कृष्ण प्रजापति
थीथी राजनीतिक पार्टीं आः नकतिनि जक थःपिनि महाधिवेशन क्वचायेका न्हूगु नेतृत्व ल्यःगु दु । आपालं धइथें राजनीतिक पार्टी दुने न्हूपिं ख्वाः स्वया नं पुलांगु ख्वाः दोहोरो जूगु दु । राष्टिय प्रजातन्त्र पार्टी थेंज्याःगु पुलांगु पंचतय्गु राजनीतिक पार्टीं धाःसा न्हूम्ह नेता राजेन्द्र सिंग्देल अध्यक्ष ल्ययाः छगू ल्याखं पार्टी दुने पत्या मजूगु खुसिबालं चुइकूगु महसुस जूगु दु । वयां लिपा पुलांम्ह अध्यक्ष कमल थापा मन थाते तये मफयाः गब्लें ज्ञानेन्द्र जुजुं थः बिरुद्ध तःधंगु षडयन्त्र याःगु धासें जेहाड हे छेडे याना जूगु खनेदत । अथे खःसां थीथी राजनीतिक पार्टी दुनेया नीति, विचार, सिद्धान्त व कार्यक्रम धाःसा पुलांगु हे सूचीइ चले जुइगु खनेदुगु दु । गनं क्रान्ति यायेगु, आमूल परिवर्तनया लँपुइ वनेगु वा समाजवादी विचारधाराया प्रचार यानाः जनतायागु समतामुलक समाजया इच्छा पूवंकेगु खँत दुमथ्याः ।
    प्रचण्ड थेंज्याःम्ह पीदँ न्ह्यःनिसें अध्यक्ष जुयाच्वंम्ह मनुखं तकं न्हूगु पुस्तायात अध्यक्ष त्वतेगु मस्वः । बरु घनिभूत संघर्ष याना नं अध्यक्ष थःगु काबुइ तयाः माल धाःसा अझं त्याग याये धकाः अभिब्यक्ति बियाः थःयात वयाच्वंगु थीथी सुविधापाखें थः मुक्त जुयाच्वनागु खँ पित हयाच्वंगु दु । न्हापा नं ५० लाख वंगु खाट व लँुया घडी थेंज्याःगु राजकीय सुविधा भोग चलन याना जूगु धाःसें पुष्पकमल दाहाल प्रचण्ड विवादय् लाःवंगु खः । आः नं अज्याःगु सुविधा ला त्वतूगु मदुनि । तर राष्टपति विद्यादेवी भण्डारीं थें डेढ करोड वंगु गाडी गया जूगु व आलिसान महलय् च्वनेगु सोच धाःसा आः नं प्रचण्डं त्वतल धाये मछिं । उकिं नं त्यागी नेतात थौंया आवश्यकता  जुयाच्वंगु दु । थः सदां अध्यक्ष जुयाः मेपिंत सदां कार्यकर्ता वा आठपरिया थें ज्या याका तयेगु झी राजनीतिक नेतातय् पुलांगु चलन दु । म्हिगः तक त्याग, तपश्या व बलिदान याना वयाच्वंगु गुलिं राजनीतिक पार्टी दुनेया नेतातय् स्वभाव तकं उकथंया खने दयाच्वंगु दु । उकिं नं गुलिं सर्वसाधारण नागरिक व पार्टी कार्यकर्तात उमिगु जीवन शैलीपाखें वाक्क जूवंगु खः ।
    सन्त नेता कथं कयातःम्ह कृष्णप्रसाद भट्टराई, गणेशमान सिंहपिनि न्ह्यःने आःया नेता, सांसद व मन्त्रीतय्गु त्यागया भावना उलि क्वातु मजू । देसय् विदेशीं हस्तक्षेप याइगु सम्भावना दयेकं दयेकं एमसीसी थेंज्याःगु मेगु राष्टं धाःथें च्वनेमालिगु थेंज्याःगु प्रावधान दुथ्याःगु सम्झौता पारित याकेत स्वयाच्वंगु छगू राजनेतातय् निहित स्वार्थ खः । छुं दांया लागिं पिनेयापिंत थन दुथ्याका थनया अमूल्य सम्पदा जलश्रोतय् उमित यत्थें याके बीगु काइदा मिले मजू । तर थ्व खँयात नेतातय्सं स्पष्ट धाये फयाच्वंगु मदु । आः नकतिनि जक एमसीसी पारित याकेगु निंतिं प्रधानमन्त्री थेंज्याःम्ह देय्या कार्यकारी प्रमुख तकं बालकोट दरवारय् शरण कयाः मचायेकं आः प्रमुख प्रतिपक्षी जुयाः सदन चले याके मबिउगु पक्षयात तकं एमसीसी पारित याकेगु निंतिं सीसीएमसीया बैठकं नीन्याम्ह तकं मुंके मबिइगु निंतिं सिफारिस याःगु दु । माघ १५ गते तकया निंतिं स्कूल बन्द याकेगु खँ दु ।
