नेपालभाषां एम.ए. नियमित कक्षा सञ्चालन जूगु ४१ दँ क्यन

कृष्ण प्रजापति
नेपालभाषा केन्द्रीय विभागं  एम.ए. नियमित कक्षा सञ्चालन जूगु ४१ दँ क्यंगु लसताय् शुक्रवाः विभागय् थीथी ज्याझ्वः याःगु दु ।
उगुहे लसताय् एमफिल–पिएचडी कक्षा न्ह्याकेगु, सत्यहेरा सिरपाः व न्यागू सफूत सिद्धिदास महाःजुया थीथी च्वसूत मुना ‘सिद्धिमाः’, आरिक माला प्रधानया ‘हरिप्रसाद प्रधानया व्यक्तित्व व योगदान’, किरण केन रञ्जितया निगू सफू ‘तन्त्राख्यान’ व अमेरिकाय् नेवाः प्रकाशन, नापं लुमन्ति दबू गुंगूगु ल्याः मूपाहाँ व पाहाँपिं त्रिभुवन विश्वविद्यालयया उपकुलपति प्रा.डा. धर्मकान्त बास्तोला, येँ महानगर पालिकाया मेयर बिद्यासुन्दर शाक्य, उपमेयर हरिप्रभा खड्गी श्रेष्ठ, पाटन संयुक्त क्याम्पस प्रमुख प्रा.डा. लक्ष्मण कुँवर व विभागया प्रमुख प्रा.डा. ओमकारेश्वर श्रेष्ठपिंन्सं मंकाः पितब्वज्या यानादीगु खः ।
अथेहे, उत्कृष्ट शोधग्रन्थ व अभिलेख सम्पादनयात बीगु यानावयाच्वंगु सत्यहेरा सिरपाः कविन श्रेष्ठयात झिद्वः तका व हनापौ विभागया प्रमुख व दाता उजेली डंगोलया प्रतिनिधिकथं हेराकाजी महर्जनं लःल्हायानादीगु खः । भाषा साहित्य संस्कृति राष्ट्रया पहिचान खः धासें मेयर शाक्यं विभागय् दुगु थ्यंमथ्यं स्वीद्वः सफूत डिजिटिलाइज यायेया नितिं ई लाइब्रेरीया विकास यायेत कामनपां फ्याःगु न्यय्गु लख बजेट विनियोजनयात याकनं कार्यान्वयन यायेत इनाप यानादिल ।
जग बल्लाःसा जक फुक्क बल्लाइ धासें भाय् विकास यायेया नितिं खसनेपाली, अंग्रेजी विषयथें  छगू तगिंनिसें च्यागू तगिंतक्क सामुदायिक स्कूलय् थुगुसिनिसें नेपालभाषा विषय अनिवार्य जुइधुंकूगुनं न्ह्यथना दिल । वर्ल्ड नेवाः अर्गनाइजेशनया नायः सिजन श्रेष्ठं केन्द्रीय विभागया नितिं छ्वयाहःगु ल्यापटप किरण केन रञ्जितं विभागया प्रमुख प्रा.डा. श्रेष्ठयात लःल्हाना दिल । उगुहे ज्याझ्वलय् लुमन्ति दबूया वर्तमान नायः किरण केन रञ्जितं न्हूगु ज्यासनापुचः दयेकेया नितिं अनिल स्थापितयात नायःया भाला बियादीगु दु ।