कोभिडया अनुसन्धानय् पक्षपात

कृष्ण प्रजापति
विश्वब्यापी रुपं ब्वलंगु कोभिड १९ कोरोना भाइरस महामारीया कारण व उकिया उत्पत्तिया बारे अमेरिका व चीनलिसें विश्वया फुक्कं देसं थः थःगु हे ल्याखं अनुसन्धान सुरु यानाच्वंगु दु । चीनया उहान शहरपाखें सुरु जूगु धकाः हल्ला यानातःगु उगु ल्वय् चीन लिपा विश्वन्यंकं न्यना वनेवं थ्व ल्वय् वास्तवय् चीनय् सुरु जूगु मखुसें विश्वया गुगुं देसय् सुरु जुयाः चीनय् हयाः त्वतुगु भाइरस जुइफुगु अनुमान याःगु खः । आः नं थ्व खँय् स्पष्ट धारणा धाःसा विश्वया जनतायात बीफुगु मदुनि । अथे खःसां थ्व विषयय् अनुसन्धान यायेगु धकाः अमेरिकां चीनयात दवाव बियाच्वंगु व चीनं थुकिया प्रतिवाद यानाच्वंगु खँयात ध्यानय् तया स्वयेगु खःसा कोभिड उत्पत्ति व उकिया फैलावटया खँय् नं राजनीतिक रुपं पक्षपात जूगु खनेदु ।
    साम्राज्यवादी देय् अमेरिकां न्हापा न्हापा नं अज्याःगु कथंया हे ल्वय् न्यंकीपिं भाइरस, जिवाणु युद्ध सुरु याये धुंकूगु इतिहास दुगु कारणं नं थ्व इलय् विश्वन्यंकं न्यानाच्वंगु कोरोना भाइरस कोभिड १९ नं अज्याःगु छगू वनावटी वा अमेरिकाया गुगुं कारखानाय् तयार यानाः उकियात चीनया उहान प्रान्तय् चाःहिउ वनेगु झ्वलय् चीनय् त्वतुगु नं जुइफुगु अनुमान याःगु खः । भियतनाम, लाओस, अफगानीस्तानय् अमेरिकी आक्रमण जूगु इलय् बन्दूक, बम नापनापं थज्याःगु मनूयात ल्वय् लाकीगु जिवाणु भाइरस युद्ध नं सुरु जूगु खः । थ्व अमेरिकी कारखानाय् उत्पादन याःपिं आक्रमक जिवाणु खः । उकिं नं बन्दूक व बमं स्वया नं तःधंगु नोक्सान यानाक्यंगु खः । थ्व छगू ल्याखं करोडौं करोडया ल्याखय् दइपिं जिवाणुतय्सं खने मदयेक मनू दुनेया न्ह्यपु, नुगः, स्येँ, स्वँ व सेंला हे नइगुलिं थ्व जिवाणु खतरनाक ।
    कोभिड १९ या उत्पात्ति बारे संयुक्त राज्य अमेरिकाया गुप्तचार विभागं तयार याःगु प्रतिवेदन विज्ञानय् आधारित मजूगु विज्ञतय्सं धाःगु दु । खाली हैकमया भरय् व तःधंगु शक्तिया आँडय् तयार याःगु उगु प्रतिवेदन उलि विश्वास याये बहः मजूगु कारणं थुकियात पक्षपातपूर्ण धकाः दर्जा बिउगु दु । चिनियाँ अध्ययतातय्सं ला उगु अमेरिकी प्रतिवदेनयात दोष फुक्कं चीनयात क्वबिइका अमेरिका थः दोष मुक्त जुइगु ल्याखं तयार याःगु प्रतिवेदनया संज्ञा बिउगु दु । ९० न्हू दुने तयार यायेमाःगु राष्टपति जो बाइडेनया निर्देशन कथं सार्वजनिक याःगु उगु प्रतिवेदन संसारयात छक्वः हाकनं कोभिड थें हे लहर वयेका बिउगु दु । चीनया बदनाम यायेगु ल्याखं तयार याःगु उगु प्रतिवेदनं अमेरिकायात क्यना धस्वाकूगु ल्हाःपतिं धाक्वः त्वाःल्यायेगु व दोष फुक्कं मेपिनिगु ब्वहलय् क्वबियेकेगु प्रायोजनय् लालायित जूगु खनेदु ।
    जटिल भाषा प्रयोग यानाः उगु प्रतिवेदनं अमेरिकी साम्राज्यवादयात पृथपोषण यायेगु राजनीतिक हतियार कथं ज्या यानाच्वंगु खनेदु । छगू ल्याखं चीन विरोधी गतिविधि यायेगु झ्वलय् कोरोना भाइरस कोभिड १९ या जिवाणु तयार यानाः चीनयात बदनाम यायेगु ल्याखं चीनया उहान शहरय् त्वतूगु जुइमाः धइगु थुकिं नं स्पष्ट खने दयावःगु दु । अमेरिकी साम्राज्यवाद व चिनियाँ समाजवादी गणतन्त्रया दथुइ विश्वय् गनं खने मदइ कथं अघोषित संघर्ष न्ह्यानाच्वंगु दु । उत्पादनया साधन फुक्कं राष्टियकरण यानाः राष्टं हे फुक्कं नागरिकतय्त नयेगु, त्वनेगु, पुनेगु व बसोबासया ग्यारेन्टी यानातःगु चीन थेंज्याःगु सार्वभौमसत्तासम्पन्न स्वतन्त्र समाजवादी मुलुकया लागिं रक्षा मामला तसकं तःधंगु सवाल खः । उकिं नं चीनयात कयाः सुनानं छुं धाल धाःसा उकियात प्रतिवाद यायेगु हक व अधिकार चीन थःयाके सुरक्षित हे दयाच्वनी । थौं नं उलि जक जूगु खः ।
