पुस ४ गतेनिसें १२ दँनिसें १८ दँया मचापिनिगु नितिं कोरोना खोप

कृष्ण प्रजापति
स्वास्थ्य व जनसंख्या मन्त्रालयं १२ दँनिसें १८ दँया मचापिन्त पुस ४ गतेनिसें कोभिड १९ विरुद्धया खोप बिइगु जूगु दु ।
स्वास्थ्य सेवा विभागया परिवार कल्याण महाशाखाया प्रमुख डा. विवेककुमार लालया कथं ५७ गू जिल्लाया मचापिन्त मोडेर्ना खोप बिइगु जूगु दु । हिमाली जिल्लालिसें ५७ गू जिल्लाया विद्यालय दुने हे खोपकेन्द्र क्वःछिनाः मचापिन्त खोप बिइगु लालं धाःगु दु । थ्वसिबें न्ह्यः फाइजर खोप अभियान संचालन जूगु जिल्लाया मचापिन्त धाःसा फाइजर खोप बिइगु लालं धाःगु दु । डा. डालं धाःगु दु, ‘फाइजर खोप याकनं हे वयेत्यंगु दु । थ्व खोप वयेधुंकाः फाइजर खोप अभियान न्ह्याकेगु जुइ ।’
स्वास्थ्य सेवा विभागया खोप शाखाया प्रमुख सागर दाहालया कथं थ्यंमथ्यं १८ लख मचापिन्त कोरोनाविरुद्धया खोप बिइगु आज्जु तःगु दु । दाहालं धाःगु दु, ‘हिमाली जिल्लाया हकय् १०० सिबें अप्वः व मेमेगु जिल्लाया हकय् २०० सिबें अप्वः विद्यार्थी दूगु विद्यालयस खोपकेन्द्र क्वःछीगु मापदण्ड दयेकागु दु । थ्वहे मापदण्ड कथं खोपकेन्द्र निर्धारण यानाः मचापिन्त मोडेर्ना खोप बिइगु जुइ ।’ थ्व अभियान पुस १४ गतेतक संचालन जुइ ।  दाहालया कथं आइतवाःतक यानाः थ्यंमथ्यं ३७ लख डोज मोडेर्ना खोप प्राप्त जुइ ।
थ्वसिबें न्ह्यः फाइजर खोपया नितिं क्वःछ्यूगु २४ गू विशेषज्ञ अस्पताल दूगु जिल्लाया मचापिन्त फाइजर खोप बिइगु दाहालं धाःगु दु । थ्वसिबें न्ह्यः स्वास्थ्य मन्त्रालयं येँ, यल, ख्वप, मोरङ, सुनसरी, सप्तरी, पर्सा, झापा, धनुषा, सिन्धुली, चितवन, काभ्रे, कास्की, बागलुङ, रुपन्देही, दाङ, बाँके, सुर्खेत, कैलाली व डडेलधुराया यानाः २४ गू विशेषज्ञ अस्पतालं १२ दँ च्वय् च्वंपिं दीर्घल्वगिपिन्त फाइजर खोप ब्यूगु खः । राष्ट्रिय खोप सल्लहकार समितिं अप्वः जनघनत्व दूगु व थ्वसिबें न्ह्यः फाइजर खोप अभियान संचालन जूगु जिल्लाय् फाइजर खोप बिइत सुझाब ब्यूगु दाहालं धाःगु दु ।
फाइजर खोप अभियान संचालनया नितिं तालिम प्राप्त जनशक्तिया आवश्यक जुइगु, छ्यलाबुलाया नितिं प्राविधिक ल्याखं नं मोडेर्नासिबें थ्व खोप भच्चा फर जूगुलिं अप्वः जनघनत्व दूगु व थ्वसिबें न्ह्यः हे छ्यलाबुलाय् वःगु जिल्लाय् बिइगु निर्णय जूगु दाहालं धाःगु दु । फाइजर खोपया तुलनाय् मोडेर्ना खोप दुर्गम जिल्लाय् यंकेत सहज जुइगु जूगुलिं नं ५७ गू जिल्लाया मचापिन्त मोडेर्ना खोप बिइगु निर्णयस थ्यंगु दाहालं धाःगु दु ।