एमसीसीया पक्षपातीत प्रतिगाती

कृष्ण प्रजापति
संसार सदां निगू शक्तिया दथुइ द्धन्द्धं हे चले जुइगु जुयाच्वन । संसार चले जुइत निभाः व किचः, लः व मि, सत्य व असत्य, युद्ध व शान्ति नापं प्रतिगामी व प्रगतिशील शक्तिया दथुइ युद्ध, द्धन्द्ध व प्रतिश्पर्धा चले जुइगु खँ धु्रवसत्य खः । थौं नेपाःया राजनीतिक वातावणयात दुवाला स्वयेगु खःसा नं अथेहे प्रतिश्पर्धाया दथुइ चले जुयाच्वंगु दु । खास यानाः न्हापा सम्झौता यानाः आः लागू यायेत स्वयाच्वंगु मिलिनियम च्यालेन्ज कम्ब्याक्ट एमसीसी विषययात कयाः समर्थक व विरोधी दथुइ चर्को घम्साघम्सी जुयाच्वंगु दु । छगू पक्षं थ्व परियोजना छुं नं हालतय् पारित याये मजिउ धयाच्वंगु दुसा सत्ताशीन नेपाली कांग्रेस लगायत छुं वाम घटकया समर्थनय् थुकियात सदनं पारित यायेत स्वयाच्वंगु कारणं नेपाःया राजनीति क्वानाच्वंगु दु । न्हिया न्हिथं धइथें बानेश्वरय् जुलुस प्रदर्शन व फोहरा चले जुयाच्वंगु दु ।
    सत्य व असत्यया दथुइ सदां प्रतिश्पर्धा जुइगु स्वाभाविक खः । थ्व इलय् नेपाःया हीत अःखः अमेरिकी कम्पनीं नेपाःयात दवाव बियाः एमसीसी पारित याकेत स्वयाच्वंगु कारणं थ्व विषय क्वानाच्वंगु खः । अमेरिकी सोच व अमेरिकाया म्हिगःया परिवेशयात मथुइकं एमसीसी परियोजनाय् नेपाःया नेतातय्सं अब्ले सही याना बिउगु गल्ती जुइधुंकूगु दु । छगू गल्ती त्वपुइत झिगू गल्ती यायेमाली धइथें आः सत्ताय् थ्यंकूपिं नेतातय्सं थःपिसं न्हापा याये धुंकूगु गल्तीयात धाकछोप यायेत थाकुयाच्वंगु दु । उकिं न्हिया न्हिथं सदन चले जुइवं जुइवं बानेश्वरया सतक क्वानाच्वंगु खः । प्रतिगामी शक्ति विरुद्ध नेपाली जनतां सतकय् वयाः थःपिनि सः थ्वयेकाच्वंगु खः । थ्व इलय् एमसीसीया पक्ष कयाच्वंपिं प्रतिगामी तत्व व एमसीसीया विरोधय् सः थ्वयेकेत नांगा ल्हातिं सतकय् कुहां वयाच्वंपिं सर्वसाधारण जनता स्वत्त प्रगतिशील पक्षयापिं खने दयाच्वंगु दु ।
    देश मिया शेष नयेत स्वयाच्वंपिं जूगु कारणं उपिं देशद्रोही तकं खः । उमित थ्व देशया स्वया नं सत्ताय् थ्यंकेगु, विदेशीया गुलामी यायेगु व सदां जनतायात गुमराहय् तयाः थःपिं जक सरकारय् वनेगु बाहेक मेगु छुं नं ध्यान दइमखु । थ्व छगू ल्याखं अमेरिकी साम्राज्यवादया सैन्य मोर्चाया अंग कथं नेपालय् वयेत्यंगु खः । उकिं आपालं खँ गुमराहय् तयातःगु दु । खास मनूतय्सं जक थ्व विषययात उजागर याये फयाच्वंगु दु । सदनय् थ्यंपिं व सत्ताय् प्यपुनाच्वंपिसं खाली उकिं फाइदा जक दइगु खनाच्वंगु दु । अनुदान खः कि लगानी खः धइगु तकं उमिसं तिफ्याये फयाच्वंगु मदु । एमसीसी परियोजना अनुदान मखु लगानी खः । उकिं लगानी यानाः कन्हय् झीगु देय् दुने जः ह्वलेत मखु कि भारत, बंगलादेश, पाकिस्तान नापं जःलाखःला देय् तकं बिजुली यंकाः उकिया सुरक्षा धाधां अमेरिकी सेना दुत हयेत्यंगु दु ।