    थथे थःपिनि स्वार्थ पूवंकेत देय्यात बन्धक तयेगु ज्या थौं प्रमुख प्रतिपक्षीया साथ कयाः सत्तापक्षं यानाच्वंगु दु । थ्व धइगु राजनीतिक पार्टीं देय्यात स्वतन्त्रताया नामय् पराधीन यायेगु स्वयाच्वंगु ज्या खँत खः । स्वतन्त्रता सदां उचित जुइ धाये फइमखु । प्रजातन्त्र व स्वतन्त्रताया कारणं थन गुलिं मनूत नये मखना सीमाःगु अवस्था ब्वलंगु दु । छुं छुं पार्टीइ लगे जूपिं जक थन तःमि जुइगु, अकूत सम्पत्तिया मालिक जुइगु खने दुगु दु । गुलिं त्याग, तपश्या व बलिदान यानावंपिं युवा, महिला व युद्ध पीडिततय् धाःसा म्हिगःनिसें थौं तकं व हे थः काय् गब्ले वइ, गन वन जुइ व आः छु यानाः दिन काटे यायेगु धइगु पीर मर्कां स्वताक्क चिनातःगु दु । थ्व धइगु त्याग यायेफुपिं नेतात झीथाय् तसकं म्हो जुयाः थःपिनिगु सुविधाया लागिं जक थीथी विधेयक पारित याकाः कानून कथं लागू याकीपिं यक्वः दुगुलिं खः । थथे जूत्तलय् थन समतामुलक समाजया कल्पना हे याये फइमखु ।
    स्वार्थया कारणं पार्टी विभाजन जुइगु, स्वार्थया कारणं हे निगू पार्टी एकता जुइगु व स्वार्थया कारणं हे सत्ता समीकरण जुइगु झीथाय् सकसिनं खनाच्वंगु विषय जुल । अन त्याग व बलिदान बिउपिंत स्थान बियेमाः धइ कथं सुनां नं सः तःगु खनेमदु । म्हिगः तक युद्ध पीडिततय्पाखें राजनीतिक पार्टीइ थुलि मनू दुथ्याकेमाः, अपांगपाखें थुलि प्रतिशत प्रतिनिधित्व यायेमाः व दलीत नापं लिउने लाःगु वर्गपाखें वा मिसा जूगु ल्याखं नं थथे थथे छुं प्रतिशत कोटा ब्यवस्था यायेमाः धइगु खँ हयाच्वंगु राजनीतिक पार्टीतय्सं तकं आपालं प्रावधान पूमवंक नं थःपिनि अधिवेशन क्वचायेकूगु खनेदत । मनोनित यायेगु नामय् थः जःखःया मनूत वा थः यःम्ह मनूयात स्थान बियाः अध्यक्ष शक्तिशाली जुइगु काइदा स्वयाच्वंगु दु । थ्व धइगु थःगु नीति गलत जूसां थः चुनाबय् बुसां अध्यक्ष जुयाच्वनेगु म्हगसः पूवंकेगु निंतिं जक खः । गुलिं राजनीतिक पार्टी दुने ला खने दयेकं वा मदयेकं विदेशीया ध्यबा नइपिं मनूतय्सं देय् दुने छगू राजनीतिक पार्टी चायेकूसां पिनेया मनूतय् ध्यबा हयेत अन्तर्राष्टिय स्तरया गैर सरकारी संस्थात चायेका ज्या यानाच्वंपिं यक्वः खनेदुगु दु ।
    थथे झीगु देय् दुने त्याग, तपश्या व बलिदान बिइपिं नेतातय् कमी कमजोरीया कारणं थौं देय् म्हिगःया सिक्कीम वा भूटान थें भारतीय नव उपनिवेशया ल्हातय् लाःवनीगु जकं खःला धइगु चिन्ता अप्वयाच्वंगु दु । थन पिनेया मनू वयाः झीगु देय् नयेगु म्हगसः खंकाच्वंपिं आपालं दु । उकिं नं झी यदि सचेत, संगठित व जागरुक जुया च्वने मफुत धाःसा ध्यबा ह्वला जिल ला वा मनूतय्त पद वा सत्ता बिया जिल अथे यानाः उमिसं धाःथें तयेत बाध्य यायेफु । एमसीसी सम्झौता थज्याःगु हे छगू दसु जक खः । अज्याःगु संसारयात हिले फइगु वा विश्वया मानव सभ्यतायात स्यंका यंकीगु सांस्कृतिक उठल पुठल याइगु ज्या आः अमेरिकी साम्राज्यवाद व भारतीय बिस्तारवादं यानाच्वंगु दु । म्हिगःनिसें थौं तकया उमिगु गतिविधि स्वया वनेगु खःसा व खँ स्पष्ट खनेदइ । अथे जुया नं आः झीगु देय्या निंतिं त्यागी राजनीतिक पार्टी व त्यागी नेताया आवश्यकता खनेदु ।


...

All Comments.......


Please Login/Register To Comments