अक्टोबर क्रान्तिया महत्व

कृष्ण प्रजापति
    थौं स्वयां सछि व प्यदँ न्ह्यः रुसय् अक्टोबर क्रान्ति सम्पन्न जूगु खः । तर स्वीनिदँ न्ह्यः उगु देय् झिंन्याकू कुचा जुइक पतन जूवन । उकिया मू कारण धाःसा समाजवादी विचारधाराया थासय् पूँजीवादं थाय् त्यःगुलिं खः । थ्व संसारय् न्हापांगु वा अभूतपूर्व समाजवादी क्रान्ति खः । थुकिं पेरिस कम्युन धुंक न्हापांखुसि विश्वय् समाजवादी राष्टया निर्माण याःगु खः । थीथी प्रान्तय् विभक्त राज्ययात छथाय् स्वाना सोभियत संघ गठन याःगु खः । उकिं सर्वहारा वर्गपाखें नं राज्यसत्ता कब्जा यानाः सञ्चालन यायेफु धइगु इतिहास कायम याःगु खः । तर पेरिसटोइका व ग्लास्टोनोभ्स थेंज्याःगु न्हूगु पूँजीवादी रणनीतिया कारणं विश्वया स्वब्वय् छब्व तःधंगु थाय् त्यलाच्वंगु समाजवादी राष्ट सोभियत संघ पतन जूवन । उकिं नं आपालं मनूतय्सं ज्ञान कायेमाःगु अवस्था ब्वलंगु दु । लेनिनया नेतृत्वय् न्ह्याकूगु फेब्रअरी क्रान्ति लिपा न्ह्यज्याःगु अक्टोबर समाजवादी क्रान्तिं विश्वया स्वब्वय् छक्वः भूभाग दुगु विशाल भूति रुसय् सोभियत संघ स्थापना याःगु खः ।
    अक्टोबर क्रान्ति धाःसां अन्तर्राष्टिय पात्रो कथं नोभेम्बर सुरु जूगु दु । थ्व इलय् रुसी पात्रो कथं अक्टोबर तिनि । उकिं नं रुसय् जूगु थौं स्वयां सछि व प्यदँ अर्थात् सन् १९१७ नोभेम्बर महिनाय् जूगु क्रान्तियात अनया मान्यता कथं अक्टोबर क्रान्ति धायेगु यानाच्वंगु खः । अक्टोबर क्रान्ति छकः असफल जूसां उकियात धाःसा मनूतय्सं सदां लुमंकाच्वंगु दु । सोभियत रुस दुने खने दयेका वःपिं खुश्चेभ, गोर्भाचोभ थेंज्याःपिं प्रतिक्रियावादी नापं संसोधनवादीतय्गु कारणं ७२ दँ तक नियमित चले जुयाच्वगु सोभियत संघ पतन जूवन । संसारय् दक्कलय् न्हापां न्हापांगु विश्व युद्ध लिपा स्थापना जूगु समाजवादी देय् धाःसा सोभियत संघ खः । माक्र्सवादी सिद्धान्त कथं सर्वहारा वर्गं नं राज्यसत्ता कब्जा यायेफु धइगु प्रयोगात्मक अभ्यास थुगु क्रान्तिपाखें प्रमाणित जूगु खः । उकियात लेनिन, स्टालिन लगायत न्हूगु पुस्तां नं बांलाक चले यात । तर उकि जब पश्चिमा प्रभाव अप्वः जुल वा पूँजीवादी संयन्त्र दुत हल वयां लिपा धाःसा सोभियत संघ दुनंदुनं फ्वाका जुइधुंकूगु जुयाच्वन । गुकिं यानाः खुश्चेभया पालाय् पूर्ण रुपं समाजवादयात पतन यानाः अन खुल्ला शासन पद्धति नालाकाल ।
    अक्टोबर क्रान्तिं सोभियत रुसय् राज्य व शिक्षा लागां धर्मयात अलग्ग तःगु खः । अथेहे उत्पादनया मूख्य मूख्य साधनत राष्टियकरण यानाः आपालं उत्पादन यायेगु क्षमता ब्वलंकूगु खः । नापनापं विदेशी पूँजीयात देशहीतया लागिं छ्यलाः राष्टियकरण यानाः देशयात आर्थिक व सामाजिक रुपं आमूल परिवर्तन याःगु खः । थौंकन्हय् समाजवादी क्रान्तिं अस्थायी हार फये मालेवं सोभियत संघया जनतानापं मेमेगु राष्टया जनतां नं आपालं दुःख सिइमाःगु अवस्था ब्वलंगु दु । उकिं नं वास्तबय् समाजवादी ब्यवस्था उत्तम राज्य ब्यवस्था जुयाच्वन धइगु अनया जनतां थौं वया महसुस यानाच्वंगु दु । नयेत, त्वनेत व तिइत तकं थाकुगु स्थिति ब्वलना वयेवं थ्व महसुस जूगु दु । असमानता आकास व जमीनया थें तब्या जुजुं वनाच्वंगु दु । संसारया प्रतिक्रियावादीतय्सं न्ह्याब्लें धइथें समाजवादयात असफल यायेत स्वयाच्वनी । थ्वहे लिच्वः कथं सोभियत संघ पतन जूवंगु खः ।
