‘भोट सुयात ?’ –जागरण अभियान न्ह्याकीगु

कृष्ण प्रजापति
वइगु २०७९ बैशाख ३० गते सरकारं घोषणा याःगु स्थानीय तहया निर्वाचनय् ‘भोट सुयात ?’ धैगु अभियान न्ह्याकेगु तयारी नेवाः जागरण मञ्चं याःगु दु । जागरण मञ्चं ब्यूगु जानकारी कथं थ्व अभियान न्ह्याकेगु नितिं याकनं हे मञ्चया मुँज्या च्वनेत्यंगु दुसा मुँज्या धुंकाः नेवाः राजनीतिज्ञ, नेवाः न्ह्यलुवाःपिंलिसे सहलह ब्याकाः थुगु अभियान न्ह्याकेगु तयारी याःगु खँ सीदूगु दु ।
वंगु न्यादँ न्ह्यः नेवाः जागरण मंचया संयोजनय् ‘स्थानीय तहया चुनावय् झीगु सरोकार मुद्दा’यात न्ह्यःने हयाः येँया मेयर उम्मेदवारपिन्त ध्यानाकर्षण पौ लःल्हाःगु खः । उगु इलय् मञ्चं शिक्षाय् मांभाय्, स्थानीय निकायस नेवाः भाय् छ्यलाबुला, येँ महानगरपालिका दुने छेँ दुपिं स्थानीय छेँथुवाःपिनिगु समस्या, येँय् एकीकृत वस्ती विकास, येँ मनपाय् जात्रापर्व संचालन, खुल्ला व सार्वजनिक भूमिइ जुयाच्वंगु अवैध निर्माणया लिसें नेवाः हकहितयात कयाः स्थानीय चुनावय् दंपिं उम्मेदवारपिन्त सचेतना यायेगु व प्रतिबद्धता प्वंकेगु ज्याझ्वः याःगु खः ।
जागरण मञ्चं न्यादँ न्ह्यः त्यानावःपिं नेवाः उम्मेदवारपिन्सं प्रतिबद्धता प्वंकू कथं ज्या याः कि मयाः व वयालिसें नेवाःतय्गु नितिं नेवाः भूमिं त्यानावंपिन्सं थ्व न्यादँया दुने जनताया नितिं गुकथं ज्या यात ? थ्व सम्बन्धय् नं विज्ञ राजनीतिक पुचः व सचेत स्थानीय जनसमुदायलिसे सहलह ब्याकीगु खँया जानकारी ब्यूगु दु । अथेहे, नेवाः जागरण मञ्चं ‘भोट सुयात ?’ थ्व अभियान न्ह्याकेगु नितिं सचेतन राजनीतिक कार्यकर्तापिनिगु वृहत भेला यायेगु तयारी नं याःगु दु ।