नेपालभाषा तःमुंज्या साहित्य समितिको भेला सम्पन्न

भक्तपुर। चवालिसाैं नेपालभाषा साहित्य त:मुंज्यामा उत्कृष्ट साहित्य सहित सफल बनाउन साहित्य समितिको संयोजनमा लेखक तथा साहित्यकारहरूको प्रशिक्षणात्मक पहिलो भेला शनिबार सम्पन्न भयो । कार्यक्रममा जनकवि चन्द्रबहादुर उलकले उत्कृष्ट साहित्यको लागि नियमित अभ्यास गरी त्यसलाई संकलन गरी सुरक्षित राख्नुपर्ने बताउँदै समाजको अन्याय तथा शोषणलाई बिम्ब, प्रतीक र उपमा सहित आफ्नो विचार प्रस्तुत गर्नुपर्ने बताउनुभयो । नेपालभाषा साहित्य तःमुंज्याका अध्यक्ष आशकुमार चिकंबञ्जारले नेपालभाषाको साहित्य लेखनमा भएका व्याकरणीक सुधार हुनुपर्ने बताउँदै भाषामा आएको आगन्तुक शब्दलाई समेत स्वीकार गरेर माैलिक शब्दको चयनमा विशेष ध्यान दिनुपर्ने बताउनुभयो । नेपालभाषा साहित्य तःमुंज्याका संस्थापक अध्यक्ष तथा सल्लाहकार कान्छा बासुकलाले नयाँ पुस्ताले नेपालभाषाका शब्दहरू परिमार्जन गरेर प्रयोग गर्दा भाषाको माैलिकता र मिठासपन हराएकोले जोगाउनुपर्ने बताउनुभयो । आयोजक समितिका अध्यक्ष कृष्णभक्त लवजुको सभापतित्वमा सम्पन्न भएको उक्त कार्यक्रममा साहित्य समितिका संयोजक रामेश्वरी कोजुले पनि बोल्नुभयो ।