    क्रान्तिकारी पार्टीं जक समाजवादयात निरन्तरता बिये फइगु जुयाः थौं चीन, क्यूवा, उत्तर कोरिया थेंज्याःगु राष्टया कम्युनिष्ट पार्टी थेंज्याःगु सबल व जनतायात नेतृत्व यायेफुगु राजनीतिक पार्टीया आवश्यकता जुयाच्वंगु दु । थ्व सन्दर्भय् नेपाःया राजनीतिक परिबेशयात दुवाला स्वये माल धाःसा सुंनं कम्युनिष्ट पार्टी कथं न्ह्यःने वये मफुगु वास्तविकता स्पष्ट खनेदइ । झिदँतक जनयुद्ध याना सत्ताय् थ्यंपिं राजनीतिक पार्टी स्वयं पूँजीवादय् पतन जूवंगु व उकि दुनेया असन्तोष पक्षं बिद्रोह यायां पार्टी कुचाकुचा याना वनाच्वंगु खँयात ध्यान तयेगु इलय् देवकोटां धाःथें नेपालय् क्रान्ति अझ तापागु विषय तिनि । खाली थन शासक वर्गया जक परिवर्तन जुयाच्वंगु दु । वास्तबय् कम्युनिष्ट पार्टी दुने सक्षम उत्तराधिकारी तयार याये मफुगु कारणं पश्चिमा देय्या प्रभावय् चले जुइपिं मिखाइल गोर्भाचोभ व खुश्चेप थेंज्याःपिं संशोधनवादी धारया मनूत तयार जुया वयेवं सोभियात संघ पतन जूगु खः । तर नोभेम्बर महिनाया अक्टोबर क्रान्ति अमर तिनि ।
    तत्कालीन बोल्सेभिक पार्टीं सोभियत संघ स्थापना यायेत अक्टोबर क्रान्ति याःगु खः । तर अन समाजवादी रुस पतन जुइधुंकूगु दु । ७२ दँ बांलाक चले जुयाः पतन जूवंगु सोभियत संघपाखें नेपाली जनता व विश्वया सर्वहारा वर्गं सयेकेमाःगु आपालं खँ दु । उकियात ब्यवस्थित रुपं चले यायेगु ज्याखं थौं महत्वपूर्ण जुयाबिउगु दु । उकिं नं अक्टोबर समाजवादी क्रान्ति दिवस थौं विश्वया थीथी देसय् तःजिक न्यायेकाच्वंगु दु । समाजवाद उन्मुख धाःगु झीगु थेंज्याःगु पूँजीवादी धार क्वबियाच्वंगु राष्टं नं थीथी कथं समाजवादी राष्ट सोभियत संघया इतिहास दुवाला स्वयेमाःगु अवस्था ब्वलनाच्वंगु दु । खाली सत्ताया लागिं जक खिचा ल्वाइथें ल्वाइपिं झी सांसद, मन्त्री नापं न्यायाधीसतय्सं सोभियत संघया जनतायात सोभियात संघपाखें यानाक्यंगु बांलाःगु ज्याया दसु न्ह्यब्वया क्यनेमाःगु दु ।
    सदियौंनिसें रुसय् चले जुयाच्वंगु जार तन्त्रयात समूल नष्ट यानाः सुरु जूगु अक्टोबर समाजवादी क्रान्ति लिपा सोभियत संघं संसारयात सर्वहारा वर्गं शासन सत्ता चले यायेफु धइगु बांलाक क्यना बिउगु खः । तर संसार परिवर्तनशील खः । अन उकथं उथल पुथल धाःसा जुया हे च्वनी । थ्वहे झ्वलय् सन् १९९० पाखें रुसय् पूँजीवादी धार चर्को खने दयेवं थ्व समस्या ब्बलंगु खः । झीगु देसय् नं छगू जक सक्ष्म कम्युनिष्ट पार्टी स्थापना जुयाः क्रान्तिया लागिं तयार यायेगु खःसा थन नं समाजवादी नेपाल स्थापना सम्भव जू । तर २०४६ सालया जनआन्दोलन लिपा सम्झौताय् सीमित यानाः समाजवादी क्रान्तियात पन । थ्वहे राजनीतिक पार्टीतय् कमजोरी खः । अब्ले शासन याइपिं शासक विरुद्ध कम्युनिष्ट मोर्चा दयेकाः क्रान्तिइ वंगु खःसा झिदँ तक जनयुद्ध याना पतन जूथें मजुइगु खइ । क्रान्तिकारी धार तयार जुयाच्वंगु इलय् लाक वा नँयात क्वःगु इलय् लाक छथु अप्वः दायाः आकारय् वयेकेत मस्वःगु कारणं थौं क्रान्ति झी स्वयां तापानाच्वंगु खः । तर झी निरास धाःसा चाये मजिउ । इमान्दारपूर्वक जनताया सेवा यायां बहुसंख्यक जनतायात क्रान्ति व समाजवादया महत्व थुइके फत धाःसा समाजवादी नेपाल स्थापना यायेगु लक्ष्य असम्भव धाःसा मखु ।