ABCD खबर

 

चीन विश्वय् नम्बर १ राष्ट जुइगु लँपुइ दु । छगू इलय् साम्राज्यवादी राष्ट जापानं अतिक्रमण यानातःगु कारणं तसकं क्वह्यंगु राष्ट कथं कयातःगु थुगु राष्टय् समाजवादी गणतन्त्र स्थापना जूसानिसें दू्रत गतिं विकास निर्माण व प्रगतिया लँपू चाःगु खः । विश्वयात माःगु प्रबृत्ति, खाद्य वस्तुया उत्पादन, मांसहारी भोजन नापं अनेकौं बस्तु व सामग्रीया उत्पादनय् नं चीन न्ह्यलुवा जुयाच्वंगु ताः ई दये धुंकल । आः वया कोभिडया वासः पत्ता लगे यायेगु ज्याय् नं चीन न्ह्यःने लानाच्वंगु क्यंगु दु । आः तकतिनि हे जक चीनं कोभिडया वासः पत्ता लगे याःगु दु । चीनया खोप उत्पादन केन्द्र चाइना नेशनल बायोटेक ग्रुप (सीएनबीजी) पाखें कोभिड १९ या संक्रमणं लंपिं ब्यक्तिया प्लाज्मापाखें विकास याःगु मानव इम्युनिग्लोबुलिनय् आधारित वासःयात चिकित्सकीय परीक्षण चूलाकूगु घोषणा याःगु दु । थुगु घोषणां हाकनं छक्वः अमेरिकी साम्राज्यवादयात थारा न्हुइका बिउगु दु । ताः ई न्ह्यःनिसें चीन व अमेरिका दथुइ टक्कर दु ।

   

अमेरिकां फक्वः अमेरिकां चीनपाखें कोरोना भाइरसया जिवाणु सरे जूगु धइकथं चीन केन्द्रीत जुयाः अध्ययन अनुसन्धान यायेमाःगु माग विश्व स्वास्थ्य संगठन डब्लूएचओ समक्ष यानाच्वंगु दु । मेखे चीनं धाःसा अमेरिकां छुं छगू कारखानाय् कोरोना भाइरस उत्पादन यानाः चीनय् हयाः त्वतूगु जुइफु धइकथं चीनय् जक मखु थ्व विषयय् अमेरिका व मेमेगु देसय् नं अध्ययन यायेमाःगु माग न्ह्यब्वयाच्वंगु दु । थज्याःगु राजनीतिक व कुटनीतिक विषययात कयाः बैज्ञानिक रुपं अध्ययन याना स्वये मालाच्वंगु हे इलय् चीनं थःपिसं परीक्षण याना उत्पादन याःगु वासःयात चाइना अन्तर्राष्टिय सेवा ब्यापार मेलाय् सार्वजनिक याःगु दु । थुकथं चीनं न्हू न्हूगु प्रविधि व बैज्ञानिक उपकरण छ्यला थुकियात नियन्त्रण यायेगु यानाच्वंगु दु । चीन न्यंंकं लकडाउन यानाः चीनय् ब्यापक रुपं खनेदुगु कोरोनायात छुं द्धः मनूत जक सीवं हे अन नियन्त्रणय् हयेत ताःलाःगु खः । आः नं चीनय् उलि अप्वः मनू कोरोनाया कारणं सिनाच्वंगु मदु । विश्वय् दक्कलय् अप्वः जनसंख्या दुगु घना बस्ती दुगु थाय् जुया नं चीनं समाजवादी ब्यवस्थायात नालातःगु देय् जूगु कारणं देय् दुनेया जनतायात अनुशासनय् तयेत ताःलात । थज्याःगु अुनुशासन कायम याये मफुगु कारणं इटलीइ भयावन रुप क्वन ।

चीनं कोरोना विरुद्धया वासः नापं हे खुगू महामारी प्रतिरोधी उत्पादन नं सार्वजनिक याःगु दु । व मध्ये निगू खोप कोरोना भाइरसया जैविक उत्परिवर्तन पनेगु निंतिं प्रभावकारी जुइगु धाःगु दु । अध्ययन अनुसन्धान व बैज्ञानिक आविस्कारय् नं न्ह्यःने लाये धुंकूगु चीन विश्वया शक्ति राष्ट मध्ये नं छगू खः । उलि जक मखु अन समाजवादी ब्यवस्था लागू यानाः सकल

