नेक खेलकुद सप्ताह २०७७ सम्पन्न

नेपाल इन्जिनियरिङ कलेज (नेक) दुवाकोट‚ चाँगुनारायण–४‚ भक्तपुरको आयोजनामा भएको खेलकुद सप्ताह २०७७ बिहीबार सम्पन्न भएको छ । खेलकुद सप्ताह अन्तर्गत फुटवल, भलिवल, व्याडमिन्टन, एथलेटिक्स, टेवुलटेनिस, म्याराथुन, कपर्दी, टग अफ वार, हाइजम्प, लङजम्प लगायतका १५ वटा खेलकुदहरू भएका थिए ।
कलेजका प्राचार्य प्रा.डा. हरिकृष्ण श्रेष्ठले प्रतियोगितामा कलेजका दुई हजार विद्यार्थीहरूको सहभागिता रहेको जानकारी गराए । प्रत्येक दिन एक हजार दुई सयदेखि एक हजार चार सय जना विद्यार्थी खेलकुद प्रतियोगिताहरूमा सहभागी रहेको उनले जनाए ।

प्रतियोगिता सफलतापूर्वक सम्पन्न गर्नका लागि कलेज व्यवस्थापन समिति र कलेज सञ्चालक समितिबाट दुई वटा समितिहरू गठन गरिएका हुन् । कलेज सञ्चालक समितिको तर्फबाट बनेको समितिमा सञ्चालक समितिका सदस्यहरू सोम प्रधान, नरेश खड्का, सन्तोष केसी र दिनेश खनाल रहेका छन् । त्यसैगरी कलेज व्यवस्थापन समितिबाट बनेको खेलकुद समितिमा संयोजक एसोसियट प्रोफेसर बाबुराम भट्टराई, सदस्यहरूमा शिक्षक संर्घष समितिका संयोजक एवं एसोसियट प्रोफेसर दुर्गा भण्डारी, कर्मचारी संघर्ष समितिका संयोजक मनोहर खनाल, प्रशासन प्रमुख श्रीमति श्रीमा शर्मा र सदस्य सचिवमा संकल्प पोखरले रहेका छन् ।
दैनिक हजार भन्दा वढी विद्यार्थी खेलकुद प्रतियोगितामा सहभागी हुने भएकाले सम्भावित घाउचोटबाट सुरक्षित राख्न नर्स लगायतका स्वास्थ्यकर्मी टिमको पनि व्यवस्था रहेको कलेज व्यवस्थापनकोतर्फबाट खेलकुदका लागि गठन गरिएको समितिकी सदस्य श्रीमा शर्माले बताइन् ।
यसैवीच कलेजकै आयोजनामा आइतबारदेखि ललितपुरमा नेक वीडीएच (व्याचलर फर डिप्लोमा होल्डर्स्) प्रोग्राम अन्तर्गत खेलकुद दिवस हुने भएको छ । फागुन आठ गतेदेखि १२ गतेसम्म हुने खेलकुद दिवसमा फुटवल, भलिवल, बास्केटवल, टेबलटेनिस, चेस लगायतका आठ वटा खेलहरू हुने कलेजले जनाएको छ ।