ABCD खबर

कृष्ण प्रजापति
मनू परिवर्तनशील प्राणी खः । सदां छगू हे कथं म्वाये यइमखु । अथे जुया थौं स्वयां कन्हय् व कन्हय् स्वयां कंस उन्नति व प्रगति चाहे जुयाच्वनी । थुकियात हे अग्रगमन धाइ । परिवर्तनशील सः ज्वनाः न्हिया न्हिथं न्ह्यज्याइपिं जूगु कारणं मनूत संवेदनशील, उन्नतिशील व प्रगतिशील जुजुं वनाच्वंगु खः । थःगु समाज नापं थःगु ब्यक्तिगत जीवनय् नं प्रगति यानाच्वनेगु मानवीय भावनापाखें हे झीत सदां सक्रिय जीवनया लागिं ग्वाकाच्वनी । राजनीति, कुटनीति व अन्तर्राष्टिय स्तरया रणनीति फुक्कं प्रगतिशील भावना पिज्वयेकेगु लागिं हे न्ह्यज्यानाच्वनीगु खः । अथे जुया नं अर्थशास्त्र, मानवशास्त्र नापं समाजशास्त्रया अध्ययन अध्यापन याइपिसं नं समाजया प्रगतिया लागिं थीथी कथं कुतः यानाच्वनी । थज्याःगु समाजयात न्ह्यचिकेगु ज्याय् न्हूगु पुस्ता युवा विद्यार्थीतय्पाखें नं आशा यायेमाः । उकिं न्हूगु पुस्तायात समाज परिवर्तनया लागिं उत्साहित यायेमाःगु खः ।
    समाजय् आमूल परिवर्तन हयेत जनताया दथुइ वना ज्या याये फयेकेमाः । तर थौं तक झीथाय् जुयाच्वंगु परिवर्तन वा क्रान्तिया खँ दुवाला स्वयेगु खःसा अथे जुयाच्वंगु मदु । छुं छपुचः मनूत बिद्रोही जुयाः उपिंपाखें विप्लब यायेवं परिवर्तन जूगु तायेकाच्वंगु दु । सरकार व नीति निर्माता फुक्कं सक्षम, योग्य व जागरुक मजुइकं जूगु परिवर्तनया कारणं जनतां उगु परिवर्तन व क्रान्तिया वास्तविक सवा धाःसा काये मखनाच्वंगु खः । २००७ सालं क्रान्ति जुल धाल । उकिं राणा शासकतय् थासय् थीथी राजनीतिक दलया नेतातय्सगु शासन सुरु जुल । तर जनतां वास्तविक रुपं क्रान्ति व परिवर्तनशया सवाः काये मखन । झिदँ तक उगुं थुगुं शासनया अलमलय् लालां झिदँ लिपा जुजुया प्रत्यक्ष शासनय् तःक्यन । क्रान्ति नं प्रतिक्रान्तिइ हिलावन । वास्तवय् जनता सचेत मजूगु कारणं वा राजनीतिक दलतय्गु खिचातानीया कारणं हे जुजुं पंचायती ब्यवस्थाया सुत्रपात याःगु खः । उकिं थन परिवर्तन अझ तापानि, खालि थन ला शासक वर्गया जक हिउपा वःगु खः धकाः झीत महाकवि लक्ष्मीप्रसाद देवकोटां अभिब्यक्त यानाक्वंगु खः ।
    क्रान्तिकारी धाइपिसं निरन्तर रुपं समाज परिवर्तनया लागिं चिन्तन मनन यानाच्वनेमाःगु खः । तर थन अथे नं जुयाच्वंगु मदु । समाज परिवर्तन यायेगु जिम्मा कयाच्वंपिं राजनीतिक दलतय्के जनतायात सक्षम यायेगु, जनतायात राजनीतिक चेतना बियेगु वा उमित क्रान्तिया लागिं तयार यायेगु सहास मदु । उकिं बन्दूक ज्वना, दांगदुंग याना वा छपुचः हतियार ल्ह्वनीपिं मनूत तयार याना बलजफ्टी थन क्रान्ति यायेगु न्हूगु परिपातिया विकास जूगु दु । सत्ता ला अथे याना नं परिवर्तन जुइगु जुल । तर जनताया मानसिकता धाःसा म्हिगः गथे खः अथे हे जुयाच्वनीगु कारणं थुकीयात परिवर्तन वा क्रान्ति धायेगु कि मधायेगु विवाद जूवंगु दु । उकिं हे २००७ सालया क्रान्ति लिपा २०१६ सालय् थः शिक्षामन्त्री तकं जुल नं उगु क्रान्तियात वास्तविक क्रान्ति मखु । शासक दलया जक परिवर्तन जूगु खः धकाः तत्कालीन शिक्षामन्त्री महाकवि लक्ष्मीप्रसाद देवकोटां धयादीगु खः ।
