कृष्ण प्रजापति
सिंहदरबार दुने गोली चलेजूगु घटनाय् राष्ट्रिय सभाया उपाध्यक्ष शशिकला दाहालया नीजि सुरक्षा अधिकृत (पिएसओ) अनुपमा भारतीया गल्ती खनेदूगु दु । प्रहरी प्रधान ज्याकुथि, नक्सालं याःगु छानबिनय् प्रहरी सहायक निरीक्षक (असई) भारतीया लापरवाहीं घटना जूगु निष्कर्षलिसें वयात नसिहत ब्यूगु दु । भारतीं ज्वनातःगु पेस्तोल कार्तिक १० गते सिंहदरबार दुने मूगु खः । तर सुयात नं मलात ।
प्रहरी प्रधान ज्याकुथिं याःगु छानबिनं भारतीं न्हूगु पेस्तोल हःगु व नम्बर टिपेयाकेगु झ्वलय् ‘मिस ह्याण्डलिङ’ जुयाः गोली चलेजूगु खनेदूगु दु । केन्द्रीय प्रहरी प्रवक्ता बसन्तबहादुर कुँवरया कथं ल्वाभःलिसें बर्दीइ दूगु इलय् टिकटक दयेकूम्ह असई कमलेश यादव नं कारवाहीलय् लाःगु दु । यादव प्रदेश १ या छम्ह मन्त्रीया सुरक्षाय् खटेजूगु खः । निम्हेसित जिम्मेवारीपाखें सालाः प्रहरी प्रधान ज्याकुथिया सुरक्षा सेवा निर्देशनालयस हःगु दु । कुँवरया कथं यादवयात स्पष्टीकरण कायेगु तयारी जुयाच्वंगु दु । कुँवरं धाःगु दु, ‘थ्व कारवाही प्रक्रियायय् वनेधुंकूगु विषय खः, आःयात जिम्मेवारीपाखें लिकयागु दु ।’

...

All Comments.......


Please Login/Register To Comments