चलखं ल्हानाः छखा छेँजःया स्वम्ह सित, छम्ह बेपत्ता

कृष्ण प्रजापति
छेँ च्वसं कुतुंवःगु चलः (पहिरो)या हुनिं दक्षिणी रसुवाया कोडा डाँडाा धैगु थासय् चलखं छेँ ल्हानाः छखा हे छेजःया स्वम्ह मनूत सीगु दुसा छम्ह बेपत्ता जूगु दु । नौकुण्ड गाउँपालिका ५ कोलडाँडाया श्यामबहादुर घलानया छेँ ल्हाःबलय् वया कलाः व निम्ह मचा सीगु खःसा बेपत्ता जूम्ह मेम्ह छम्ह मचाया मालेगु ज्या जुयाच्वंगु दु । जिल्ला प्रहरी ज्याकुथि रसुवाया प्रमुख देवेन्द्र पाण्डें धाःगु दु, ‘श्यामबहादुरया कलाः व निम्ह मचाया डेथ बडी लुयावःगु दु । मेम्ह छम्ह मचाया मालेगु ज्या जुयाच्वंगु दु ।’ चलखय् ३२ दँया कमला घलान, ११ दँया सोकिता घलान, ८ दँया सुकुमाया घलान व ७ दँया आशिष घलान ल्हाःगु खः ।
श्यामबहादुर घाःपाः जूगु दु । वयात उद्धार यानाः वासः यायेत सुरुइ नुवाकोटया त्रिशूली अस्पताल छ्वःगु व लिपा अनं येँया ट्रमा सेन्टरय् रिफर याःगु प्रहरीं जानकारी ब्यूगु दु । घटना बिहिवाः सुथय् थ्यंमथ्यं ३ ता इलय् जूगु खः । स्थानीयया धापू उदृत यासें डिएसपी पाण्डें धाःगु दु, ‘तसकं सः वयेधुंकाः जलाखलापिं स्वःवंबलय् चलखं छेँ ल्हाःगु खंगु, अन लिक्क हे श्यामबहादुर लुयावःगु खः ।’ श्यामबहादुर यात वासः यायेत छ्वयेधुंकाः स्थानीयया ग्वाहालिं सेना व प्रहरी पुचः मेमेगु उद्धारय् खटेयाःगु खः । घटनास्थल सदरमुकाम धुञ्चेपाखें थ्यंमथ्यं ५० किलोमिटर दक्षिणपाखे ठूलोभोर्ले व धुसेनी गांया दथुइ लाः ।