४५ दिनदेखि दिल्लीको होटलमा बन्धक तीन नेपालीको उद्धार

सर्बिया पठाउने प्रलोभनमा ४५ दिनदेखि दिल्लीको होटलमा बन्धक तीन नेपालीको उद्धार, पीडादायी बन्धक जीवनबाट पाए मुक्ति

काठमाडौं।सुन्दर भविष्य र रोजगारीको सपना बोकेर विदेश जाने आशामा भारत पुगेका तीन जना नेपाली नागरिक ४५ दिनसम्म बन्धक बन्नुपरेको पीडाबाट मुक्त भएका छन्। सर्बिया पठाइदिने प्रलोभन देखाएर भारतको राजधानी नयाँ दिल्लीस्थित एक होटलको कोठामा बन्धक बनाएर राखिएका उनीहरूलाई सामाजिक संस्था किन इन्डिया सहित सम्बन्धित निकायको संयुक्त पहलमा सकुशल उद्धार गरिएको हो।
विदेशमा राम्रो रोजगारी पाउने, परिवारको आर्थिक अवस्था सुधार्ने र आफ्ना सपना पूरा गर्ने आशामा घर छाडेका उनीहरूका लागि दिल्लीको बसाइ भने निकै पीडादायी बन्यो। सर्बिया पुर्‍याइदिने आश्वासन दिएर दिल्ली ल्याइएका उनीहरूलाई करिब ४५ दिनसम्म होटलको कोठामा नियन्त्रणमा राखेर मानसिक यातना दिइएको थियो।
घटनाबारे जानकारी प्राप्त भएपछि नेपाल प्रहरीको मानव बेचबिखन अनुसन्धान ब्युरो, नेपाली राजदूतावास, नयाँ दिल्ली, दिल्ली प्रहरी तथा किन इन्डियाले तत्काल सक्रियता देखाएका थिए। सम्बन्धित निकायबीचको समन्वय र संयुक्त प्रयासपछि तीनै जना नेपाली नागरिकलाई बन्धक अवस्थाबाट सकुशल उद्धार गर्न सफल भएको हो।
सामाजिक संस्था किन इन्डियाका निर्देशक नवीन जोशीका अनुसार वैदेशिक रोजगारीका लागि सर्बिया पठाइदिने आश्वासन दिएर उनीहरूलाई दिल्ली ल्याइएको थियो। तर रोजगारीको सपना देखाएर ल्याइएका उनीहरू ४५ दिनसम्म होटलको कोठामा बन्धक बन्न बाध्य भए।
जोशीले घटनाबारे जानकारी प्राप्त भएपछि सम्बन्धित निकायसँग तत्काल समन्वय गरी उद्धारका लागि पहल गरिएको बताए। उनका अनुसार वैदेशिक रोजगारीको प्रलोभनमा पारेर नेपाली नागरिकलाई भारतमा ल्याई बन्धक बनाउने तथा शोषण गर्ने घटनाप्रति सबै सचेत हुन आवश्यक छ। विदेश जाने क्रममा रोजगारदाता, म्यानपावर कम्पनी र आवश्यक कागजातको आधिकारिकता जाँच गर्नुपर्ने जोशी बताउँछन् ।
उनले उद्धार गरिएका तीनै जनाको सुरक्षा, संरक्षण तथा स्वदेश फिर्तीका लागि आवश्यक समन्वय भइरहेको जानकारी दिँदै पीडितलाई उद्धार गर्नु मात्र नभई उनीहरूलाई सुरक्षित रूपमा घर फर्काउने र सम्मानजनक पुनर्स्थापनामा सहयोग गर्नु पनि संस्थाको प्राथमिकता रहेको बताए।
लामो समयसम्म डर, त्रास र मानसिक यातनाबीच बिताएका पीडितहरूका लागि बन्धक अवस्थाबाट मुक्ति मात्र नभई सुरक्षित जीवनतर्फ फर्किने आशाको नयाँ सुरुवात बनेको छ।मानव बेचबिखन र वैदेशिक रोजगारीको नाममा हुने ठगीले व्यक्तिको जीवनका साथै परिवारको सपना, भरोसा र भविष्यसमेत प्रभावित बनाउँछ। रोजगारीको प्रलोभनमा पारेर नेपाली नागरिकलाई शोषण तथा बेचबिखनको जोखिममा पार्ने यस्ता घटनाप्रति राज्यका निकाय थप सचेत र जिम्मेवार बन्न आवश्यक देखिएको छ।
यस उद्धार अभियानमा मानव बेचबिखन अनुसन्धान ब्युरो, नेपाली राजदूतावास, नयाँ दिल्ली तथा दिल्ली प्रहरी र सामाजिक संस्था किन इन्डियाकाे सहकार्य रहेको छ

Leave a Reply

Your email address will not be published. Required fields are marked *