तुतःव परित्राण पाठ ज्याझ्वः क्वचाल

ख्वपय् गुँला धर्मया लसताय् तुतःव परित्राण पाठ ज्याझ्वः क्वचाल । ने.सं.११४६ गुँलागा चतर्दशी २०८३ भाद्र २५ गते बिहीबार गुँलाधर्मया लसताय् युवा बौद्ध पुचःभक्तपुरया ग्वसालय थी थी विहार बही व त्वालय् न्ह्यागु ज्याझ्वः लिपांगु अर्थसहित तुतः व परित्राण पाठ ज्याझ्वः लोकेश्वर विहार लिक्क खःमा बहालय् क्वचायेकुगु दु । ज्यझ्वय् युवा बौद्ध पुचः भक्तपुरया अध्यक्ष रत्नसुन्दर शाक्यजुं गुसःदँ न्ह्यः ने.सं.२०४ स लिच्छवि जुजु हर्षदेवं चिनातगु प्रभात स्तोत्र,तुतःमपिया महत्व बारे कना बिज्यात । अथेहे संस्कृतं चिना तगु तुतःमपि स्तोत्र व पाली भासं च्वया तगु परित्राणया अर्थ कार्यसमिति सदस्य प्रताप मानन्धरजुं ब्वना न्यंकुगु जुल । खःमा बहाया नायो व बरिस्ठ उपासक संघरत्न शाक्यजु ख्वपया लुँ ध्वाका दयेकुगु व खःमा बहाया इतिहास कना बिज्यात । सचिव तुलसीकाजी मानन्धरजुं ज्याझ्वय तुतःब्वनेग ज्याझ्वःन्ह्याकेमागु खँय् कना दिल । युवा बौद्ध पुचः भक्तपुरया उपाध्यक्ष नापं ज्याझ्वया कःजि शाक्यान शाक्यजु सुभाय् बिज्यागु जुल । दक्कले न्हापां गुँलाथ्व पंचमी(नागपंचमी)भाद्र १ गते सोमबार कुन्हु क्वाथण्डौया दीपंकर प्रशन्नशीर महाविहारं शुरू जुया लायेकु, गुँलाथ्व नवमी, भाद्रद५ गते शुक्रबार कुन्हु साकोथाया चतुर्ब्रम्ह महाविहार, गुँलाथ्व त्रयोदर्शी, भाद्र १० गते बुधबार कुन्हु मंगल धर्मदीप महाविहार झौर बही, गुँलागा सप्तमी, भाद्र १८ गते बिहीबार कुन्हु साःकोलां त्वालय् व गुलागाः चतुर्दर्शी, भाद्र २५ गते बिहीबार ख:मा बहालय् तुतः व परित्राण पाठ याना क्वचागु जुल । दक्कले लिपा जनकवि दुर्गालाल श्रेष्ठ नापं खुसी बा वया मदुपिं सकसियां सुगती लायेमा धका पुण्यानुमोदन धुका थुगुसिया तुतः व परित्राण पाठ क्वचायेकुगु जुल ।