बालकुमारी द्यःया मूर्ति मालेत ग्वाहालि याःम्हेसित न्यागू लख तका दां सिरपाः घोषणा

कृष्ण प्रजापति
यलया ऐतिहासिक महत्वं जाःगु सम्पदां जाःगु थाय् सुनागुथिया आस्था बालकुमारी द्यःया मूर्ति खुयायंकूगु छवाः नं मयायेधुंकल । तर आःतकं लुयावःगु मदुनि । उकिं सुनागुथिया सकल बासिन्दापिं थःपिनिगु लागाया म्हसीका व आस्थाया द्यः बालकुमारी माई तंगुलिं चिन्तित अवस्थाय् लानाच्वंगु दु । उगु बालकुमारी माईया मूर्ति लिच्छवीकालीन मूर्ति खः । थथे, बालकुमारी माईया मूर्ति आःतकं लुयामवःगुलिं सुनागुथिया बालकुमारी भवानी गुथिं छगू सुचं सार्वजनिक याःगु दु । उगु सुचनाय् बालकुमारी भवानी गुथिं यलया सुनागुथिं खुयायंकूगु बालकुमारी माईया मूर्ति मालेगु नितिं माःगु सुचं उपलब्ध याकाः ग्वाहालि याःम्हेसित सिरपाः बिइगु जूगु जानकारी बियातःगु दु ।
    सार्वजनिक जूगु सुचनाय् धयातःगु दु, ‘गुथिपाखें जारी अपिलय् मूर्ति मालेगु नितिं सुचं उपलब्ध याकूम्ह व्यक्ति वा संस्थायात न्यागू लखसिबें म्हो मजुइगु कथं नगद सिरपाः बिइगु जानकारी बियागु दु ।’ निरन्तर कुतः यानाच्वंसां नं आःतक मूर्ति लुयाः मवःनिगुलिं गुथियात सुचं उपलब्ध याकूम्ह व्यक्ति वा संस्थाया म्हसीका गोप्य तयेगु जानकारी नं सार्वजनिक जूगु सुचनाय् न्ह्यथनातःगु दु । सार्वजनिक जूगु सुचनाय् न्ह्यथनातःगु दु, ‘तंगु मूर्ति सम्बन्धी छुं नं सुचं वा जानकारी वःसा मोबाइल ल्याः ९८८१ २१७७८६ स स्वापू तयेत गुथिं इनाप यानाच्वना । सुनागुथिबासी यल महानगरपालिका वडा ल्याः २६ व २७ या आस्था व भरोसाया केन्द्र ऐतिहासिक धार्मिक धरोहर खुयाः यंकूगुलिं जिपिं मर्माहत जुयाच्वनागु दु ।’