    २०४६ सालया क्रान्ति नं भारतीय नेतात नेपाल वयाः चाक्सिवारीइ भाषण यानाः उकिया आधारय् भारतं समर्थन यायेवं नेपाःया सत्ताशीन नेता आँटे चायेवं क्वचाःगु छपुचः राजनीतिक पार्टीं चले यानावंगु शासक दलतय् हिउपाः जक खः । जनतायात वास्तविक रुपं सचेत याना जागरुक याना समानता व न्यायया लागिं उत्साहित याना शोषण रहित समाज निर्माणया ज्या झीथाय् पटक्क हे जूगु मदु । न्हूगु क्रान्ति मजुइकं थ्व सम्भव नं मदु । थ्व न्हूगु क्रान्ति धइगु समाजवाद खः । आःया क्रान्ति व परिवर्तन ला फुक्कं पूँजीवादी क्रान्ति खः । गुगु पूवंगु क्रान्ति खः हे मखुनि । सामन्तवाद व नव उपनिवेशवादया बिरोधय् पूँजीवादी वर्गं थःपिनि पूँजी यथेष्ट चले याये दइगु वातावरण तयार यायेत शासन सत्ताय् थ्यंकेगु परिपातिया विकास यायेगु निंतिं जक थन छुं छुं आन्दोलन व क्रान्तिया नाटक क्यना जूगु खः । मखुत धाःसा २०४६ साल लिपा छाय् क्रान्तिकारी गतिविधित सुनसान जूवन ? आः रुसय् फेब्रअरी क्रान्ति लिपा अक्टोबर क्रान्ति याथें वाममोर्चा विघटन मयासें न्हूगु क्रान्तिया लागिं न्ह्यचिलेमाः धायेकं धायेकं छाय् वाममोर्चा विघटन जूवन ? उकिं थन क्रान्तिया वास्तविक सवाः काये मखंगु खः ।
    पाय्छि इलय् पाय्छि ज्या यायेगु हे क्रान्तिकारी जीवन शैली खः । क्वानाच्वंगु नँयात क्वाःक्वाःगु इलय् लाका दाया छ्याना आकार बिल धाःसा जक अःपुक परिवर्तन जुइ । ईंचा, चुपी, कू, कुकिचा छु आकार बियेमाःगु खः । नँ क्वानाच्वंगु इलय् हे बियेमाः । उकिं २०४६ सालं जनता आन्दोलित जुयाच्वंगु इलय् लाक समाजवादी क्रान्तिया लागिं वामपन्थी दलतय्सं न्ह्यचिला वनेफुगु जूसा थौं देय् पूँजीवादी प्रजातन्त्रय् तःक्यना लिउने लानाच्वने माली मखु जुइ । तर थ्व मौकायात झीसं हे तंका च्वनेमाल । थज्याःगु राय सल्लाह उगु इलय् वामपन्थी दलतय् दथुं ब्वलंगु खः । तर मन्त्री जुइ हथाय् चाःपिं व जुजुनापं वार्ता यानाः याकनं न्हूगु संविधान बियाः सत्ताशीन जुइत आतूर गुलिं राजनीतिक दलतय्सं थ्व मौकायात प्रयोग याना मक्यं । उकिं झिदँ लिपा हाकनं जनयुद्धया माध्यमं क्रान्तिया खँ पिहां वल । तर उकिं झीगु समाजयात परिवर्तनया लँय् यंकेफुगु खनेमदु ।
    हतियार ल्वनाः सत्ता कब्जा यायेगु व जनतायात सचेत व संगठित यानाः वास्तविक क्रान्ति यायेगु धर्ती व आकास थें हे पाः । संगठन यानाः सारा जनतायात क्रान्तिया लागिं तयार यायेगु ज्या अःपू मजू । अथे खःसां थ्वहे वास्तविक क्रान्तिया लँपू खः । आः थें छुं छपुचः पूँजीवादी तत्वतय्सं जक हालिमुहाली याये खनीगु ब्यवस्था हयेगु लागिं हे जक क्रान्ति यानागु नाटक म्हिताः, विदेशय् च्वनाः देसय् क्रान्ति जुइधुंका सत्ताय् वयेत चांचां थःगु देसय् लिहां वइपिं नेतातय्सं झीथाय् क्रान्ति याःगु धाये मछिं । उकिं नं न्हूगु पुस्तायात क्रान्तिकारी भावना ब्वलंकेगु थाकुगु तर सही ज्याय् आः राजनीतिक पार्टीत न्ह्यचिले माःगु खनेदु । राजनीतिक सिद्धान्तय् अटल जुइपिं न्हूगु पुस्तायात क्रान्तिकारी भावनां ओतप्रोत याये फत धाःसा कन्हय् देस व जनताया लागिं सियेत व स्यायेत तयार जुइपिं लडाकू तयार जुइ । अले जक अवश्य थ्व देसय् विश्वय् दक्कलय् उत्कृष्ट समाजवादी ब्यवस्था लागू जुयाः जनतां वास्तविक क्रान्तिया सवाः काये खनी ।


...