुवाः, महानगरपालिकाया पुलांम्ह जनप्रतिनिधि पवित्र बज्राचार्यं नेवाः देय् दबूया आः जुइगु अधिवेशनय् नायः पदय् उम्मेदवारी बिइगु जूगु दु । देय् दबूया पुलांम्ह छ्याञ्जे बज्राचार्य थ्वया न्ह्यः नं नायः पदया उम्मेदवार जुयादीगु खः । भाजु बज्राचार्यं थथे थःपिं देय् दबूया उम्मेदवार जुइगु घोषणा शनिवाः येँय् जूगु देय् दबू येँ जिल्ला अधिवेशनय् नुगःखँ तयेगु झ्वलय् घोषणा यानादीगु खः ।
    वय्कलं थथे थःपिन्सं देय् दबू जिल्ला अधिवेशनय् मंचं हे उम्मेदवारी घोषणा यानागु खँयात कयाः नेवाः अनलाइनन्यूजलिसे खँ ल्हासें नेवाःतय्गु राष्ट्रिय संगठन नेवाः देय् दबूयात न्हूकथं न्ह्याकेगु नितिं व सकल नेवाःपिन्त कःघानाः यंकेगु नितिं थःगु दक्षता व अनुभवयात छ्यलाः न्ह्याकेगु विचाः कथं हे देय् दबूया नायः पदय् थःपिं दनेगु जानकारी बियादीगु दु । बज्राचार्य नेपालभाषा ख्यलय् आपालं संघसंस्थाय् आबद्ध व्यक्ति खःसा नेपाल खुद्रा व्यापार संघय् नं संस्थापक नायः खः ।