कृष्ण प्रजापति
नेपाल कम्युनिष्ट पार्टी एमाले माक्र्सवादी व माक्र्सवादी लेनिनवादी निगू पार्टी जानाः २०४८ सालय् नीस्वंगु न्हूगु पार्टी खः । उगु पार्टी स्वयां न्हापा मसाल, मोटो मसाल, नेपाल मजदुर किसान संगठन, निर्मल लामा पक्षया चौथौं महाधिवेशन, चित्रबहादुर केसीया जनमोर्चा नेपाल लिसें मेगु आपालं पार्टीत नेपालय् तैनाथ जुयाच्वंगु खः । अथे खःसां म्हो इलय् हे थुगु पार्टीं राष्टिय छबि धाःसा दयेक यंकल । अथे जूगु कारण कम्युनिष्ट पार्टीत धायेवं हे हुरुक्क जुयाच्वंपिं मजदुर किसानतय्त थुगु पार्टीं थीथी कथंया जन आन्दोलन व किसान आन्दोलन याना जनताया मन त्याकेफुगुलिं खः । अथे खःसां उमिसं थुगु छबियात धाःसा ताः ई तक टिके याना तये मफुत । जब थःपिं २०४८ सालय् जूगु आम निर्वाचनय् प्रमुख प्रतिपक्षी दल कथं स्थापित जुयाः थुकिं नेपाली कांग्रेस थेंज्याःगु शक्तिशाली बहुमत प्राप्त सरकारयात थीथी कथंया सतर्कता याकेगु ज्या जुल, अब्ले तक थुगु पार्टीया इज्जत नं उलि हे च्वन्ह्यानाच्वंगु खः । तर २०५१ सालं जब मध्यावधि निर्वाचन जुया अध्यक्ष मनमोहन अधिकारीया अध्यक्षताय् अल्पमतया सरकार नीस्वन । थ्व इलय्निसें धाःसा धमाधम उमिगु कमी कमजोरीत थौं तकं खने दयाच्वन ।
    
सरकारय् वनाः छु छु नं दइथें तायेक जब नेकपा एमाले सरकारया हकदार जुयाः ज्या यायेगु सुरु यात । अब्लेनिसें एमाले दुने स्वार्थी प्रबृत्ति हाबी जुजुं वनाच्वंगु खनेदत । सहाना प्रधान व झलनाथ खनाल न्हापांखुसि कम्युनिष्ट पार्टीपाखें अन्तरिम सरकारय् २०४७ सालय् हे प्रवेश जूपिं खः । वयां लिपा नं उपिं थीथी इलय् सरकारय् ला वन तर सरकारी ज्याखँ यायेगु बाहेक जनतायात सम्झे बुझे याकेगु व उमिसं धाःथें बहुदलीय जनवाद हयेगु ज्याय् नं उपिं ताःमलात । बहुदलीय जनवाद मदन भण्डारीया सोच खः । जब २०४८ सालं नीस्वंगु थुगु पार्टीं निदँया दुने बहुदलीय जनबादया खँ पित हल । वयां लिपा दासढुंगा हत्याकाण्ड मार्फत् मदन भण्डारीया पतन नं जूवन । वयां लिपा झन् झन् बहुदलीय जनवाद पूँजीवादी प्रजातन्त्र वा नेपाली काग्रेस सरहया लँय् वनाच्वंगु दु । गुगु एमालेया झिक्वःगु धाःगु न्हापांगु अधिवेशनय् नं स्पष्ट याना क्यनाबिल । मेमेगु जिल्लाय् फुक्कं निकाय व जिल्ला संगठनया अधिवेशन फुक्कं न्हापांगु जुइगु अले केन्द्र वा पार्टीया महाधिवेशन धाःसा झिक्वःगु जुइगु थ्व छु ताल खः ?
    
थथे एमाले पार्टी एकीकृत नं मजूगु व माक्र्सवादी व लेनिनवादी नं मजुइधुंकूगु थ्व इलय् जूगु झिक्वःगु महाधिवेश छगू कथं कुम्भमेला थें जक कायम जूवन । उकिं नं महाधिवेशन स्थलय् सहभागी सकलें प्रतिनिधित निभाः पानाः किसि गयाः गैडा स्वयेत जक अप्वः ई फुकजूगु खनेदत । चितवन उमिगु लागिं पाय्छि चाःहिलेगु थाय् कायम जुयाबिल । छन्हु घौछि बाघौं महाधिवेशनया उलेज्या समारोहय् सहभागी जुइवं थःपिनि शतप्रतिशत हे दायित्व पूवंगु तायेकीपिं आपालं पार्टी प्रधिनिधितय्सं अधिवेशन स्थलय् थःपिनि चुनाव प्रचार व उम्मेदवारीया दावी स्वया नं होटेलय् प्याखं हुलेगु नापनापं जंगलय् चाःहिला नौका सवार यायेगु खँय् जक ध्यान अप्वः केन्द्रीय याःगु खनेदु । थ्व स्वयेबलय् पार्टीया महाधिवेशन छगू कथं केपी ओलीया इहिपाया भ्वय् थें जूगु दु । सैद्धान्तिक व राजनीतिक बहस स्वया नं सुयात छु पद बिउसा लय्ताइ, सुयात गन यंकल धाःसा थःगु पहुँच कायम जुइ व गुम्हेसित गथे यात धाःसा चुनाब हे याये म्वायेक महाधिवेशन क्वचायेके फइ धइगु खँय् जक केन्द्रीत जुजुं प्यन्हुया ई फुकावःगु खनेदु ।
    
