फुक्क कलेजयात ११ गतेनिसें अनलाइन कक्षा संचालन यायेत त्रिविया निर्देशन

कृष्ण प्रजापति
त्रिभुवन विश्वविद्यालयं फुक्क कलेजयात माघ ११ गतेनिसें अनलाइन कक्षा संचालन यायेत निर्देशन ब्यूगु दु । त्रिवि कार्यकारी परिषदं कोरोना संक्रमण अप्वःगु हुनिं फुक्क कलेजं ११ गतेनिसें अनलाइन कक्षा संचालन यायेमाःगु निर्णय याःगु खः । थुकिया नितिं सोमवाः १० गतेदुने अनलाइन कक्षाया रुटिन दयेकाः सम्बन्धित डिनया ज्याकुथिइ छ्वयेमालीगु जूगु दु । अनलाइन कक्षा व्यवस्थित यायेगु नितिं फुक्क कलेजया सहायक प्रमुखया संयोजकत्वय् अप्वलय् ७ म्ह दुजःया अनलाइन कक्षा व्यवस्थापन समिति नीस्वनेमालीगु जूगु दु । अथेहे, फुक्क विभागं विभागीय प्रमुखया संयोजकत्वय् न्याम्ह दुजःया समिति नीस्वनेमाःगु त्रिवि कार्यकारी परिषदं निर्णय याःगु दु ।
    अथेहे, भौतिक उपस्थितिइ यायेमाःगु प्रयोगात्मक परीक्षा, अभ्यास शिक्षण व इन्टर्नशिप लिसेंया क्रियाकलाप स्वास्थ्य सुरक्षाया मापदण्ड छ्यलाः यायेफइगु जूगु दु । अनलाइन कक्षा व्यवस्थित जू मजूगु अनुगमन यायेत डिनया संयोजकत्वय् अनलाइन कक्षा अनुगमन समिति नं दयेकेगु त्रिविं जानकारी ब्यूगु दु । अथेहे, अनलाइन पठनपाठन व परीक्षासम्बन्धी शिक्षकपिन्त तालिम बिइगु व उकिया धलः फुक्क कलेज, विभाग, अध्ययन संस्थानतसें डिनया ज्याकुथिइ पेस यायेमालीगु जूगु दु । अनलाइनय् क्वःछ्यूगु कक्षा काइम्ह शिक्षकया हाजिरी अनलाइनपाखें हे जुइगु जूगु दु ।
    चिकिस्ताशास्त्र अध्ययन संस्थानया अन्तर्गतया परीक्षा स्वास्थ्यया मापदण्ड पालना यानाः अध्ययन संस्थानपाखें हे निर्णय यानाः संचालन यायेगु, विद्यार्थीया आन्तरिक मूल्यांकन अनलाइनया माध्यमं याकेगु व फुक्क संकाय व संस्थानं अनलाइनपाखें परीक्षा कायेगु ढाँचा व कार्यविधि तयार यायेगु व कार्यविधिइ आन्तरिक मूल्यांकन व लिपांगु परीक्षाया सम्बन्धय् माःगु व्यवस्था यायेत नं त्रिविं निर्देशन ब्यूगु दु । त्रिविं फुक्क कलेजयात प्रशासनिक सेवा बन्द मयायेत व फयांफतले छेँपाखें हे ज्या यायेगु व याकेगु लकस मिलेयायेत नं निर्देशन ब्यूगु दु ।