थौं माघ २ ः राष्ट्रिय भूकम्प सुरक्षा दिवस

कृष्ण प्रजापति
वि.सं. १९९० माघ २ गते न्हिनय् २ः२४ ता इलय् भुखाय् ब्वःगु लुमन्तिइ थौं माघ २ गते आइतवाः देय् न्यंकं थीथी ज्याझ्वः यासें २४ क्वःगु राष्ट्रिय भूकम्प सुरक्षा दिवस न्यायेकाच्वंगु दु । ‘भूकम्पीय सचेतना, सुरक्षित संरचना नारा थ्वयेकाः थुगु दिवस न्यायेकाच्वंगु दु । भुखाचं मजूसे कमजोर संरचनां मानवीय लिसेंया क्षति याइगु जूगुलिं भुखाय् प्रतिरोधी संरचना दयेकेत नागरिकपिन्त चेतना ब्वलंकेगु आज्जुं थ्व नारा तय याःगु खः ।
वि.सं. २०५५ सालनिसें माघ २ गतेयात राष्ट्रिय भूकम्प सुरक्षा दिवसया रुपं न्यायेकेगु न्ह्याकूगु खः । भविष्यय् वयेफूगु भुखाय् विषयस जनचेतना ब्वलंकेगु आज्जुं सरकारं थ्व दिवस न्यायेकेगु ज्या न्ह्याकूगु खः । दिवसया झ्वलय् मूल समारोह समितिं थौं आइतवाः पाटन दरबार क्षेत्रय् विशेष ज्याझ्वःया ग्वसाः ग्वःगु दु । ज्याझ्वलय् निश्चित मनूत जक भौतिक रुपं उपस्थित जूगु व मेपिन्त भर्चुअल माध्यमं सहभागी जुइत आह्वान याःगु सहरी विकास व भवन निर्माण विभागया महानिर्देशक पदमकुमार मैनालीं जानकारी ब्यूगु दु । ज्याझ्वलय् प्रधानमन्त्री शेरबहादुर देउवा, गृहमन्त्री बालकृष्ण खाँण व सहरी विकासमन्त्री रामकुमारी झाँक्रीं नं भर्चुअल माध्यमं सम्बोधन याइगु जूगु दु ।
ज्याझ्वलय् गृहमन्त्रालय, विभाग, यल महानगरपालिका, भूकम्प प्रविधि राष्ट्रिय समाज नेपाल (एनसेट) लिसेंया संस्थाया ल्याः क्वःछ्यूगु जनशक्ति जक मुनाः मेपिन्त भर्चुअल माध्यमं चेना ब्वलंकेगु कथं ज्याझ्वःया स्वरुप हिलाबुला याःगु दु । कोरोना भाइरसया न्हूगु भेरियन्टया हुनिं ज्याझ्वःया स्वरुप हिलाबुला यायेत बाध्य जूगु मूल समारोह समितिं जानकारी ब्यूगु दु । भर्चुअल सहभागी जुइ चाहेजूपिनिगु निंतिं गृहमन्त्रालयया वेबसाइटय् जुमआइडी व पासवर्ड तःगु भूकम्प सुरक्षा दिवस मूल समारोह समिति अन्तर्गतया प्रचारप्रसार उपसमितिया कजि तकं जुयाच्वंम्ह विभागया महानिर्देशक मैनालीं जानकारी ब्यूगु दु । जुम आइडीइ न्ह्याम्ह मनूत नं सहभागी जुइफइगु समितिं जानकारी ब्यूगु दु ।
थ्वहे झ्वलय् भूकम्प सुरक्षा डिजिटल प्रदर्शनीया तकं भर्चुअल माध्यमपाखें ग्वसाः ग्वयेगु जानकारी ब्यूगु दु । दिवसया झ्वलय् थीथी संस्थां पुस १५ गतेनिसें हे जनचेतना ब्वलंकेगु कथंया ज्याझ्वःया ग्वसाः ग्वयाच्वंगु दु । थुगु दँ कोरोना भाइरसया महामारी दूगुलिं भौतिक दूरी कायम यानाः स्वास्थ्य सुरक्षाया मापदण्ड छ्यलाः ज्याझ्वः यायेगु जानकारी ब्यूगु दु । थ्व दिवस न्यायेकेगु सुरु जुइधुंकाः वि.सं. २०७२ साल बैशाख १२ गते शनिवाः ११ः५६ ता इलय् गोरखाया बारपाक केन्द्रविन्दु जुयाः भुखाचं थ्यंमथ्यं ९ हजार मनूत सीगु खः । ८ लखसिबें अप्वः नीजि छेँ ध्वस्त जूगु खः । ९ सयसिबें अप्वः पुरातात्विक सम्पदा ध्वस्त जूगु खः ।
सिन्धुपाल्चोक, दोलखा, गोरखा, रामेछाप, ओखलढुंगा, सिन्धुली, काभ्रेपलाञ्चोक, मकवानपुर, धादिङ, नुवाकोट, रसुवा, स्वनिगःया येँ, यल व ख्वपय् भुखाचं अप्वः क्षति याःगु खःसा मेमेगु १८ गू जिल्लाय् आंशिक क्षति जूगु खः । थुकिया पुनःनिर्माणया नितिं खुदँ न्ह्यःनिसें राष्ट्रपति विद्यादेवी भण्डारीं लानीपुखू व दथुइ च्वंगु बालगोपालेश्वर देगःपाखें न्ह्याकूगु खः । राष्ट्रपतिं पुनःनिर्माणया ज्या न्ह्याकूगु थाय् लानीपुखू व बालगोपालेश्वरया पुनःनिर्माण वंगु दँ क्वचायेधुंकूगु दु । भुखाय् लिपाया पुनःनिर्माणया नितिं नीस्वंगु राष्ट्रिय पुनःनिर्माण प्राधिकरणं क्वःछ्यूगु ई दुने ज्या क्वमचाःबलय् पुनःनिर्माणया ल्यंदूगु ज्या सम्बन्धित विभागयात लःल्हाःगु खः ।
    भुखाय् लिपाया पुनःनिर्माण भुखाय् प्रतिरोधी जूगुलिं सुरक्षित जूगु जानकारी ब्यूगु दु । पश्चिम नेपालय् ५०० दँनिसें तःधंगु भुखाय् मब्वःगुलिं शक्ति संचय जुयाच्वंगु थीथी अध्ययनं क्यंगु दु । भविष्यय् वयेफूगु भुखाचं अन तःधंगु क्षति जुइफइगु विज्ञपिनिगु अध्ययनं खनेदूगुलिं उगु क्षेत्रय् जनचेतना ब्वलंकेगु ज्यायात विभाग लिसें सरोकार दूगु निकायं प्राथमिकताय् तःगु दु । दाङं पश्चिमया जिल्लाय् आवंनिसें हे भुखाय् प्रतिरोधी संरचना निर्माणया नितिं विभागं चेतना ब्वलंकेगु अभियान न्ह्याकूगु दु । थुकिया नितिं अनया स्थानीय सरकारलिसे नं सहकार्य जूगु जानकारी ब्यूगु दु ।