कृष्ण प्रजापति
ब्राजिलया लिजेण्ड कासामि पेलेया कीर्तिमान त्वाःथलाः मेसी दक्षिण अमेरिकाया सर्वाधिक गोल याःम्ह कासामि जूगु दु । दक्षिण अमेरिकाय् ब्राजिलया कासामि पेलें ९२ कासा म्हिताः यानातःगु ७७ गोलया कीर्तिमानं अर्जेन्टिनाया कासामि लियोनल मेसीं शुक्रवाः त्वाःथःगु खः । मेसीं शुक्रवाः सुथय् जूगु विश्वकप छनोट कासाय् बोलिभियायात बुकेगु झ्वलय् ह्याट्रिक यानाः थःगु गोल ल्याः ७९ थ्यंकूगु खः ।
मेसीं १५३ गू कासा म्हिताः थ्व कीर्तिमान दयेकूगु खः । कासाय् अर्जेन्टिनां बोलिभियायात मेसीया ह्याट्रिकया ग्वाहालिं ३–० गोलं बुकूगु दु । विश्वय् अन्तर्राष्ट्रिय फुटबलय् दकलय् अप्वः गोल याःम्ह कासामि धाःसा पोर्चुगलया क्रिष्टियानो रोनाल्डो खः । रोनाल्डों १११ गोल याःगु दु । मेसी थ्व धलखय् खुगूगु थासय् दु । विश्वकप छनोट अन्तर्गत शुक्रवाः जूगु मेगु कासाय् ब्राजिलं पेरुयात २–० गोलं बुकल । ब्राजिलया निंतिं नेयमार व एभरटन रिबेरों गोल याःगु खः । अथे हे विश्वकप छनोट अन्तर्गत शुक्रवाः हे जूगु कासाय् कोलम्बियां चिलीयात, उरुग्वें इक्वेडरयात व पाराग्वें भेनेजुएलायात बुकल ।

...

All Comments.......


Please Login/Register To Comments