    कोरोना भाइरसया जिवाणुया उत्पादन छुं छगू कारखानाय् जूगु खः वा प्राकृतिक रुपं जनावरपाखें मनूयाके सरे जुया सुरु जूगु खः धइगु अझ स्पष्ट धायेफुगु स्थिति मदुनि । प्रतिवेदनय् धाःसा जैविक हतियार कथं विकास जूगु मखु धकाः अमेरिकां न्हापा न्हापा भियतनाम, लाओस व मेमेगु देय् ध्वस्त यायेगु कुतः जूगु इलय् प्रयोग यानाक्यंगु जिवाणु आक्रमणयात थौं अस्वीकार यायेगु असफल कुतः यानाच्वंगु दु । अमेरिकी गुप्तचर विभागं पिथंगु प्रतिवेदनय् चिनियाँ अधिकारीतय्त कोभिड न्यने न्ह्यः थ्व विषयय् छुं नं वाः मचाःगु नं निष्कर्ष पिकाःगु दु । चिकंलापाचां मनूयाके सरे जूगु खः वा जन्तु जनावरपाखें मनूयाके सरे जूगु खः धइगु खँ अझ थप अनुसन्धान यायेमाःगु विषय जूगु दु । थज्याःगु इलय् नं विज्ञानयात बः बियाः प्रतिवेदन तयार यायेमाःगु त्वताः राजनीतिक पूर्वाग्रहयात ध्यानय् तयाः ज्या जुयाच्वंगु स्वयेगु इलय् अमेरिकी साम्राज्यवादं विश्वयात ख्यायेत जकं थ्व भाइरसया उत्पादन याःगु मखुला धकाः अझ शंका आशंका यायेमाःगु ई वःगु दु ।
    चीनं धाःसा अमेरिकी गुप्तचर निकायतय्गु प्रतिवेदन प्रति असहमत क्यंसें अन्तर्राष्टिय समुदायं उकि ब्यक्त याःगु विमतिबारे विचार यायेत व थ्व विषययात राजनीतिकरण मयायेत अमेरिकायात आग्रह यानाच्वंगु दु । अमेरिकाय् च्वंगु चीनियाँ दूतावासं वंगु शनिवाः जारी याःगु वक्तब्यय् थुगु भाइरसया उत्पत्तिया मुद्दा राजनीतिक मखु, विज्ञानया मुद्दा जूगु व सुयातं दोषी तायेकेगु वा द्धपं बियेगु विषय मजूगु न्ह्यथनातःगु दु । चीनं भाइरस उत्पत्तिबारेया न्हापांगु चरणया अध्ययनया विस्तारया रुपं भविष्यय् थप मेगु अध्ययनया आवश्यकता दुगु व छगु जक देसय् मखुसें थीथी देसय् थुकिया उत्पत्तिया बारे अध्ययन जुइमाःगु माग यानाच्वंगु दु । थुकि धाःसा मेगु देय्या बैज्ञानिकत नं सहमती जूगु दु । थज्याःगु हे इलय् कोरोना भाइरसया स्वंगूगु लहर नं वयेफुगु ख्याच्वः बियाहःगु दु । मनूतय् ब्यवहारय् थ्व भर परे जुइगु बैज्ञानिकतय् तर्क दु ।
    स्वास्थ्य क्षेत्रया विज्ञतय् कथं लछिया दुने स्वंगूगु लहर वइ वा मवइ धइगु स्पष्ट खनेदइ । मनूतय् ब्यवहारय् थ्व भर परे जुइ । मनूतय्सं सामाजिक दुरी कायम याना ज्या यानाच्वंगु मदु । मास्क अनिवार्य तयाच्वंगु मदु । उकिं नं थ्व खतरा ला दुगु हे जुल । निषेधाज्ञा छ्वासुया वनाच्वंगु व जनस्वास्थ्यया सुरक्षा स्वास्थ्य मापदण्ड नाले मफुगु कारणं स्वंगूगु लहरया खतरा दुगु विज्ञतय् मत दु । साउननिसें च्वन्ह्याना च्वंगु कोरोनाया संक्रमण दर आः नं उलि हे च्वन्ह्याना वनाच्वंगु दनि । उकिं नं खतरा म्हो जुइगु स्वयां अप्वया वनाच्वंगु दु । थ्व नेपालय् जक मखुसें विश्वया मापन खः । सरकारं जक खोप, सुइ, वासः इनेवं ल्वय् रोकथाम जुइ धइगु मखु । सारा जनता सचेत जुइफत धाःसा थ्व ल्वय् नियन्त्रण यायेफइ ।