डब्लुएनओ पलिस्था जूगु न्ह्यसः लिसः कासाया न्हापांगु सेमीफाइनल क्वचाल

कृष्ण प्रजापति
वल्र्ड नेवाः अर्गनाइजेसन (डब्लुएनओ) पलिस्था जूगु १० दँ क्यंगु लसताय् न्ह्यानाच्वंगु हलिं नेवाः न्ह्यसः लिसः कासाया न्हापांगु सेमीफाइनल क्वचाःगु दु । गुंगू चरण तकया कासा जूम अनलाइन प्रविधिं भर्चुअल रुपं न्ह्यानाच्वंगु खःसा सेमीफाइनलया कासा भौतिक उपस्थितिइ जूगु खः । स्वंगूगु चरणअन्तर्गत न्हापांगु सेमीफाइनल थनया जगतसुन्दर ब्वनेकुथिइ जूगु खः । गुलाफ स्वां, धकिंचा स्वां, धूस्वां व अजूस्वां पुचःया दथुइ जूगु सेमीफाइनलय् अजू स्वां ८५ व गुलाफ स्वां ६५ ल्याः कयाः छसिकथं न्हाप व लिउ जुयाः फाइनलय् दुहां वनेत ताःलाःगु दु । सेमीफाइनलनिसेंया कासा भौतिक रुपं यायेगु ग्वसाः खलःया क्वःछिनाकथं ब्वनेकुथिइ उगु कासा जूगु खः । कासाया संचालन न्ह्यसः लिसः कासा प्रचार प्रसार समितिया लिउ कजि उदेन न्हूसाय्मिं न्ह्याकादीगु खःसा निगू चरणया कास बेलायतं संयुक्त श्रेष्ठं जूम प्रविधिपाखें न्ह्याकादीगु खः ।
    न्हापांगु सेमीफाइनलय् वरिष्ठ पत्रकार ‘नेपालभाषा टाइम्स’ न्हिपौया सम्पादक सुरेश मानन्धर व उज्यालो नेटवर्कया नेपालभाषा ज्याझ्वः संयोजक सिल्भिया राजोपाध्याय निर्णायकमण्डलय् च्वनादीगु खः । निगूगु सेमीफाइनल कासा वइगु कात्तिक २७ गते, फाइनल कासा मंसिर ४ गते व समापन ज्याझ्वः मंसिर ११ गते जुइगु ग्वसाः खलकं जानकारी बिउगु दु । कासाय् न्हापयात ६०० अमेरिकी डलर, लिउयात ४५० अमेरिकी डलर, लियांलिउयात ३०० अमेरिकी डलर व हःपाःकथं १५० अमेरिकी डलर सिरपाः बीगु न्ह्यसः लिसः कासा मूू ग्वसाः खलःया कजि विमलमान श्रेष्ठं जानकारी बियादीगु दु ।