    कालापानीइ च्वंपिं भारतीय सेनायात लित यंकेगु लागिं नेपाल सरकारं छुं कथंया पहल याये मफयाच्वंगु थ्व इलय् भारतीय सेना स्वयां चर्को ढंगं थन अफिस चायेक थनया जग्गा कब्जा यानाः सदां थन च्वनेत वइपिं थुपिं अमेरिकी सेनायात गब्लें लित छ्वये फइमखु । उकिया लागिं अमेरिकी सेनां आः थन जग्गा न्याना तयेधुंकूगु दु । नुवाकोटया ३ रोपनी चानचुन जग्गा दुने एमसीसीया अफिस चायेकेगु तयार सुरु जूगु दु । एमसीसी परियोजना क्वचाल नं लिहां मवनीगु व अन दीर्घकालीन रुपं च्वनीगु कथं जग्गा प्राप्त याये धुंकूगु कम्पनी खः । थथे अमेरिकी कम्पनीयात जग्गा मियाः नेपाः दुने उमित लसकुस याःगु धइगु थःगु तुतिइ थःम्हेसियां पां पालेगु थेंज्याःगु आत्मघाती ज्या खः । उकिं थथे थःगु देय् दुने अमेरिकी सेनायात प्रवेश याकाः छुं दांया लोभय् विदेशीयात दुत हयेगु धइगु देशद्रोही ज्या खः ।
    स्थानीय निर्वाचन यायेगु धकाः घोषणा यानाः जनताया ध्यान उखे सालाः एमसीसीयात सदनया साधारण बहुमतं पारित यायेगु कासा सुरु जूगु दु । थ्व खँय् नं नेपाली जनता सचेत जुइ फयेकेमाःगु दु । आः नकतिनि जक झीसं देसय् ७२ औं प्रजातन्त्र दिवस हनागु दु । तर बानेश्वरय् नेपाली जनतायात प्रहरीं याःगु दमनयात स्वयेगु खःसा नेपालय् अझ नं प्रजातन्त्र वःगु मदुनि । छम्ह तानाशाही शासकं सभा, जुलुस याये मदइगु कथं नियम हयाः उकियात प्रहरी प्रशासन छ्यला लागू याइथें प्रजातन्त्र व गणतन्त्र धाःगु थ्व मुलुकय् न्हिया न्हिथं फोहरां मनूतय्त म्हुकाच्वंगु दु । कथिं दायाः मनूतय् छ्यं तछ्यानाच्वंगु दु । उकिं छगू ल्याखं प्रतिगामी शक्ति कथं खने दयेका वःपिं थ्व अमेरिकी शक्तिया पक्षपोषकतय्त वइगु स्थानीय निर्वाचनं बांमलाक बुकेत नं नेपाली जनता सचेत जुइमाःगु अवस्था वःगु दु ।
    संसारय् अमेरिकायात साम्राज्यवादी देय् कथं म्हसीकी । साम्राज्य सदां तिके याना तयेगु लागिं दां ग्वाहालिया लोभ क्यना थजू वा रोजगारया लोभ क्यना थजू अमेरिकां मेपिनि देसय् सदां थिचोमिचो यानाच्वंगु दु । अमेरिकी पृष्ठभूमियात वास्ता मयासें अमेरिकाया छगू कम्पनीलिसें नेपाल सरकारं सम्झौता याःगु गलत जूवंगु दु । गुलिं तथाकथित बुद्धिजीवीतय्सं एमसीसी सम्झौता न्ह्याथे याना नं स्वीकार यायेमाः धयाच्वंगु दु । तर थ्व कडापी जुइ फइमखु । एमसीसीया समर्थन याइपिं बबुद्धिजिवीत छगू ल्याखं कि अध्ययन मगापि जुइमाल । मखुत धाःसा उमिसं थूसां थःपिंत वइगु भागया कारणं उपिं मथू छुं च्वंपिं जुइमाल । अमेरिकी स्वार्थ प्रति देउवा सरकार छुं भचा गम्भीर मजूगु कारणं थ्व इलय् सत्ताशी दल नेपाली कांग्रेस अमेरिकी सरकारया छगू कम्पनीं न्याः लायेत बेसचा तःथें तयाः देय् दुने साम्राज्य न्यंकेत स्वयाच्वंगु कम्पनीलिसें सम्झौता यानाः उकियात लागू यायेगु काइदा स्वयाच्वंगु दु । उकिं नं आः माओवादी लगायत सम्पूर्ण देश भक्त शक्तिं छप्पा म्हुतुं उकिया बिरोध यायेगु ज्या जुयाच्वंगु खः ।
    देशया सम्प्रभुता विरुद्ध स्पष्ट बुंदा उल्लेख जुइकं जुइकं उकियात छुं मखुथें साधारण कथं कायेगु गलत जुइफु । देश व जनतायात धोखा बियाः यदि सत्ताशीन दलतय्सं एमसीसी पारित याना त्वतल धाःसा उमि न्ह्यः वइमखु । देय्यात धोखा बिइपिं देशद्रोही साबित जुइ । कन्हय् आकाझाकां अमेरिकी सेना दुहां वयाः थन उपद्रो मचे यात धाःसां उपिं मौन च्वनाबी । लिच्वः ला साधारण जनतां फये मालीगु खः । उकिं नं थौं एमसीसी पारित याकेत स्वयाच्वंपिं फुक्कं स्वार्थी तत्वयात प्रतिगामी शक्ति कथं कायेमाः ।