नेपाली ‘नागरिकता मदुपित नं मतदान याके बिइमाःगु’ –उपेन्द्र यादव

कृष्ण प्रजापति
जनता समाजवादी पार्टीया नायः उपेन्द्र यादवं नागरिकता प्रमाणपत्र मदुपिन्त नं मतदानय् सहभागी याकेमाःगु खँ धाःगु दु । आइतवाः फेसबुकपाखें यादवं नागरिकता प्रमाणपत्र मदुपिनिगु नां मतदाता नांधलखय् दुमथ्याकूगु असंवैधानिक व अन्तर्राष्ट्रिय कानून अःखः जूगु धाःगु दु ।
लखौं जन्मसिद्ध नारिकतय्त राज्यं आःतक नं नागरिकता बिइमफूगु व मधेसय् नं लखौं नागरिकतय्सं नागरिकता प्रमाणपत्र कायेमखंगु यादवं धाःगु दु । नेता यादवं धाःगु दु, ‘थुज्वःगु अवस्थाय् निर्वाचन आयोगं नागरिकता प्रमाणपत्र मदुपिनिगु नां मतदाता नांधलखय् दुमथ्याकूगु, मतदान यायेदइगु अधिकारपाखें वञ्चित याःगु, निर्वाचनया प्रक्रियाय् सामेल जुइगुपाखें रोक्का यायेगु ज्या असंवैधानिक जूगु लिसें अन्तर्राष्ट्रिय कानूनया अःखः व मानवताविरोधी ज्या खः । निरंकुश पंचायतकाल व जुजुया शासनकालय् नं थुज्वःगु व्यवस्था मदु ।’
आः नेपालय् नागरिकता प्रमाणपत्र काःपिं १८ दँ च्वय् च्वंपिं मनूतय्गु नां जक निर्वाचन आयोगं मतदाता नां धलखनय् दुथ्याकेगु यानाः वयाच्वंगु दु । मतदाता नां धलखय् नां दुपिन्सं जक निर्वाचनय् मतदान याये दइ । नागरिकता प्रमाणपत्र मदुगु वा राज्यं बिइमफुगुया हुनिं जक सुं नं व्यक्ति गैरनागरिक जुइमफइगु यादवं धाःगु दु । यादवं धाःगु दु, ‘नागरिकताया प्रमाणपत्र बिइमाःगु दायित्व राज्यया खः, राज्यं थःगु जिम्मेवारी पूमवंकूगु तर उकिया सजायँ जनतां भोगेयायेमाःगु थ्व गुज्वःगु न्याय खः । उकिं फुक्क नेपाली नागरिकतय्गु नां मतदाता नां धलखय् दुथ्याकेमाः ।’ जसपा नायः यादवं निर्वाचन आयोग व सरकारं नागरिकता मदुपिन्त नं मतदाता नां धलखय् दुथ्याकेगु विषयस इलय् हे ध्यान बिइमाःगु धाःगु दु ।