पुरानो जगातीको ऐतिहासिक पुल पुनःनिर्माण सम्पन्न, गरियो उदघाटन 

भक्तपुर, असार २७
भक्तपुर नगरपालिका–८ स्थित ऐतिहासिक महत्व बोकेको पुरानो जगाती पुल पुनःनिर्माण सम्पन्न भएपछि शनिबार एक विशेष समारोहबीच औपचारिक रूपमा उद्घाटन गरिएको छ । कार्यक्रममा भक्तपुर नगरपालिकाका प्रमुख सुनिल प्रजापति प्रमुख अतिथिका रूपमा सहभागी भएका थिए ।
पुनःनिर्माण सम्पन्न पुलको उद्घाटन कार्यक्रममा जनप्रतिनिधि, स्थानीय बुद्धिजीवी, समाजसेवी, सरोकारवाला निकायका प्रतिनिधि तथा स्थानीय बासिन्दाको उल्लेखनीय उपस्थिति रहेको थियो । कार्यक्रममा वक्ताहरूले ऐतिहासिक सम्पदाको संरक्षणसँगै आधुनिक आवश्यकतालाई ध्यानमा राखेर पुलको पुनःनिर्माण गरिएको उल्लेख गर्दै यसले स्थानीय आवागमनलाई सहज बनाउनुका साथै सांस्कृतिक सम्पदाको संरक्षणमा पनि महत्वपूर्ण योगदान पुग्ने विश्वास व्यक्त गरे ।
वडा नं. ८ कार्यालयको आयोजनामा सम्पन्न कार्यक्रममा पुलको ऐतिहासिक महत्व, पुनःनिर्माण प्रक्रियाको आवश्यकता तथा स्थानीय विकासमा यसको भूमिकाबारे चर्चा गरिएको थियो । सहभागीहरूले पुराना सम्पदाको संरक्षण गर्दै भावी पुस्तालाई इतिहाससँग जोड्ने यस्ता अभियानलाई निरन्तरता दिनुपर्नेमा जोड दिएका थिए ।
कायक्रममा वडा अध्यक्ष केपी कोजू, नेपाल मजदुर किसान पार्टी भक्तपुर नगरपालिका वडा नं ८ का इन्चार्ज लक्ष्मीनारायण दुवाल, वडा सदस्य कृष्णलाल किसी, स्थानीय समाजसेवी जगतशेर गोसाई, उपभोक्ता समितिका अध्यक्ष बालगोविन्द तचामो, रामप्रसाद किसीलगायतले पुलका विविध पक्षमा चर्चा गरेका थिए । 
भक्तपुरको पुरानो जगाती क्षेत्र ऐतिहासिक तथा सांस्कृतिक दृष्टिले महत्वपूर्ण मानिने भएकाले पुनःनिर्माण सम्पन्न पुलले स्थानीय बासिन्दा, पर्यटक तथा सम्पदा संरक्षणमा चासो राख्ने सबैका लागि थप आकर्षणको केन्द्र बन्ने अपेक्षा गरिएको छ ।