लालबन्दी नगर वाङ्‌मय परिषद्द्‍वारा तीन स्रष्टा पुरस्कृत

लालबन्दीमा विभिन्न स्रष्टाहरू पुरस्कृत भएका छन् । लालबन्दी नगर वाङ्‌मय परिषद्द्‍वारा आयोजित लालबन्दी साहित्य महोत्सव-२०८१ को अवसर पारेर वरिष्ठ साहित्यिक पत्रकार एवम् "रचना" द्वैमासिक पत्रिकाका प्रधान स्पादक रोचक घिमिरेलाई 'साहित्यिक शहीद कृष्णलाल अधिकारी स्मृति पुरस्कार वर्ष -२०८१' बाट पुरस्कृत गरिएको थियो भने "बोरा" उपन्यासका लागि सर्जक अखण्ड भण्डारी 'लालबन्दी नगर वाङ्‌मय परिषद् भाषा तथा साहित्य पुरस्कार' बाट पुरस्कृत भए । उक्त समारोहमा 'लालबन्दी नगर वाङ्‌मय परिषद् भाषा तथा साहित्य पुरस्कार (स्थानीय)-२०८१ बाट स्थानीय पत्रकार शङ्कर श्रेष्ठ पनि पुरस्कृत भएका थिए । कार्यक्रम लालबन्दी नगर वाङ्‌मय परिषद्का प्रमुख संरक्षक तथा लालबन्दी नगरपालिकाका प्रमुख बासुदेव अधिकारीको अध्यक्षतामा सम्पन्न भएको थियो । कार्यक्रममा कवि रोचक घिमिरे, भूपिन खड्का, निमेष निखिल, प्रतीक घिमिरे, रमेश भट्टराई 'सहृदयी', यश लामा, पूर्णकला घिमिरे, कुमार दाहाल कुसुम, निरञ्जना चन्द 'निरु', गजलकार सुरेश सुवेदी, सुमित्रा आचार्य, भाष्कर काजीलगायतका स्रष्टाहरूले आआफ्ना कविता तथा गजल वाचन गरेका थिए। यसैगरी उक्त कार्यक्रममा लालबन्दी नगर वाङ्‌मय परिषद्का सचिव तथा कवि सुमन घिमिरे 'अग्रिम'द्वारा लिखित दुई कृति 'प्यालासँग नयाँ कविता' कविता सङ्ग्रह र 'समाजसेवामा बासुदेव अधिकारी' जीवनी कृति लोकार्पण गरिएको थियो । त्यसैगरी गजलकार विवश पौडेलकृत 'जूनको धर्ती' गजल सङ्ग्रह र कथाकार देवराज पौडेलकृत 'मानवता हराएका सहरहरू' कथा सङ्ग्रह पनि लोकार्पित भएका थिए। नेपाल प्रज्ञा- प्रतिष्ठानका कुलपति भूपाल राईको प्रमुख आतिथ्य तथा विशिष्ट अतिथिहरू नेपाल प्रज्ञा-प्रतिष्ठानका प्राज्ञ सदस्य चेतनाथ धमला र बर्दघाट साहित्य प्रतिष्ठानका कुलपति डा.घनश्याम न्यौपाने 'परिश्रमी' को उपस्तिथिमा 'लालबन्दी साहित्य महोत्सव-२०८१' कार्यक्रम सम्पन्न भएको थियो