एमालेया महाधिवेशनय् पदया लागिं भिक्षाटननिसें थीथी कथंया अस्वस्थ बार्गिनिंग तकं जूगु दु । गुलिसितं राजदूत याना बियेगु आश्वासन बियाः केन्द्रीय सदस्य पदं बञ्चित याना बिउगु दु । गुलिसितं सांसद मत्यासां मन्त्री याना बियेगु केपी ओलीया न्हापाया परम्परायात कायम तुं याना तयेगु आश्वासन बिया नं केन्द्रीय पदाधिकारी पदं बञ्चित यायेगु ज्या जूगु दु । अझ गुलिं मनूतय्त ला दां हे बियेगु खँ ब्याका तकं थ्व इलय् केन्द्रीय सदस्य पदं चिइकूगु न्यनेदु । थथे स्वयेगु इलय् पार्टी महाधिवेशन जनताया निंतिं पार्टींपाखें छु छु न्हूगु नीति व सिद्धान्त पारित यानाः लागू यात धाःसा जनताया शासन समाजवाद तकं थ्यंकेफइ धइगु खँय् छुं ध्यान तःगु खनेमदु । बरु गथे जिल अथे थःपिं सदां सर्वेसर्वा जुयाच्वनेगु ताक स्वःगु खनेदु ।
    
नेतृत्वया परिवर्तनया लागिं जक अधिवेशन महाधिवेश जइगु खः । तर केन्द्र तक नं फुक्कं सर्वसम्मति धाधां पंचायती शैलीं थः मनूत जक त्याका वनेगु रणनीति खनेदत । केपी लाइन धकाः स्पष्ट खने दुगु टीमयात त्याकेत जक थ्व महाधिवेशन याःगु खनेदत । मेकथं धायेगु खःसा थःगु बुदिं हाकनं हाकनं हनेथें जक थ्व महाधिवेशन क्वचाःगु खनेदु । जयजयकार याकाः जुजुपिसं थःपिनि बुदिं हनीथें जूगु दु । जनताया खँ ला उच्चारण तकं जूगु मदु । सिद्धान्तय् हिउपा हयेगु व जनवादयात च्वन्ह्याकेगु खँ नं जूगु मदु । न्हूगु नियम, न्हूगु सिद्धान्त व न्हूगु विचारधाराया उत्थान जूगु मदु । जिउसा माओ त्सेतुंग स्वयां तःधंम्ह कम्युनिष्ट जुइथु कथं केपीवाद जक लागू यायेत स्वयाच्वंगु खनेदु । उकिं नं थ्व महाधिवेशन जनताया लागिं छुं भचा हे ज्या वःगु महाधिवेशख खः धइगु छुं छक्वचां धायेगु थाय्मदु । बहुदलीय जनवादया नामय् पतन जूवंगु एमालेया कांग्रेस परस्त नीति नं अन स्पष्ट खने दयेक वःगु दु । राप्रपा व नेपाली कांग्रेस थें हे खिचातानी धाःसा झन स्पष्ट रुपं खने दयेक उजागर जूवंगु दु ।
    
भीमबहादुर रावलं पार्टी अध्यक्ष जुयेगु दाउ त्वमतूगु व मेमेपिं केन्द्रीय सदस्य जुइगु आकांक्षा दुपिसं मतदान यायेत बाध्य याःगु कारणं केपी ओली खने दयेक अध्यक्ष पदय् त्यासां बूगु महसुस यायेत बाध्य जूगु दु । निर्वाचन यायेगु मखु धइगु थःगु अदान त्वादलेवं हे केपी ओली असफल जूगु तायेके माः । मखुत धाःसा तानाशाही जूगु नं स्पष्ट खनेदइ । थःम्हेसियां धयाथें जक पार्टी चले जुइ धइगु मानसिकतां केपी ओलीं ल्हाः सिलेमाःगु अवस्था वःगु दु । थ्व धइगु नं छगू ल्याखं थः पार्टी दुने खने दयेक बहुमत दुम्ह नेता खःसां पपुलर जुइ मफुगु वा लोकप्रियता कमे याये मफुगुया स्पष्ट दसु खः ।
...

All Comments.......


Please Login/Register To Comments