भक्तपुर नगरपालिकाले स्पष्ट पारेका ती ६ बुँंदा

भक्तपुर । भक्तपुर नगरपालिकामा भएको बेरुजुलाई लिएर एउटा युट्युव च्यानलले बनाएको समाचार 3 दिन अघि यहाँं भाइरल बन्यो । त्यही समाचारको विषयलाई लिएर भक्तपुर नगरपालिकाले शुक्रबार विज्ञप्ति प्रकाशित गरेको छ । भक्तपुर नगरपालिकाको बेरुजु सम्वन्धमा सामाजिक सञ्जालमा फैलिएको अपुष्ट समाचार स्पष्ट पारिएको बारे शीर्षक राखेर दुई पृष्ठ लामो विज्ञप्ति प्रकाशित गरयो । प्रकाशित विज्ञप्ति ६ वटा बुँंदामा उल्लेख छन् ।

भक्तपुर नगरपालिकाको नगर कार्यपालिकाको कार्यालय (ब्यासी, भक्तपुर) द्वारा मिति २०८१/०६/२३ मा प्रकाशित “भक्तपुर नगरपालिकाको बेरुजु सम्बन्धमा सामाजिक सञ्जालमा फैलिएको अपुष्ट समाचार स्पष्ट पारिएको बारे” शीर्षकको ध्यानाकर्षण/स्पष्टीकरण पत्र दिइएको छ।

प्रमुख ६ वटा बुँदाहरूको सारांश निम्न अनुसार छ:

१. सेवा निवृत्त कर्मचारीहरूको उपदान भुक्तानी सम्बन्धमा

सामाजिक सञ्जालमा चर्चा भए अनुसार सेवा निवृत्त ९ जना कर्मचारीलाई रु. ५७ लाख ८७ हजार थप भुक्तानी गरिएको विषयमा, तत्कालिक स्थानीय स्वायत्त शासन ऐन, २०५५ र कर्मचारी प्रशासन सम्बन्धी विनियम, २०६५ अनुसार करार/अस्थायी अवधि समेत गणना गरी उपदान भुक्तानी गरिएको हो। निजामती सेवा ऐन, २०४९ को दफा ५८ बमोजिम खाइपाई आएको सुविधा घटाउन नमिल्ने र स्वीकृत विना प्रतिकूल असर पर्ने गरी परिवर्तन गर्न नमिल्ने कानुनी सिद्धान्त अनुसार सो रकम भुक्तानी गरिएको हो। यो बेरुजु नगर सभाको २०८०/०३/२९ गतेको निर्णय अनुसार कानुन बमोजिम नियमित भइसकेको छ।

२. सञ्चित घर बिदा, विशेष सुविधा र प्रोत्साहन भत्ता

स्थानीय स्वायत्त शासन ऐन, २०५५ को दफा २५० (३) बमोजिम “स्थानीय निकायले आफ्नो स्रोत, साधन र प्रशासनिक बजेटको परिधिभित्र रही कर्मचारीलाई स्थानीय भत्ता/सुविधा दिन सक्नेछ” भन्ने व्यवस्था छ। सोही ऐन र स्थानीय सेवा गठन सञ्चालन व्यवस्थापन तथा सेवा शर्त सुविधा सम्बन्धी ऐन, २०८० बमोजिम नगरपालिकाले आफ्नै स्रोतबाट उक्त रकमहरू नियमित भुक्तानी गरेको हुँदा यसमा कुनै अनियमितता भएको छैन।

३. प्रमुख प्रशासकीय अधिकृत र चालकहरूको भत्ता

कार्यालय समय बाहेक बिहान, साँझ र राति समेत काममा खटाउनुपर्ने भएकोले अतिरिक्त समय भत्ताको साटो आवश्यक कानुन निर्माण गरी नियमअनुसार नै प्रोत्साहन भत्ताको व्यवस्था गरिएको हो।

४. स्वकीय सचिव सम्बन्धी विषय

स्वकीय सचिव राखी अनियमित भुक्तानी गरिएको भन्ने विषयमा, आ.व. २०८२/८३ को संगठन तथा व्यवस्थापन सर्भेक्षण (O&M) प्रतिवेदन २०८२ नगर सभाबाट स्वीकृत गरी स्वकीय सचिव पद खारेज र पद मिलान गरिसकिएकाले यो विषय नियमित भइसकेको छ।

५. अन्य भत्ताहरू

मिति २०६९/०१/१७ गतेको कार्य सञ्चालन समितिको निर्णय तत्काल प्रचलित कानुन तथा नगरपालिकाको अधिकारक्षेत्रभित्र रही विधिवत् रूपमा भएको निर्णय हो। उक्त निर्णय हालसम्म खारेज वा संशोधन नभएकाले अन्य भत्ताहरू सोही बमोजिम नियमनुसार नै भुक्तानी भएको हो।

६. प्रमाण कागजात पेस नभएको (रु. ४,६०,५७,९२१।-) सम्बन्धी

प्रमाण कागजात पेस नभएको भनिएकोमा भक्तपुर नगरपालिका लेखा समितिको प्रतिवेदन अनुसार २०८३ असार मसान्त सम्ममा रु. ४,५७,९३,९३०।– को प्रमाण कागजात सङ्कलन भइसकेको छ। प्रमाण कागजात विना भुक्तानी दिइएको भनिएको बेरुजु पनि नियमित भइसकेको जानकारी गराइएको छ।