नेपाल पत्रकार महासंघया संस्थापक नायः सत्यनारायण बहादुर श्रेष्ठया १०६ क्वःगु बुदिं हन

   

मूपाहाँ कथं झायादीम्ह संचार व सूचना प्रविधिमन्त्री पार्वत गुरुङं आदर्श विद्या मन्दिर (एभिएम) स्कूलय् च्वंगु श्रेष्ठया झ्वाताय् स्वांमाः क्वखायेकाः वय्कःयात लुमंकादिल । संचारमन्त्री गुरुङलिसें नेवाः पत्रकार राष्ट्रिय दबूया पदाधिकारी व मेमेपिं पाहाँपिन्सं नं श्रेष्ठया झ्वाताय् स्वांमाः क्वखायेकाः वय्कःयात लुमंकादीगु खः । उगु ज्याझ्वलय् नेवाः पत्रकार राष्ट्रिय दबूया नायः सुरजवीर बज्राचार्यं श्रेष्ठयात नेपाल पत्रकार महासंघया संस्थापक नायःया म्हसीका बिइकेत च्वयातःगु ध्यानाकर्षण पौ संचारमन्त्री गुरुङयात लःल्हानादीगु खः ।

   

ध्यानाकर्षण पतिइ च्वयातःगु दु, ‘नेपाल पत्रकार महासंघया संस्थापक नायःया रुपय् पत्रकार संगठित यायेगु अभियानया सुरुवात २००८ सालय् नेपाल टुडेया सम्पादक सत्यनारायण बहादुर श्रेष्ठं थःगु अध्यक्षताय् न्हापांगुखुसि नेपाल पत्रकार संघ नीस्वंगु खः । २००९ सालय् संघया निक्वःगु सभापाखें हाकनं श्रेष्ठयात हे नायः पदय् ल्यःगु खः । २०१२ सालय् पत्रकारपिनिगु मेगु बैठकपाखें पूर्वप्रधानमन्त्री व नेपाली कांग्रेसया पूर्व सभापति कृष्णप्रसाद भट्टराईया सभापतित्वय् नेपाल पत्रकार संघया पुनर्गठन याःगु खः । वधुंकाः थ्वहे तथ्ययात न्हापांगु घटनाया रुपं ब्याख्या यानाः भट्टराईयात नेपाल पत्रकार महासंघया संस्थापक कथं कयाः वयाच्वंगु दु । थुकिं इतिहास हुइगु ज्या जुयाच्वंगु दु ।’ संचारमन्त्री पार्वत गुरुङं पत्रकार महासंघया नायः विवाद बारे थःगु ध्यानाकर्षण जूगु धासें फुक्क सरोकारवालालिसे सहलह ब्याकाः थ्व विवादयात क्वचायेकेगु कुतः याये धकाः धाःगु दु ।

   

संचारमन्त्री गुरुङं धाःगु दु, ‘२००७ सालय् देसय् प्रजातन्त्र वल । २००८ सालय् हे श्रेष्ठं पत्रकारपिनिगु संगठन नीस्वनादिल । थ्व वय्कःया दूरदर्शीताया प्रमाण खः । थुकिया लिसें २००७ सालय् प्रजातन्त्र वःगुलि पत्रकारपिनिगु भूमिका व योगदानबारे नं सिइके फइ ।’ नेवाः पत्रकारपिनिगु संस्था नेवाः पत्रकार राष्ट्रिय दबूपाखें ग्वसाः ग्वःगु ज्याझ्वलय् दबूया नायः सुरजवीर बज्राचार्यं थ्व न्यायया लडाइँ खः धासें थुकिया नितिं दबूपाखें सः थ्वयेकाः वयाच्वनागु जानकारी नं बियादिल । आः थ्व विषययात कार्यान्वयनया लँपुइ यंकेगु बारे माःगु सहलह ब्याकाः न्ह्यःने वनेत आवश्यक जुइधुंकूगु दबूया नायः बज्राचार्यया धापू दु ।

   

नेपाल पत्रकार महासंघया न्वकू दिलीप थापा मगरं दस्तावेज, प्रमाणत मुंकेफइगु खण्डय् नेपाल पत्रकार महासंघं नं सत्यनारायण बहादुर श्रेष्ठया योगदानया कदर यायेगु विश्वास प्वंकादिल । मधेसी पत्रकार समाजया नायः मोहन सिंहं थ्व विषयबारे सत्यतथ्य फुक्कसिनं स्यूसां नं सुनानं सम्बोधन याःगु मदुनि धकाः धयादिल । सिंहया कथं देशया हे गौरवशाली व्यक्तित्व न्ह्यःने दूगु जुयाः सत्यनारायण बहादुर श्रेष्ठया ज्या खिउँगु कोथाय् लाकूगु दु । अथेहे, ज्याझ्वलय् नेवाः पत्रकार राष्ट्रिय दबू यलया दांभरी सुनिल बज्राचार्यं सुभाय् न्वचू तयादीगु खः ।