एसईई ‘खारेज’ जुइगु हल्लां विद्यार्थी व अभिभावक अन्यौलय्

कृष्ण प्रजापति
एसईई परीक्षा खारेज जुइगु हल्लां विद्यार्थी व अभिभावक अन्यौलय् लाःगु दु । ‘आः एसईई जुइ कि मजुइ’ धकाः विद्यार्थीपिन्सं न्यनेगु यानाहःगु शिक्षकपिन्सं धाःगु दु । वंगु पुस ८ गते संसदीय समितिया बैठकं माध्यमिक शिक्षा परीक्षा (एसईई) खारेज यायेत निर्देशन ब्यूगु बुखं विद्यार्थी व अभिभावकपिंके दुविधा ब्वलंगु इमिगु धापू दु । तर राष्ट्रिय परीक्षा बोर्डं धाःसा हल्लाया ल्यूने मवनेत व एसईईया तयारी जारी यायेत आग्रह याःगु दु ।
    थ्वहे पुस ८ गते शिक्षा व स्वास्थ्य समितिया बैठकय् शिक्षामन्त्री देवेन्द्र पौडेलं एसईई खारेज यायेगु विषयस सहलह दुने दु धाःगु खः । समिति सभापति जयपुरी घर्तीं बैठकया अन्त्यय् धाःगु खः, ‘एसईई याकेमज्यू धकाः जिमिसं निर्देशन बियागु खः । थुकियात कार्यान्वयनया दिशापाखे मन्त्रालय वनेमा धकाः जिमिसं समितिया पाखें निर्देशन बियाच्वना ।’ वधुंकाः मिडियाय् एसईई खारेज यायेत संसदीय समितिया निर्देशन धैगु बुखँ वल । उकिं विद्यार्थी व अभिभावकपिन्त आः एसईई जुइमखु कि धैगु संशय ब्वलंगु सरोकारवाला पक्षया धापू दु ।
त्रिपुरेश्वरय् च्वंगु विश्व निकेतन माविया विद्यार्थी व अभिभावकपिन्सं आः एसईई जुइ कि मजुइ धकाः न्यनाहःगु प्रधानाध्यापक हेरम्बराज कँडेलं धाःगु दु । वं धाःगु दु, ‘एसईई खारेज जुइगु निर्देशन धैगु बुखँ वयेधुंकाः विद्यार्थीपिन्सं सर आः जिमिगु एसईई जुइमखुला धकाः न्यनेगु यानाच्वंगु दु । जिमिसं इमित प्रष्ट यानागु दु । अभिभावकपिन्सं नं फोन यानाः न्यनाः वयाच्वंगु दु ।’ नीलबाराही मावि कालिमातिया प्रधानाध्यापक डा. जानुका पौडेल नं परीक्षा हे खारेज जुइगु धैगु हल्लां विद्यार्थीपिंके परीक्षा हे मजुइगु खः कि धैगु भ्रम ब्वलंगु धाःगु दु । वं धाःगु दु, ‘खारेज जुयाः परीक्षा हे मजुइगु खः कि धैगु बुझाईपाखें विद्यार्थीपिन्सं कम मिहिनेत याइ ला धैगु खँ दु ।’
राष्ट्रिय परीक्षा बोर्डया न्हूम्ह नायः महाश्रम शर्मा धाःसा संसदीय समितिं खारेज यायेत मजुसे कानून कथं प्रदेशयात जिम्मा बिइत निर्देशन ब्यूगु तर बुझाईस फरक जूगु धाःगु दु । वं धाःगु दु, ‘भच्चा बुझाईस फरक जुयाः थथे जूगु खः । खारेज मखु । कानूनं प्रदेशयात अधिकार ब्यूगुलिं आः अथे हे वनेनु धाःगु खः ।’