जनतायात नये त्वनेया समस्या मदयेक, न्हिं निछां हे ला वा न्याः नयेत तकं गाक्क उत्पादन यायेगु व विश्व बजार थःपिनि ल्हातय् लाकेत तकं ताः लानाच्वंगु देय् जुयाबिउगु दु । थथे चीनया उत्पादनयात विश्वया फुक्कं हे देसं प्रशंसा यानाच्वंगु दु । अमेरिकी साम्राज्यवादं धाःसा चीनया प्रगतियात छुं नं हालतय् ययेकूगु मदु । अमेरिकी नीति एमसीसी लागु यानाः जूसां थन व विश्वया कमजोर राष्टय् थःपिनि हैकम कायम हे याना तयेगु उमिगु सोच दु । तर थ्व सोचया दथुइ हे चीनं चलाखी ज्या नं न्ह्याकाच्वंगु दु ।

चीनया अनुसन्धान विभाग सीएनबीजीं सन् २०२० या सुरुंनिसें हे कोरोनाया संक्रमणं मुक्त जूपिं ब्यक्तिं दान याःगु प्लाज्मापाखें वासः उत्पादन याना वयाच्वंगु खः । संक्रमणं च्यापे याःपिं विरामीयात थज्याःगु प्रयोग नं तसकं प्रभावकारी जूगु खँ धाःगु दु । चिनियाँ चिकित्सकत वनाच्वंगु थीथी देसय् उमिसं थुगु वासःयात प्रयोग यानाच्वंगु दु । आः सार्वजनिक याःगु वासः नं प्लाज्मा उत्पादनया हे सिद्धान्तय् आधारिक खः । थुकिं नं भाइरस कमजोर यायेत ग्वाहालि याइगु अनुमान यानातःगु दु । तर थ्व वासः तसकं थिके जुइफुगु कारणं यानाः नं तसकं हे विरामी जूपिं व कडा खालया थुगु कोरोना भाइरसं ग्रष्ट जूपिं मनूतय् लागिं जक थ्व वासः प्रयोग हइगु खनेदु । थथे स्वयेबलय् विश्वयात लँ क्यनेगु ज्या चीनं यानाक्यंगु दु धायेमाः । थुलि मछिं विश्वयात ग्वाहालि यानाच्वंगु देय् चीनय् आः कोरोनाया ल्वगित दुर्लभ जुजुं वनाच्वंगु दु । अथे खःसां विश्वयात हे लँ क्यनेगु ज्या धाःसा थुगु देसं यानाच्वंगु दु । थज्याःगु इलय् नेपालय् धाःसा खोप पूवंकेत न्हय्ला थप ई बीगु अनुमान यानाच्वंगु दु । झण्डै निगु करोड जनतां खोप कायेधुंकूगु देय् नेपालय् पूवंक जनतां खोप कायेत थप न्हय्ला बीतिनि धाःगु दु ।

सरकारं कोरोना भाइरस नियन्त्रण व रोकथामया लागिं खरिद, अनुदान व कोभ्याक्स सुविधापाखें खोप हया बियाच्वंगु खः । भारतं हःगु खोप, चीनं वःगु खोप जक मखु कि आः अमेरिकां बिउगु खोपयात नं थन प्रयोगय् हःगु दु । छगू हे जक थासं कायेगु इलय् निश्चित अवधि दुने खोपया मात्र पूवंके मफइगु व पक्षपात नं याःगु खने दइगुयात ध्यानय् तयाः नं थज्याःगु प्रकृति न्हयःने यंकाच्वंगु खनेदु । थथे स्वयेगु खःसा आः नेपालय् गुलि नं सुविधाया खोप हःगु खः । थ्व विश्वय् परीक्षण यानालिं लिपा जक प्रमाणित जुया वःगु कारणं थुकि शंका उपशंका यायेमाःगु छुं नं मदु । उकिं नं हरेक नागरिकं थुगु खोप निर्धक्क जुया कायेगु हे बांलाःगु पक्ष जूगु दु ।

म्हिगः तक सरकारयात असफल यायेत, राजनीतिक दलयात विश्वास मदयेकेत आदि

इत्यादिया लागिं नं मानवीय सेवा थेंज्याःगु ल्वय्लिसें ल्याये माःगु ईयात प्रयोग यायेगु यानाच्वंगु खः । आः अथे मयासें यदि विश्वयात हे ख्यानाच्वंगु कोरोना भाइरस कोभिड १९ पाखें सारा संसारयात मुक्त यानाः म्हिगःया सुन्दर संसारयात हाकनं छक्वः कायम यायेगु खःत धाःसा म्हिगः थें हे झी सकलें जानाः लकडाउनया मारयात फयेगु व थीथी कथं असन्तोष ब्यक्त यायेगु काइदायात नं ध्यानय् तयाः स्वयेमाःगु खनेदु । मखु झी थः हे जक म्वाये, थः हे जक नये धइगु स्वार्थी भावनां ज्या यायेगु खःत धाःसा म्हिगः झी गथे तःधंगु नोक्सानय् लाःवंगु खः, वा झी नेपाःमित आपालं सिनाच्वंगु स्वयेमाःगु खः । थौं स्वयां कन्हय् झन् भयावह स्थिति मवइ धाये फइमखु ।