सु ख मदुमा ख्वपया संगीतकार रोशनकुमार राजभण्डारी?

ख्वपया नांजाःम्ह संगीतकार रोशनकुमार राजभाण्डारी म्हिगः मन्त । वय्कः ७५ दँ दुम्ह खः । दम, जलाख्यः लगायत थीथी ल्वचं कयाः छेँय् हे आराम याना च्वनादीम्ह वय्कः सनिवाः बहनी मदुगु परिवार श्रोतं धाःगु दु । म्हिगः शनिवाः हे सुथय् वय्कःया अन्तिम संस्कार पशुपति आर्यघाटय् क्वचाःगु दु । वय्कः ताः ई न्ह्यःनिसें ख्वपया थीथी सांस्कृतिक संघ संस्थाय् आवद्ध जुयाः स्वतन्त्र रुपं गजल गायन व गजल लेखनय् सक्रिय ब्यक्तित्व खः । वय्कःया गजलान्ती २, गजलान्ती २ व गजलन्ती ३ यानाः स्वंगू गजल सम्वन्धी सफू पिथनातःगु दु ।
झिदँ न्ह्यः कला मदयेवं छुं कथं सीथिल जीवन शैलीइ वंम्ह वय्कः हाकनं न्हूगु गजल व म्येत पिकायेगुलि सक्रिय जुयाच्वंम्ह ख्वपया प्रतिभा खः । नेपालभाषा साहित्य तःमुँज्या, विराट नेपालभाषा साहित्य सम्मेलन गुथि नापं इन्द्रेणी सांस्कृतिक समाजया थीथी दबुलिइ वय्कः थःम्हेसियां हे म्ये च्वयाः म्ये हालेगु व हायेकेगु यानादी । छगू इलय् नेपालभाषा साहित्य तःमुँज्याया लसकुस म्ये, लसकुस नृत्य तयार यायेगु ज्याय् वय्कः थःम्हं हे जिम्मेवारी कयाः ज्या याना च्वनादीम्ह खः । प्याखं स्यनेगु, गिटार स्यनेगु, तबला स्यनेगु नापं थीथी कथंया बाजं थायेगु व स्यनेगु ज्याय् २०६१ सालं औपचारिक रुपं घोषणा हे याना वय्कलं पेशा कथं नालादीगु खः ।
लिपांगु इलय् नरेन्द्रभक्त हाडाया पुण्य तिथिइ ख्यालिजुजु मदनकृष्ण श्रेष्ठपाखें गायक कथं सम्मान कयादीम्ह वय्कः छवाः लिपा थ्व संसार त्याग याना झाःगु दु । वय्कःपाखें थः दाजुया नामं संगीत सिरपाः नं देछानातःगु दु । वय्कःया न्हापांम्ह कलाःपाखें काय् छम्ह व म्ह्याय् छम्ह व कलाः दी ।