लोककवि गणेशलाल श्रेष्ठया अनावरण यायेत तयातःगु झ्वाता खुयायंकल

मकवानपुरया लोककवि गणेशलाल श्रेष्ठया अर्धकदया झ्वाता (सालिक) खुयायंकूगु दु । आइतवाः जिल्लाया पुलांगु सदरमुकाम भीमफेदीइ लोककवि श्रेष्ठया झ्वाता अनावरण यायेगु तयारी याःगु खः । तर, झ्वाता शनिवाः चान्हय् खुयायंकूगु इलाका प्रहरी ज्याकुथि भीमफेदीं जानकारी ब्यूगु दु । थ्यंमथ्यं न्यागू लख तकाया लागतय् निर्माण याःगु पित्तलपाखें दयेकातःगु झ्वाता प्रहरी ज्याकुथि भीमफेदीपाखें २ सय मिटर पश्चिम ज्योति पुस्तकालय परिसरय् आइतवाः सुथय् अनावरण यायेगु ज्याझ्वः दूगु खः । उगु झ्वाता शनिवाः सनिलय् हे उगु थासय् तयाः कापतं भुनाः तयातःगु खः । झ्वाता अनावरण यायेत मूपाहाँया रुपं परराष्ट्रविद् हिरण्यलाल श्रेष्ठ लिसेंया पाहाँपिं छन्हु न्ह्यः हे हेटौंडा थ्यंकूगु खः । तर सुथय् उगु झ्वाता गायब जूगु खः । वधुंकाः झ्वाता तयेगु स्तम्भय् लोककवि गणेशलाल श्रेष्ठया किपाः तयाः वय्कःया लुमन्तिइ ज्याझ्वः याःगु खः । ज्याझ्वय् परराष्ट्रविद् हिरण्यलाल श्रेष्ठ, गाउँपालिकाया नायः हिदम लामा, मकवानपुरया साहित्यका व स्थानीयबासी सहभागी जूगु खः । ज्याझ्वलय् न्वःवाःपिन्सं झ्वाता खुँ लुइकाः कारवाहीया माग याःगु खः ।
    
मदुम्ह लोककवि गणेशलाल श्रेष्ठ स्मृति झ्वाता प्रतिस्थापन समितिया कजि विष्णुगोपाल महर्जनं धाःगु दु, ‘थ्यंमथ्यं ४० किलोया झ्वाता खः, तर न्ह्यःया दिं हे खुयायंकल ।’ झ्वाता झ्यातूगु जूगुलिं अःपुक हे तापाक्क यंकेगु अवस्था मदुगु धासें कजि महर्जनं प्रहरीं तदारुकता क्यंसां लुयावइगु धाःगु दु । झ्वाता प्रतिस्थापन समितिं तंगु झ्वाता मालेगु नितिं प्रहरीयात इनाप याःगु दु । प्रहरीं धाःसा झ्वाता मालेगु ज्यायात न्ह्यःने यंकागु जानकारी ब्यूगु दु । उगु झ्वाता येँया लक्ष्मण भुजेलं निर्माण याःगु खः । समितिया कथं झ्वाता दयेकेत येँय् हे ३ लख ५० हजार तका दां खर्च जूगु खः । मकवानपुर थ्यंकूबलय् व झ्वाता तयेगु थाय् दयेकूबलय् थप रकम खर्च जूगु खः ।

भीमफेदी निवासी लोककवि गणेशलाल श्रेष्ठयात ‘लोककवि’ पदवी लोकसाहित्य परिषद् व प्रज्ञा प्रतिष्ठानं ब्यूगु खः । वि.सं. १९८६ स भीमफेदीइया पारी बजारय् जन्म जुयादीम्ह श्रेष्ठ २०४२ सालय् मदुगु खः । लोककवि श्रेष्ठया झ्वाता पुस्तकालयया परिसरय् तयेमज्यूगु मत सुं सुं स्थानीयपिनिगु दूगु खः । पुस्तकालय परिसरय् द्यःपिनिगु पूजा याइगु खः, पूजा यायेत वनेगु थासय् मृत्युवरण याःम्ह व्यक्तिया झ्वाता तयेगु वा मतयेगु विषय सहलहया विषय मयाःबलय् समस्या जूगु छम्ह स्थानीयं धाःगु दु ।